Lôch njar trong âk nar hăn ŏk r’ah bah ƀon tơm Nghệ An hăn Tây Bắc râng tâm lơh ta Điện Biên; ndrel ăp nar pah kan mbuh trong tâm mih phŭt sial ndrăk nsiu gay ndeh n’hanh tahen hăn ntŭk tâm lơh, lah mô geh nău nking n’gang, mât njrăng, kơl bah ƀon lan ăp rnoi nuĭh ta ntŭk ri jêr gay lôch jêh nău kan. Wa Thái Hữu Hoành-Druh ndăm xung phong ơm ta phường Quyết Thắng, Nkual ƀon têh Sơn La, n’gor Sơn La lĕ lah kơt nĕ rnôk nkah tay mpeh ăp nău rgop bah ƀon lan ăp rnoi nuĭh Tây Băc tâm rơh tâm lơh ta Điện Biên năm 1945.

Yor nău nking n’gang, kơl an, mât njrăng bah ƀon lan, âk nuĭh tâm ăp rmôt pah kan bah he lĕ roh nău rgot joi, rŭng răng bah rlăng; ndâk njêng geh âk ntŭk chính trị tâm ƀon lan, ƀư tơm gay tĭng nău ntrŭnh tâm lơh tâm su bah Đảng ta nkual Tây Bắc.

Ƀon lan ăp rnoi nuĭh Tây Bắc uĕh ngăn, dŭt ŭch tahen, ŭch Druh ndăm xung phong. Rnôk nĕ nău rêh dŭt ach o, mô geh chợ ndră, yơn kônh wa uĕh ngăn, geh trau, geh poăch moh ndơ an kơl, kơl tahen, kơl druh ndăm xung phong. Nău tay gâp saơ nuih n’hâm mât mpôn bah nuĭh ƀon lan dŭt uĕh, mô geh du ntŭk kan geh phah ta nkual tahen gŭ, nău nĕ saơ nuih n’hâm mpôn bah nuĭh ƀon lan lĕ rngôch yor tâm lơh tâm su.

Ƀư soih n’hanh pơk âk trong gay rmôt taen hăn, ndeh tâm lơh, wơt ndơ̆ ndơ ngêt sa, mât đăp mpăn an măt trận lah nău ntrŭnh khlay bah he rnôk nĕ. Ta n’gor Yên Bái, khay 4/1953, tĭng nău đă bah Bộ Tổng tham mưu, ăp ntŭk kan công binh n’hanh dân công ta aơ lĕ soih pơk trong an ndeh hăn tâm lơh. Nuĭh ƀon lan xă Nguyễn Phúc (TP Yên Bái nar aơ) n’hanh nuĭh ƀon lan ta Trấn Yên, Lục yên, Văn Chấn, Văn Bàn...lĕ nsrôih râng tâm ăp rmôt dân công. Wa Hà Văn Hổ, nuĭh ƀon lan ta xă Thượng Bằng La, nkuăl Văn Chấn (Yên Bái) rnôk nĕ mhe 10 năm, yơn lĕ ŭch kơl ăp kônh wa dân công n’hanh druh ndăm xung phong pơk trong 13 hăn rlău xă nơm hăn tâm lơh. Wa Hà Văn Hổ nkah gĭt tay:

Gay pơk trong hăn rlău ta aơ, lvang rlău bản Thẳm geh ntŭk bŏk rhŭt ƀư lŏ mô dơi tăm, rpu mô dơi hăn, yơn kônh wa ta aơ lĕ kơl tăm, geh jay djôt n’ăp si nchrăp ƀư jay gay an dân công dăp rgăn, dăp njrôk jêh nĕ nkhŭt neh ƀư jâng. Ndeh păr ri dŭt âk, bah bản Dạ tât yôk Lũng Lô lĕ rngôch ndeh par ăp nar tât phah đŏng.

Tĭng rnoh kơp, gay pơk trong bah ntŭk Việt Bắc tât măt trận, đăp mpăn lĕ rngôch an rbăn nuĭh, rmưn rơh ô tô, đại bác, ndeh wah jâng... hăn ntŭk tâm lơh Điện Biên Phủ, n’gor Yên Bái lĕ rgŏ jă rlău 128 rbăn nuĭh ƀư trong; rlău 273 rbăn nar kuih mbuh, rli bŭl bom, njrăng n’gang pĭch rluh; ƀư mhe n’hanh nkra 188 km trong har bah ntŭk tâm lơh...

Ndrel đah soih luh n’hanh pơk mhe ăp trong, du nău rgop khlay bah tahen n’hanh ƀon lan Tây Bắc tâm rơh tâm lơh an kơp tât nău rgŏ jă soan nuĭh, drăp ndơ an trong kan ntop kơl. Aơ lah ngoăy tâm âk jêr jŏt têh ngăn ma bah ntrŭnh an pơk trong tâm lơh, Trung ương Đảng n’hanh Chính phủ lĕ mĭn, yor Điện Biên Phủ lah ntŭk kơl têh ngăn, lĕ rngôch ăp trong an rlet rlău ntŭk ntô yôk bri, trong rdêng dŭt âk đah soan nuĭh, đah ndeh wah jâng n’hanh geh rlăng joi ăp trong lơh phah nking n’gang. Ndrĭ yơn, ăp bom, ndrăk nsiu n’hanh njê mô dơi nking n’gang njoat hăn bah ăp mpôl dân công, ăp mpôl rdêng nar măng rdêng ndơ sông sa, ndrăk nsiu tât Điện Biên Phủ an tahen lơh rlăng:

Ta ƀon tơm nơm, ƀon lan ăp rnoi nuĭh n’gor Điện Biên, Lai Châu n’hanh ăp n’gor Tây Bắc rnôk nĕ nkre lah ăp nuĭh râng rdêng ndơ, nkre lah ăp nuĭh jao gĭt blău, geh măt n’hanh hăn lor tâm ăp mpôl hăn mặt trận. Khân păng gơih nđơr kơl, tâm pă nău njê ŏk r’ah, dŭt n’hâm đah ăp nuĭh oh nô ta ăp n’gor nkual ngai tât râng tâm lơh. Wa Trần Quốc Cường, Ủy viên TW Đảng, Bí thư N’gor ủy Điện Biên an gĭt:

Tâm rơh tâm lơh ta Điện Biên Phủ, ƀon lan ăp rnoi nuĭh n’gor Lai Châu, aƀaơ lah n’gor Điện Biên n’hanh n’gor Lai Châu lĕ rgop an nău kan 2.666 tấn phe, rlet rlău 64 tấn; 226 tấn poăch, rlău 43 tấn; 210 tấn biăp; rgŏ jă bơi 17 rbăn dân công, đah 568 rbăn nar luh; bơi 450 seh rdêng ndơ; hang rbăn duk mpan, rgop rlău 25 rbăn tơm si ƀư trong an ndeh pháo n’hanh tahen hăn.

Tĭng Bí thư N’gor ủy Điện Biên wa Trần Quốc Cường, ăp nău rgop bah ƀon lan ăp rnoi nuĭh Điện Biên-Tây Bắc đah nău tâm lơh ta Điện Biên Phủ lah rup ndah uĕh, bah nuih n’hâm tâm rnglăp đah ăp rnoi nuĭh, nta an soan têh dăng, soan dăng tâm rgop bah tâm rnglăp rnoi nuĭh, rgop khlay ƀư jêng nău lơh dăng Điện Biên Phủ “Ntoh lư ăp dak, mpât n’gơ lam ntŭr neh”./.