Tâm rơh pah kan ta n’gor Sơn La tâm lơ 8/1/2014, Tổng Bí thư Nguyễn Phú Tọng n’hanh mpôl pah kan lĕ tât khâl n’hanh pah kan ta Ngih măy thủy điện Sơn La. Đah cán bộ, phung pah kan-ăp nuĭh dơi lap wơt Tổng Bí thư nĕ lah ăp nău nkah ndrăy, nău ơm mô dơi chuêl. Nău rêh, rah rơih n’hanh ăp nău ntĭnh têh bah Tổng Bí thư dơi ăp nuĭh nkah gĭt n’hanh nti. Tổng Bí thư mpŏng ŭch nsum mpôl cán bộ, kỹ sư, nuĭh way kan, công nhân viên Công ty mât uĕh tay nău blău ơm, săk rnglăy dơi geh tâm rnôk ndâk ƀư, pơk dŏng thủy điện, mĭn lah tay nău nsing nơm, nău tơm khlay bah thủy điện Sơn La; kơl ndâk ƀư n’hanh pơk dŏng đăp mpăn, săk rnglăy ăp ndơ thủy điện êng bah neh dak.
 

Tăng lư Tổng Bí thư Nguyễn Phú Trọng khĭt, cán bộ n’hanh nuĭh ƀon lan Quảng Ngãi dŭt rngot klâng. Tổng Bí thư Nguyễn Phú Trọng lah nuĭh ntoh ang, hăn lor mpeh nău mĭn cách mạng, lĕ nău rêh wa pah kan an Đảng, an neh dak n’hanh ƀon lan. Tâm nău kahgĭt bâh cán bộ n’hanh ƀon lan Quảng Ngãi, Tổng Bí thư Nguyễn Phú Trọng lah nuĭh leo kan gâl têh yơn dăch mêr, đêp rmên dăch bên. Wa Phạm Đình Khối, tă ƀư Bí thư n’gor Ủy Quảng Ngãi an gĭt. Geh mâp Tổng Bí thư Nguyễn Phú Trọng dŭt âk tơ̆ yơn an kahgĭt ngăn lah rnôk wa Trọng sĭt ta Quảng Ngãi râng rơh sa nkra lăp dŏng nkual nkah ndrăy Thủ tướng Phạm Văn Đồng. Lơ 31/8/2008, Tổng Bí thư Nguyễn Phú Trọng lĕ săch hăn ndreh treng bâh Hà Nội tât Quảng Ngãi. Vơt Tổng Bí thư ta ga Quảng Ngãi, wa Phạm Đình Khôi n’hanh âk nuĭh dŭt rhơn.“Du hê đồng chí leo kan têh kơt nĕ ma hăn ndeh treng bâh Hà Nội tât. Rnôk an kao si an Tổng Bí thư n’hanh nhup ti, ut Bí thư gâp mô hôm geh saơ nău tâm ƀah đah nuĭh leo kan têh tay, ma lah nău rŏng đah đồng chí dêh rmên. Sĭt 3 nar dơm yơn wa hăn mbro. Lôch nĕ hăn Tây Trà, jur ta xã, mâp ƀon lan gay ma tâm ôp ngơi, pă ndơ jê̆ , yơn đah Tổng Bí thư, nău tâm rŏng mơ lah nău khlăy lơn".

Ndrel đah lam dak, nuĭh ƀon lan nkuăl Mỹ Xuyên, n’gor Sóc Trăng dŭt rngot rnôk tăng Tổng Bí thư Nguyễn Phú Trọng khĭt. Rgâl nău rngot jêng nău kan cách mạng, Đảng bộ, n’gâng kan ta ntŭk n’hanh nuĭh ƀon lan nkuăl Mỹ Xuyên tâm rnglăp tay, ngăch prăl, mĭn ƀư mhe, nsrôih dŭt n’hâm ndâk njêng Đảng bộ, ndâk njêng trong chính trị kloh uĕh, nâp nâl, ndâk njêng ƀon tơm nar lơ uĕh lăng kơt Tổng Bí thư ŭch mpŏng. Wa Lương Minh Quyết, tă ƀư Kruanh UBND nkuăl Mỹ Xuyên, nkoch tay, tă aơ bơi 10 năm. Tổng Bí thư Nguyễn Phú Trọng sĭt khâl pah kan đah xă Ngọc Tố (ngoăy tâm 3 xă thôn ƀon mhe bôk năp bah n’gor Sóc Trăng), rnôk dơi mâp đah Tổng Bí thư n’glơi an wa rup gui bah Tổng Bí thư tâm rnglăp, rah rơih. Wa Lương Minh Quyết nkoch:

Aƀaơ Wa lĕ roh, n’glơi an gâp kơt ăp nuĭh du nău rngot têh. Tâm nău rngot aơ, gâp mpŏng he rgâl nău rngot jêng nău kan cách mạng; tĭng cán bộ, đảng viên n’hanh nuĭh ƀon lan nsrôih nti tĭng nău rêh bah wa Tổng Bí thư Nguyễn Phú Trọng gay rgop ndâk njêng ƀon tơm nơm, neh dak nơm nar lơ ndrŏng uĕh, n’hanh nâp dăng.