Wa Rơ Châm H’Yeó, ta phường Pleiku, n’gor Gia Lai-tă ƀư Ủy viên Ban Thường vụ N’gor ủy, tă ƀư Kruanh Ủy ban MTTQ Việt Nam n’gor Gia Lai dŭt uănh nđôi ăp nău mbơh mpeh Đại hội đại biểu lam dak rơh tal 14 bah Đảng. Wa H’Yeó an gĭt, knơm nău rđău n’hanh uănh tât bah Đảng đah nkual rnoi mpôl đêt, nău rêh bah nuih ƀon lan ta Gia Lai lah êng n’hanh Tây Nguyên lah nsum lĕ dơi hao n’hanh rgâl ăp ntil.

Ƀon lan Tây Nguyên du nuih n’hâm tĭng Đảng, tĭng Wa Hồ. Mpŏng Đảng he uănh tât tay, nta nơih an Tây Nguyên hun hao wăng sa, văn hóa, ntĭm nti, đah trong ndâk njêng Tây Nguyên ndrŏng geh wăng sa, ndrŏng geh đah nău mĭn. Nĕ lah ăp nău khlay ngăn.

Đah trong uănh bah nuĭh âk năm râng trong nchrŏng n’hanh ntĭm rđău nău kơl rnoi mpôl đêt, wa Ksor Phước (ta Gia Lai)-tă ƀư Ủy viên Trung ương Đảng, tă ƀư Kruanh N’gâng kan, Chủ nhiệm Ủy ban Dân tộc bah Chính phủ-mĭn lah trong kan rnoi mpôl đêt n’hanh ăp nău kơl an nkual rnoi mpôl đêt lĕ dơi Đảng n’hanh Ngih dak mbơh ƀư na nao. Wa Ksor Phước nsing nơm năm kan mhe, Đảng n’hanh Ngih dak mbra uănh tât săk rnglăy ăp nău khlay văn hóa way ơm, ntŭk ntô bri dak, ndơ ơm yâu têh gay hun hao công nghiệp văn hóa, pâl nđaih nâp nâl, hăn ndrel hao jêng wăng sa đah mât mrăy nău uĕh.

Nkô̆ nău rnoi mpôl đêt lah nkô̆ nău ngăch ma ăp nuĭh rlăng mplư rlăm gay nsŭk nsôr, phah nău tâm rnglăp rnoi mpôl đêt. Uĕh ngăn lah an ndâk njêng uĕh ntrong leo ƀon lan mât rnă njrăng Neh dak, n’hao lam ƀon lan mât njrăng bri dak, nâp nâl njrăng n’gang bri dak rnă njrăng neh dak tâm trong kan hun hao wăng sa rêh jêng. Hun hao wăng sa gay n’hao mât njrăng bri dak-rnă njrăng n’hanh đăp mpăn rnă njrăng bri dak gay hun hao wăng sa. Aơ lah nău ŭch bah gâp têh ngăn đah năm kan tât bah Đảng đah lam dak, ngăn lah đah nkual rnoi mpôl đêt ta Việt Nam.

Ta nkual Tây Bắc, ƀon lan rnoi mpôl đêt dôl rƀŏng tât Đại hội đại biểu lam dak rơh tal 14 bah Đảng, njuăl âk mpŏng ŭch tâm trong mkra khlay bah Đảng tâm trong hun hao mhe. Wa Nguyễn Văn Độ, đảng viên ta ƀon Hưng Hà, xă Chiềng Khương, n’gor Sơn La mpŏng Đại hội 14 mbra n’gluh an tay ăp nău ntrŭnh, trong mkra geh nău têh, jŏ jong, tâm di đah nău ngăn bah nkual rnoi mpôl đêt, lơn lah hun hao wăng sa hăn ndrel n’hŭch ach o nâp nâl.

Mpôl hên mpŏng ŭch Đảng n’hanh Ngih dak nta an tay ƀon lan manh prăk pơk hvi lơn. Nkre ntrŭt nsôr ăp doanh nghiệp ntuh kơl nkret njêng jru đah lŏ mir ta nkual jru ngai, kơt nkret njêng mpeh tuch tăm, mât rong, tui ka gay nsĭt săk rnglăy wăng sa âk lơn an nuĭh ƀon lan.

Cán bộ, đảng viên n’hanh nuĭh ƀon lan xă Chiềng Khương, n’gor Sơn La nkoch nău mpŏng ŭch ăp bôk nău kan rƀŏng tĭng lam dak dơi mbơh ƀư tâm ban, săk rnglăy, ngăn lah bôk nău kan hun hao wăng sa-rêh jêng nkual ƀon lan rnoi mpôl đêt n’hanh nkual yôk, dơi uănh lah ntŭk nsing khlay kơl nuĭh ƀon lan geh tay prăk ntuh kơl nkra njêng, đăp mpăn nău rêh. Wa Đào Việt Phương, Groi Bí thư Rnâng kan Đảng ủy xă nkoch:

Mpôl hên nsing nơm n’hanh mpŏng kâp Đại hội 14 bah Đảng mbra n’gluh an tay âk nău ntrŭnh, nău kơl geh trong uănh têh, geh nuih n’hâm dăng an hun hao wăng sa-rêh jêng nâp nâl tâm lvang mhe. Nuĭh ƀon lan mpŏng dơi uănh tât lŏ mir; geh nău kơl ngăn ngên ntop kơl nkra njêng lŏ mir tĭng trong ndoh ndơ. Nkre mpŏng Đảng geh tay trong ƀư, nău kơl hun hao wăng sa-rêh jêng tâm di đah nkual n’har bri kơt hun hao wăng sa mpông n’har bri.