Bản Huổi Lẹ, xă Nậm Giôn, nkuăl Mường La n’gor Sơn La lah bản geh 100% rnoi nuĭh La Ha gŭ rêh. Nău uĕh bôk năp rnôk tât ta aơ trong chay têh uĕh, ăp chor jay nhih tâm srah đah uĕh nđĭr bah mir tơm sa play, ngih samƀŭt, ngih văn hóa dơi ndâk ƀư kloh uĕh nâp nâl. Ndrĭ yơn đêt nuĭh gĭt knŭng rlău 10 năm bah năp Huổi Lẹ hôm e lah ngoăy tâm âk bản 5 mô “mô geh điện, mô geh trong hăn, mô geh ngih sam ƀŭt, mô geh dak kloh uĕh n’hanh mô geh sóng điện thoại” nău rêh bah rnoi nuĭh La Ha ntŭk aơ wăr năm tĭng đah mir ba, trong tuch tăm, nkra njêng hôm e jêt chrai, yor rĭ geh rnôk lĕ bản mô dơi geh du rnăk rklaih ach o. Gay dơi geh nău rgâl kơt nar aơ lah lĕ du trong jong mpeh rnôk nsrôih bah gưl ủy, n’gâng kan ƀon lan, lah nău mât uănh bah Đảng n’hanh Ngih dak tă bah ăp nău kơl an ƀon lan rnoi đêt n’hanh khlay lơn lah ndrel soan du nuih n’hâm bah nuĭh ƀon lan. Wa Lò Văn Pau, Kruanh bản Huổi Lẹ, xă Mường Giôn, nkuăl Mường La, n’gor Sơn La nkoch:

“Tât rnôk aơ dŭt lah đăp mpăn hôm, geh trong hăn lĕ 4 yan yor geh trong chay tât bản, tât xă soih kloh, trong hăn tâm mir bah kônh wa dŭt uĕh. Trong ding dak bah năp geh yơn trôk nar pĭch rlâm, yơn Đảng Ngih dak uănh mĭn ntuh kơl tu trong dak mhe jêng aƀaơ dŭt đăp mpăn”.

   Ƀơn lan rnoi nuĭh La Ha ta bản Huổi Lọng, xă Nong Lay, nkuăl Thuận Châu, n’gor Sơn La.      

Đảng viên Lò Văn Phương năm aơ lĕ 60 năm, wa dơi gĭt tât mô knŭng nuĭh dơi nsing nơm bah bản ma hôm ntrong leo hăn lor tâm nău hun hao wăng sa, hao rklaih jŭt jăng ach o. Năm 2016, rnăk wa Phương n’hanh 60 rnăk bah bản Huổi Lẹ dơi ntop kơl ndrôk, bê ntil n’hanh tơm sa play tĭng bôk nău ntop kơl hun hao wăng sa rêh jêng ăp rnoi mpôl đêt đêt, lvang 2016-2025 bah Chính phủ, wa lĕ dăn râng jrô tiăr nti, jao an khoa học kỹ thuật, mât chăm tơm tăm mpa rong n’hanh dơi hăn uănh, nti nău blău ơm gay kơt tĭng an tuch tăm jêng lĕ nsĭt geh săk rnglăy wăng sa âk. Aƀaơ rnăk wâl wa Phương geh rlău 1ha tăm play rba, mât bơi 20 mlâm rpu, ndrôk n’hanh 30 mlâm bê nsĭt tay nău geh rlău 150 rkeh prăk du năm, wa lah du hê nuĭh La Ha ntoh lư bah n’gor Sơn La lap dơi dơn bằng khen bah Thủ tướng Chính phủ đah nău gĭt blău ndâk njêng tâm rnglăp rnoi mpôl n’hanh hun hao wăng sa rêh jêng nkual ƀon lan rnoi mpôl đêt. Wa Phương an gĭt:

Bah năp đaơ nău rêh bah kônh wa rnoi nuĭh La Ha gâp jêr jŏt ngăn, wăng sa dŭt âk tuch tăm êng, kơt lah lĕ rngôch ăp rnăk ach o da dê. Knơm Đảng, Ngih dak uănh mĭn ntop kơl tơm tăm mpa rong, ntĭm kônh wa trong ƀư sa, hun hao wăng sa jêng aƀaơ nău rêh bah rnăk wâl gâp kơt kônh wa bản Huổi Lẹ lĕ rgâl âk ntil, ăp jay geh ndeh măy tivi, kon se dơi hăn nti tŏng ăp, kônh wa nuĭh La Ha mpôl hên mbra tâm rnglăp ƀư tĭng di nău ntrŭnh, trong hăn bah Đảng, nsrôih ƀư sa, ndâk njêng nău rêh, ƀon tơm Nậm Giôn nar lơ hơm răm hun hao”.

Nkuăl Mường La geh 822 rnăk rnoi nuĭh La Ha gŭ rêh ta 18 bản bah 10 xă dŭt âk lah ăp nkual ngai nkuăl, rnoh rnăk ach o hôm e âk, nău uĕh rnoh nuĭh, nău uĕh rêh jêng hôm e đêt. Bah năm 2019 tât aƀaơ, nkuăl lĕ pă an tơm prăk rlău 18 rmen prăk gay ntop kơl nuĭh ƀon lan bản rwăt năp măy mŏk, ntop kơl 122 mlâm bê, 654 mlâm ndrôk an 776 rnăk nuĭh La Ha, ntop kơl nău rêh kơl kônh wa hun hao wăng sa đăp mpăn nău rêh. Nkre ƀư 3 jrô tiăr nti, ntop hao nău wât an 209 cán bộ rnoi mpôl đêt, rgop ƀư săk rnglăy trong kan rgŏ jă ta ntŭk. Wa Nguyễn Trọng Hiệp, Kruanh jrô kan rnoi mpôl đêt nkuăl Mường La an gĭt:

“Đah nuĭh ƀon lan ăp rnoi mpôl đêt ta nkuăl Mường La ri UBND n’gor Sơn La lĕ an nău ntrŭnh 2407 uănh an nău rgop an tâm nchră n’hanh hun hao wăng sa rêh jêng bah ƀon lan rnoi mpôl đêt La Ha. Aơ lah nău kơl êng n’hanh ntop kơl an ƀon lan rnoi mpôl đêt La Ha gay hun hao lĕ rngôch n’hanh n’hao prêh jâng nsan bah rnoi mpôl đêt, jŭt n’hŭch ach o n’hanh n’hao nău rêh drăp ndơ, jŭt jăng ach o du trong nâp nâl”.

          Tă bah ăp nău ntrŭnh, nău kơl lĕ rngôch, ntuh kơl tâm ban bah Đảng n’hanh Ngih dak, nău rêh bah rnoi nuĭh La Ha ta nkuăl Mường La dôl geh âk nău rgâl uĕh, rup ndah thôn ƀon mhe dôl rgâl âk ta ăp bản nkual prêh, kônh wa lĕ mbrơi mbrơi rgâl nău mĭn đah trong ƀư sa, hun hao wăng sa, nsum mpôl tâm rnglăp mât nâp n’hanh ƀư uĕh ăp nău khlay văn hóa way ơm, du nuih n’hâm nsing nơm tĭng Đảng, ndrel ty nsum đah gưl ủy n’gâng kan ƀon lan ƀư ndrŏng an ƀon tơm./.