Kêng măng 21/1, ta Davos (Thuỵ Sĩ), tâm rnôk rƀŭn WEF Davos năm 2025, Thủ tướng Phạm Minh Chính hŏ râng ndrel ntoh nau tâm nar tâm nchră “Rƀŏng tât rơh rƀŭn Kruanh n’gâng kan UNCTAD 15, đah nkô̆ “Nau ueh bah kan tăch rgâl ndrel Hun hao lam ntur neh tâm rach năm blau mhe”. Ntoh nau tâm nar ntơm, Tổng thư ký UNCTAD Rebeca Grynspan ntoh nau ŭch ngăn tât nau geh hun hao bah Việt Nam, geh 7% tâm 30 năm ma aơ. Tổng Thư ký UNCTAD lah rjăp rơh rƀŭn UNCTAD 16 geh ƀư tâm du neh dak hun hao dăng, pơk mpông, tâm rnglăp geh nau dơi kơt Việt Nam nkah nau khlay tâm rơh mhe UNCTAD.

Tâm rnôk tâm nchră, Thủ tướng Phạm Minh Chính kơp dơn ăp nau ƀư rnôk aơ ma nau tăch rgâl ndrel hun hao bah lam ntur neh, geh tât ăp ntil bah ăp nŭih ri ân geh ƀư tâm lam ƀon lan, ăp ntŭk ndrel lam ntur neh ri ma ăp dak ân n’hao nau tâm boh, rdâng nau ƀư êng ndrel ntrŭt dăng tâm boh tăch rgâl. Ngăn lah Chính phủ ân gĭt kloh “năm mhe blau mhe” du trong ngăn. Lah rjăp nuih n’hâm Việt Nam “ngơi ri ƀư nkre, hŏ ton lah ƀư”, Thủ tướng Phạm Minh Chính lah rjăp Việt Nam uănh khlay nau ƀư tơm rơh rƀŭn UNCTAD 16 gay vơt ăp nŭih ntoh măt bah prăm nkuăl neh./.