Ntơm bah ôi ơm, âk ngăn ƀon lan ntơm bah 11 thôn bah xã n’har bri Ia Đal rgum tâm ntŭk ƀư Bôk nau kan “Năm mhe Biên phòng duh răm nuih n’hâm ƀon lan”. Ta aơ kônh wa râng âk nau kan rhơn Tết, kơt tâm rlong nklâm bánh chưng, tâm rlong klŭp còn, tâm têk rse, tâm ntrôl mâng...Ăp rnăk geh nau jêr geh cán bộ tahen biên phòng mbơh tât “ntŭk tăch ndơ mô geh roh prăk” gay săch kho ao mhe, phe, dak ngi, dak măm, bột ngọt...Yuh Lục Thị Đương, tâm thôn 4, mbơh, 14 năm ntơm bah ƀon tơm Thanh Hoá tât Kon Tum ndâk nau kan, ăp rnôk Tết tât, yuh lŏ geh râng nau ƀư sa tết bah tahen Biên phòng:

            ‘Geh râng Tết năm mhe nkuăl n’har bri bah tahen biên phòng ƀư geh âk nau rhơn ngăn. Gâp dŭt ŭch ngăn yor Đồn Biên phòng kơl an ƀon lan, kơt lah kon sau hên ri geh Đồn Biên phòng kơl mât an”.

            Hôm nô Hà Văn Tình, nkoch:

            ‘Vơt tết Ất Tỵ 2025 geh Tahen Biên phòng n’gor Kon Tum ƀư Nar nklâm bánh ân kônh wa tâm nkual n’gar ri ri ma dŭt rhơn ngăn. Di rnôk aơ hên geh tâm n’ur đŏng. N’gâng kan rdau tahen Biên phòng n’gor Kon Tum hŏ pă nklâm ndơ geh nau khlay tât kônh wa ƀon lan. Ăp rnăk ƀonlan rhơn ngăn”.

            Di rnôk tết vay ơm bah rnoi mpôl, năm aơ, xã n’har bri Ia Đal, nkuăl Ia H’Drai geh N’gâng kan rđau kan tahen Biên phòng n’gor Kon Tum săch ƀư leo tỏng bah n’gor Bôk nau kan “Năm mhe Biên phòng duh răm nuih n’hâm ƀon lan” ndrel ma “Nar hội bánh chưng xanh’. Tâm bôk nau kan, rmôt biên phòng ndrel n’gâng kan hŏ pă 400 cờ Tổ quốc, rlau 250 nklâm ndơ, 400 mlâm bánh chưng.

Pă prăk ân 9 kon se tâm Bôk nau kan “N’hao nhoat jâng oh hăn nti” nau kan “Kon rong đồn Biên phòng” pă ndôl me ân 2 rnăk ach o gay hun hao...rnoh dĭng lĕ rlau 350 rkeh. Thiếu tá Nguyễn Văn Đại, Chính trị viên Đồn Biên phòng Ia Đal, mbơh, aơ lah nau kơl an bah cán bộ, tahen Biên phòng đah bon lan nkual n’har bri lah tết tât:

            ‘Bah nau kan aơ đăp mpăn nau tâm rnglăp tâm dăch ngăn đah tahen ndrel ƀon lan tâm nkuăl n’har bri. Bah aơ kŏ mhâm ƀư gay nơm mât nau ơm khlay ueh lăng ndrel rgŏ kă nau kan gay ndrel ma tahen biên phòng mât nâp nau ƀư tơm bah neh dak, nkuăl neh nơm”.

            Ƀư tĭng bôk nau kan “mô ân nŭih geh nchlơi êng ba kơi”, đăp mpăn ăp rnăk, ăp ngih tâm nkuăl n’har bri kŏ geh tŏng dơi nau rhơn năm mhe, vơt tết, ntơm lơ 19-25/1, tahen biên phòng n’gor Kon Tum ƀư âk Bôk nau kan “Năm mhe nkuăl n’har bri, duh răm nuih n’hâm ƀon lan’ ndrel “Nar hội bánh chưng xanh” tâm 12 xã êp nkuăl n’har bri tâm dăch ma dak Lào ndrel Campuchia. Dơi gĭt, rnoh ndoh ndơ ndrel nau kan mât chăm ân Tết năm mhe Ất Tỵ 2025 đah ƀon lan 13 xã n’har bri bah n’gor Kon Tum lah rlau du rmen prăk./.