Dăch kêng Tết Nguyên đán Ất Tỵ 2025, nô nău rvăt n’glăp hôch pháo rlău trong n’har bri ta nkuâl Đức Cơ (Gia Lai) krit hô. Ăp mpôl kan dơi kan ta ntŭk dôl kan nsum lhăt nking nchăng ngăch nău tih pháp luật ta n’har bri.

Lôch rnôk an luh kan lơh mbram nuĭh tih tâm rnôk Tết 2025, mpôl kan dơi kan ta nkuâl Đức Cơ, n’gor Gia Lai hŏ ban saơ 2 tơ̆, nhŭp kân 4 nuĭh rdeng 220kg pháo ntŭng lăp hôch. Trung tá Nguyễn Lê Hồ Tân Ảnh, Kruanh rmôt Cảnh sát ôp uănh nuĭh tih mpeh nhŭp kân nuĭh – wăng sa - Ma túy (Công an nkuâl Đức Cơ) an gĭt:

“Lơn âk lah pháo rvăt n’glăp bah Campuchia tât Việt Nam. Mpôl rvăt n’glăp ntŭng hôch way dŏng ăp ndơ pơk lăp mạng xã hội gay tâm ôp joi tăch rgâl. Ăp nuĭh tih way tâl mpôn pháo tâm ăp ƀao mô lah tâm ăp ndeh ô tô jê̆, ndeh rdeng năch, mpôn nâm ndeh gay ma rdeng. Lơn âk lah tơm nău lư bah ƀon lan mbơh lah dŭt di ngăn. Kan nsum đah ăp n’gâng kan, nsum mpôl, tahen n’har bri, mpông n’har bri gay rƀah gĭt nău lư ăp nuĭh geh mpơl nchuăn rdeng, tăch rvăt, mât prăp pháo rtoh gay lơh chrai, nhŭp kân”

    Ta lam nkual n’har bri Gia Lai, ăp mpôl kan dơi kan dôl kan nsum lhăt mât đăp mpăn lam rêh jêng kon nuĭh, nking nchăng ăp nău tih pháp luật. Đại tá Nguyễn Văn Nghị, Groi Chính ủy Bộ Chỉ huy Tahen n’har bri n’gor Gia Lai, an gĭt, mpôl tahen n’har bri ndrel đah công an ăp nkuâl n’har bri Đức Cơ, Chư Prông, Ia Grai, hŏ nhŭp kân rlău 1.000kg pháo ntŭng hôch:

          “Tâm ăp năm rlău aơ, nkual n’har bri bah n’gor Gia Lai geh nău kan tăch ntŭng hôch pháo rtoh, tâm ăp khay dăch kêng tết, Tahen n’har bri Gia Lai hŏ an ƀư trong nchrăp nking nchăng, njrăng n’gang ăp nău kan tăch rgâl ntung hôch, mplư rlăm. Tâm bah ri aơ nơh dơi ƀon lan ntop kơl jêng đơn vị hŏ nhŭp geh du đêt nuĭh tăch ntŭng hôch pháo rtoh. Mpôl hên nking nchăng ăp nău kan dja gay nkual n’har bri bah n’gor Gia Lai đăp mpăn.”./.