Lơ 14/8/2014, tâm rơh pah kan ta nkual ƀon têh Cần Thơ, Tổng Bí thư Nguyễn Phú Trọng ndrel mpôl pah kan Trung ương lĕ an mông nar hăn khâl, pah kan đah Đảng ủy, Bộ Tư lệnh Quân khu 9. Mĭn lah ntŭk gŭ bah Quân khu lah du ntŭk njrăng rdâng tâm lơh dŭt khlay, Tổng Bí thư đă tâm nu nău mhe geh nu nău ngăch, jêr jŏt, jêr njrăng, Quân khu 9 an nchrăp lor gĭt nău mbơh, gĭt nu nău, mô an tât ndal, nchrăp rdâng lơh, rhŏ an tâm lơh tâm ăp ntil nău; mât njrăng nâp nâl nkual trôk, gôl dak, ƀư tơm Neh dak. ƀư tĭng ntĭm rđău bah Tổng Bí thư Nguyễn Phú Trọng, ăp năm bah năp, cán bộ, tahen Lực lượng vũ trang Quân khu 9 mât uĕh nuih n’hâm tâm rnglăp têh; mbơh ƀư tâm ban, săk rnglăy ăp trong ndâk njêng Đảng bộ Quân khu nâp dăng mpeh chính trị, nău mĭn, nău rêh, rmôt kan n’hanh cán bộ.

 Hôm nha rêh, ta âk nău pah kan bah nơm, Tổng Bí thư Nguyễn Phú Trọng way geh ntêm âk nău rŏng n’hanh nău mât uănh na nê̆ đah cán bộ, tahen Hải quân Nhân dân Việt Nam lah nsum n’hanh tahen Trường Sa lah êng. Ta rơh tâm ngơi bâh Tổng Bí thư ta rơh pah kan bâh wa sĭt ta nkual 4 Hải quân ta lơ 5/5/2016, Tổng Bí thư lĕ ôp nău rêh nău kan bâh cán bộ, tahen n’hanh ƀon lan ta nkuăl gôl dak Trường Sa, mbơh tơih n’hao mpư nuih n’hâm hên tâm rnglăp, nsrôih rlet nău jêr jŏt gay ma ƀư lôch nău kan ma Đảng, ngih dak pă jao. Tổng Bí thư knơm ta nău dơi kan chính trị, nău dơi tâm lơh, mbra ŭch nklơi săk nơm bâh cán bộ, tahen Hải quân lah nsum n’hanh cán bộ , tahen nkual 4 lah êng tâm nău kan mât nău ƀư tơm dak lêng, gôl dak bâh neh dak. Thượng Tá Nguyễn Văn Khương, Chính trị viên gôl dak Song Tử Tây way kahgĭt nău ngơi ntoh lư bâh Tổng Bí thư Nguyễn Phú Trọng. “Nău rêh ueh mơ lah nău khlăy ngăn ngên”.

“Tổng bí thư Nguyễn Phú Trọng lah nuĭh hăn leo lor bôk năp mpeh nău rêh, nău mĭn lý luận, mpeh trong pah kan yơn nău ma gâp dŭt kahgĭt n’hanh dŭt ryơk ngăn nĕ lah ăp nău ntoh ngơi bâh Tổng Bí thư ta rơh rƀŭn nchră lam dak ăp ntŭk kan Nội chính mbơh tơih ƀư tĭng Nghị quyết 13 bâh Đảng lơ 15/9/2021. Nĕ lah: “Nău rêh kon nuĭh kanŭng rêh du tơ̆ dơm, mhâm rêh an ueh, an tâm di, gay ma mô geh nău vơl vơh đah ăp nău kan mô di, mô ueh, kan tih. Prăk kaih drăp ndơ âk ir ndơ ƀư, tât khĭt mô dơi njôt leo. Nău rêh ueh mơ lah nău khlăy ngăn ngên”.

Tâm rơh tât khâl, pah kan ta n’gor Kon Tum tâm khay 4/2011, Tổng Bí thư, Kruanh Quốc hội Nguyễn Phú Trọng an mông nar tât khâl kônh wa rnoi mpôl đêt Ba Na ta ƀon Đăk Mút, xă Đăk Mar, nkuăl Đăk Hà. Ta aơ Tổng Bí thư mĭn joi mpeh nău rêh, djăt nău ŭch, nău ŭch n’hanh ntĭnh ntăn nuĭh ƀon lan mât uĕh nuih n’hâm tâm rnglăp, mĭn ƀư mhe tâm pah kan jan sa. Knơm nău ntĭnh ntăn bah Tổng Bí thư, 13 năm, 148 rnăk ƀon Đăk Mút lĕ rlet rlău âk jêr jŏt gay hun hao nkra njêng, rgâl nău rêh n’hanh ndâk njêng lôch uĕh ƀon lan mhe. Nô A Nguyên, Groi Bí thư Đoàn Đăk Mar, nkre ƀư Kruanh thôn Đăk Mút, mĭn lah:

Djôt dơn nău Wa Trọng ntĭnh săk gâp lĕ rgâl nău mĭn, trong ƀư. Đah ăp trong gâp lĕ ndâk njêng Câu lạc bộ Druh ndăm tôn giáo hun hao wăng sa gay bah nĕ druh ndăm dơi ƀư tơm săk nơm, ƀư tơm wăng sa. Aƀaơ, Câu lạc bộ lĕ geh rlău 15 nuĭh tâm rgop geh druh ndăm gay hun hao wăng sa jêh nĕ râng tâm Đoàn, Hôi.