Nar aơ (25/7), Ban Chấp hành Trung ương Đảng Cộng sản Việt Nam, Quốc hội dak Cộng hoà Xã hội Chủ nghĩa Việt Nam, Kruanh dak Cộng hoà Xã hội Chủ nghĩa Việt Nam, Chính phủ dak Cộng hoà Xã hội Chủ nghĩa Việt Nam, Uỷ ban Trung ương Mặt trận Tổ quốc Việt Nam n’hanh rnăk wâl ƀư rgum lam weh ntĭnh njăt Tổng Bí thư Ban Chấp hành Trung ương Đảng, Bí thư Quân uỷ Trung ương Nguyễn Phú Trọng.

Ntĭnh njăt Tổng Bí thư Nguyễn Phú Trọng dơi ƀư đah nar wer lam dak. Mpôl mât ƀư njor khĭt n’gâng kan bah lơ lah 35 nuĭh tă bah Kruanh dak Tô Lâm ƀư Kruanh mpôl. Mpôl ntơh măt mât ƀư njor khĭt n’gâng kan ăp n’gor bah dâng lah 27 nuĭh, tă bah Ủy viên Bộ Chính trị, Rnâng kan Ban Bí thư Lương Cường ƀư Kruanh Ban. Ntĭnh njăt Tổng Bí thư Nguyễn Phú Trọng dơi ƀư ta Jay njor khĭt gưl neh dak mbrô 5 Trần Thánh Tông, nkual ƀon têh Hà Nội, ntơm bah 7h ôi tât 10h măng nar 25/7/2024 n’hanh bah 7h ôi tât 1h kêng măng nar 26/7/2024.

Weh ntĭnh njăt Tổng Bí thư Nguyễn Phú Trọng dơi ƀư ndrel mông dja ta Hội trường Thống Nhất, Nkual ƀon têh Hồ Chí Minh n’hanh ta ƀon tơm xã Đông Hội, nkuâl Đông Anh, nkual ƀon têh Hà Nội. Tĭng nău mbơh ngăn, Ban Tổ chức Lễ tang mbra nta trong dơh, dăp rgum an ƀon lan lăp weh ntĭnh njăt Tổng Bí thư Nguyễn Phú Trọng. Rnôk hăn weh njăt, nuĭh ƀon lan ndjôt nkre thẻ căn cước công dân ntrŭp chip điện tử mô lah điện thoại pơk VNeID pơk rnoh 2 gay quét mã QR. Công an nkual ƀon têh Hà Nội hŏ tâm pă ndơ ntrŭp dŏng khlay ta ăp ntŭk n’gân máy quét mã QR gay rhŏ dŏng ƀon lan ƀư quét mã dơh ngăch rnôk hăn weh ntĭnh njăt Tổng Bí thư Nguyễn Phú Trọng.

Rnăk Tổng Bí thư Nguyễn Phú Trọng lah uĕh ƀon lan, ndrăng băl lam dak n’hanh băl mpôl dak bah dih hŏ njuăl nău rngot klâng Tổng Bí thư Nguyễn Phú Trọng roh. Radio nău ngơi Việt Nam (VOV) pơk sŏng dăng weh njăt ntĭnh Tổng Bí thư Nguyễn Phú Trọng n’hanh nău nkoch mha êng "Tổng Bí thư Nguyễn Phú Trọng: Nuĭh bah ƀon lan, Nuĭh bah lịch sử" ntơm bah 6h50 mnĭt tât 9h15 mnĭt nar 25/7/2024 ta ăp mbrô pơk ƀoh nău ngơi VOV1, VOV2, VOV3; pơk ƀoh rup sŏng dăng ta ăp mbrô pơk ƀoh rup VTC1, VOVTV; pơk online ta Báo Điện tử VOV, VTC News n’hanh ăp mbrô pơk ƀoh ta mạng xã hội.