Đah 135 rnăk, rnoi Jeh Triêng, tâm thôn Dục Nhầy 1, xã Đăk Dục, nkuăl Ngọc Hồi, n’gor Kon Tum, ri ăp cán bộ, tahen Đồn Biên phòng Dục Nông kơt lah băl mpôl nơm. Nô A Luật nkoch: Nŭih ƀon lan ŭch ngăn ma ăp cán bộ, tahen biên phòng:

“Đồn Biên phòng kơl an ăp rnăk vâl, rnăk jêr jŏt. Kơl an, jêh nê ndơn kon se mô lap gay ma rong đŏng. Mro kơl an tât kônh wa ƀon lan tâm xã Đăk Dục. Gâp saơ, ăp tahen biên phòng ta aơ tâm dăch dơh ngăn, gơih nau kan, ueh đŏng”.

3 năm rlau aơ, Rnâng kan rđau kan tahen Biên phòng Dục Nông đă Thiếu tá Dương Văn Lương rƀŭn Chi bộ thôn, ƀư ueh nuih n’hâm, nau kan bah tahen Biên phòng ma Đảng, ma ƀon lan. Wa Xiêng Thị Tuý, Bí thư Chi bộ, Kruanh Thôn Dục Nhầy 1 mbơh, Thiếu tá Dương Văn Lương hŏ mbơh kơl an ân Chi bộ ăp nau ntrŭnh, njêng nau ueh tâm nau ndâk njêng Đảng ndrel n’hao nau rêh ân ƀon lan. Ntơm bah bôk năm kan tât rnôk aơ, Chi bộ Thôn Dục Nhầy 1 rnglăp geh 2 đảng viên mhe, n’hao rnoh nŭih đảng viên tâm Chi bộ hao 19 nŭih, huch rnoh rnăk tâm thôn hôm 6 rnăk:

‘Đồng chí Dương Văn Lương râng ueh ngăn tâm nau rgop nau gay ndâk nkra, kơl an Chi bộ ndâk njêng nau nchrăp jêh ri nau ntrŭnh bah Chi bộ ndrel nkô̆ nau rƀŭn rgum geh âk ntil, rgum nau ŭch bah đảng viên. Êng nau kan nê ri đồng chí Dương kŏ gơih ngăn nau kơl an kônh wa, tahen ƀon lan kŏ tâm rgop âk đŏng. Ntơm rnôk geh tahen n’hao kan tâm Chi bộ ri Thôn kŏ geh dơi kloh, nâp, jêh ri mô geh rnăk vâl tih pháp luật”.

Ƀư rjăp lơn tay nau tâm boh tahen ƀon lan, ndâk “nuih n’hâm ƀon lan” nâp, ntơm năm 2020 tât rnôk aơ, N’gâng kan rđau tahen Biên phòng n’gor Kon Tum rgum tahen, quân nhân chuyên nghiệp tâm ăp Đồn Biên phòng kơl an 13/13 xã tâm dăch ma dak Lào ndrel Campuchia. Tâm nê, geh 4 cán bộ Đồn geh râng gưl uỷ 4 nkuăl, 13 cán bộ râng gưl uỷ 13 xã n’har bri; 17 nŭih cán bộ geh lăp HĐND ăp gưl n’gor, nkuăl, xã.     

Trung tá A Ngọc Chiến, Đồn Biên phòng Dak Nông geh N’gâng kan rđau tahen Biên phòng n’gor Kon Tum đă, n’hao nau mât ƀư Groi Bí thư Đảng uỷ, Kruanh Uỷ ban mêt uănh xã n’har bri Đăk Nhong, nkuăl Đăk Glei, n’gor Kon Tum mbơh, ndrel ma gưl uỷ xã ƀư nâp, ndâk Đảng bộ nâp, nô mro rvê nau kơl an ƀon lan jut lơn nau rluk mâl ơm ndrel rgâl nau rêh ân ueh lơn:

“Gâp kơl mbơh nau ân Đảng uỷ ngluh nau ntrŭnh rđau ndrel đă UBND, MTTQ ndrel ăp ntŭk kan chính trị rêh jêng rgum nuih n’hâm lăp ƀư nau râng ndrel rđau nchră nau kan ăp nau ƀư hun hao văng sa, ngăn lah nau ƀư jut n’huch ach o gay ma ân kônh wa ƀon lan rnoi mpôl đê̆ rklaih ach o nâp nâl. Đah ma du xã n’har bri, nkuăl bri njrăng rdâng, hên năl lah tăm tơm dak si bôk năp lah sâm Ngọc Linh, tal 2 lah hên mra tăm sêt Linh chi gay ma njêng nau hun hao văng sa”.

Tâm ăp năm rlau aơ, đah nuih n’hâm “Đồn lah ngih, nkuăl n’har bri lah ƀon tơm, kônh wa ăp rnoi lah oh nô ndul deh”, rmôt tahen Biên phòng n’gor Kon Tum geh âk nau kan ngăn, n’hêl bư rjăp nuih n’hâm ƀon lan nkuăl n’har bri. Ngăn lah kơt nau kan, “Ndâk thôn Đăk Ga, xã Đăk Nhong nkuăl Đăk Glei hơm răm, nâp nâl, đăp mpăn”, ăp nau kan ƀon lan, kơt: thuỷ điện jê̆ Đăk Giao/Đăk Long; dak dŏng hoch êng Bờ Y, Đăk Long, Đăk Blô; nau kan kơl an, tâm rnglăp ma ăp rnăk geh nau rêh jêr jŏt kơl an rklaih ach o, kơl an 74 kon se tâm nau kan “N’hao nhoat jâng oh hăn nti”; 15 mom geh tahen Biên phòng mât kơl an...

Ntơm bah nau hăn ndrel, kơl an bah ăp cán bộ, tahen biên phòng, tât rnôk aơ geh rlau 7 tâm 13 xã n’har bri bah n’gor Kon Tum geh dơi ƀon lan mhe. Ndrel ma nê lah nau rêh bah kônh wa ƀon lan tâm nkuăl n’har bri bah n’gor Kon Tum dôl ma nar lơn ueh, “nuih n’hâm ƀon lan’ nâp nâl tay./.