Nar dŭt pơh, đảng viên Y Bleng, rnoi Bunong, tahen ơm ndrel lah bu ranh ƀon 9, xã Dak Drô, nkuăl Krông Nô lŏ ndrel ma rmôt mât njrăng tât khâl ăp rnăk ach o bah ƀon. Bah nê, wa ndrel ma ăp nŭih nkoch mbơh, bonh đă ăp rnăk nsôih pah kan jan sa, rgâl nau mĭn nau kan. Bu rang Y Bleng mbơh, tâm ƀon lah 5 đảng viên, 5 rnăk geh oi mra kơl du rnăk ach o. Khân păng kơl an ntơm bah kon ntil tăm, mpa rong, nau kan tât nau leo tăch ndơ. Ăp rnăk geh ntĭm nti nau kan nkre geh nau nsôih mpeh prăk kăk, nkre geh nsôih nuih n’hâm. Nkô̆ nau bah ƀon lah jêh 3 năm mra kơl rklaih rnăk ach o ân nâp. Wa Y Bleng, ngơi:

‘Oh nô lah nơm tâm bonh, bonh đă ƀon lan ân tâm rnglăp, hun hao văng sa. Mô di lah tahen ơm lah du hê nơm ôh, tahen ơm lah nơm ân bonh đă kônh wa, kŏ hăn uănh bu, mro kơt nê. Ntă ngih hom jêr jŏt nơm ân rgum bonh đă, oh nô ndrŏng geh drăp ndơ ri nơm kŏ kơl rnăk nê đŏng”.

Lơ 23/3 aơ, n’gor Dak Nông nkah 20 năm ndâk, kŏ lah nar nkah 49 năm rklaih Gia Nghĩa, n’gor Quảng Đức (ơm). Râng saơ nau rgâl ăp ntil bah ƀon lan, bah nkual ƀon têh Gia Nghĩa, đảng viên, bu ranh Điểu Đi, ƀon Bu Prăng 2 nkah ăp nar kăl e, hao yôk, jur bru, tâm mbơh nau ma cách mạng tâm nkuăl n’har bri Quảng Trực, Tuy Đức. Wa nkoch, rnôk tâm lơh geh klŭp ƀom, geh lơh, yơn kônh wa hôm mât ƀon lan, du nuih n’hâm tĭng Đảng, tĭng cách mạng. Neh dak đăp mpăn, nau rêh kônh wa hơm răm, nkual n’har bri rgâl ăp nar, wa Điểu Đi lơn ma rnơm tâm nau rđau kan bah Đảng:

‘Rnôk tâm lơh ri ndrel ma cách mạng tâm lơh gay ma mât nkual neh aơ. Lôch rklaih ri rgum pah kan jan sa, ndâk ƀon lan. Đah nau kan lah đảng viên, nŭih bu rnơm ri hên kŏ bonh đă kônh wa ƀư uh nuih n’hâm, nsôih pah kan jan sa, hun hao nau rêh ndrel mât nkuăl n’har bri”

Rhơn geh rêh tâm ƀon tơm Dak Nia (nkuăl ƀon têh Gia Nghĩa) ntŭk geh ntŭk nkah neh dak ueh, ntŭk năm 1960 Đoàn B90 tâm mpeh ba lơ ndrel rmôt C200 tâm mpeh ba dâng tâm mâp, nkra trong Hồ Chí Minh, wa K’Sung, Groi Bí thư chi bộ, Kruanh ƀon Ting Wel Đơm, rhơn rnôk nau rêh lơn ma hun hao:

‘Tâm rnôk tâm lơh, đah ma kônh wa rnoi mpôl đê̆ ta ntŭk ta aơ mro rnơm tâm Đảng. Ân tât rnôk aơ, kônh wa mro rnơm tâm ntrong kan bah Đảng, pháp luật bah Ngih dak, mro mât gay đăp mpăn rnôk aơ ndrel mro mrăng geh tâm rnglăp gay ndâk njêng văng sa hun hao, nau rêh geh n’hao, hun hao gay ƀon lan sâm geh, dak dăng”.

Ƀư ueh nau kan bah ăp đảng viên, nŭih bu rnơm tâm ăp rnoi, rlau 20 năm ndâk mhe (nkhah bah n’gor Dak Lak ơm), n’gor Dak Nông mro mât đăp mpăn chính trị, hun hao rjăp văng sa rêh jêng. Năm 2020, Dak Nông hŏ rklaih ach o bah n’gor, ndrel dôl nsôih jêng geh dơi bah nkuăl Tây Nguyên.

Bah năp nau tât mhe, năm 2013, n’gor uỷ Dak Nông ntrŭnh bôk nau kan 05 mpeh ndâk nau kan cán bộ tơm tâm nkuăl rnoi mpôl đê̆. Tât rnôk aơ, rmôt aơ geh bơi tât 500 nŭih, geh nchrăp nau gĭt tât Đảng, pháp luật bah Ngih dak, nau blau bonh đă ƀon lan tâm rnôk mhe. Bah nê, nchrăp, nsôih ƀư ueh nau gĭt nau mĭn, nau ŭch bah kônh wa, nkoch ăp nau kan mô ueh bah nkual gay geh rklaih. Kŏ rnơm nau bonh đă bah khân păng kơl an ƀon lan n’hao nau nkah, nsôih, lơh, rdâng ăp nau nsŭk rlăm, ndăn dŏng bah phung mhĭk, tâm nau kan tĭng chroh rƀŭn. Âk nau tâm rkeh, ăp nŭih aơ hŏ geh nsôih râng hăn rklaih tă bah tâm dâng. Nkre, ăp nŭih aơ râng ƀư ndâk nau tâm rlong rŏng dak, ăp nau bonh đă bah nkuăl kơt lam ƀon lan tâm rnglăp ndâk njêng ƀon lan mhe, n’huch ach o nâp nâl.

Wa Hồ văn Mười, Groi Bí thư N’gor uỷ, Kruanh UBND n’gor Dak Nông lah rjăp, bư ueh nau kan bah ăp nŭih đảng viên, nŭih bu rnơm tâm nkuăl rnoi mpôl đê̆ lah nau kan khlay bah ăp gưl, ăp ntŭk kan gay ngor hun hao:

‘Ăp gưl kan, n’gâng kan bah nkuăl nsôih nchrăp ƀư ăp nau kan gay ƀư ueh nau dơi bah nŭih bu rnơm, rmôt kan tơm lor, lŏ ndâk, ƀư nâp, rjăp ăp rmôt nŭih bu rnơm tâm nkuăl rnoi mpôl đê̆, lŏ ndâk ndrel pơk hvi ăp nŭih ntoh lư, leo trong tâm ăp nau kan gay rgop nau hun hao văng sa, rêh jêng, đăp mpăn neh dak tâm nkuăl rgop nau ndâk ƀon lan Dak Nông nar lơn têh ndrŏng ueh”.

Uănh nchră tâm di nau dơi bah nŭih bu rnơm tâm ƀon lan rnoi mpôl đê̆, geh nau kan, nau kơl tâm di gay dơi hun hao ngăn nau doi ‘ăp nŭih leo trong tơm bah ƀon lan” hŏ rgop nau kơl an n’gor Dak Nông mât nâp đăp mpăn chính trị, geh dơi ăp nau dơi khlay tâm hun hao văng sa rêh jêng./.