Rƀah tĭng trong rƀŏng rơh Cách mạng công nghiệp 4.0, ăp gưl Hội bu ur n’gor Dak  Lak dôl nsrôih rgâl mbrô, dŏng công nghệ thông tin tâm rđău đă, ƀĭt juet, an ƀư pah kan hội. Ntơm bah nê rgop  n’hao nău dơi tam kan Hội, tŏng đah nău ŭch geh tĭng ƀư nău kan tâm nô nău mhe.

Bar năm rlơ̆ aơ, nău tăch rgâl ndrănh yăng Rđe bah yuh H’Trang Niê, ta buôn Kna A, xã Cư Mgar, nkuâl Cư Mgar, n’gor Dak Lak pơk hvi, rnoh âk ndơ tăch luh ăp nar lơn ma âk. Tĭng yuh H’Trang, nơm geh dŏng trang mạng xã hội kơt Zalo, Facebook, râng ăp rmôt tăch rgâl…kơl yuh tât đah năch joi rvăt dơh lơn rđĭl đah ƀư tăch ndơ way ơm. Ndrel đah nê, yuh hôm dơi Hội bu ur ta ntŭk nkoch n’hơ râng câu lạc bộ bu ur ntơm njêng nău kan mô lah ăp rơh kơi năp nti pơk sŏng dăng bah ngai. Đah du mblâm điện thoại geh nthoi ƀoh Internet, yuh mbra dơi râng kơi năp nti ta jay nơm dĭl. Tĭng yuh H’Trang, ntơm bah nar râng rmôt, yuh rƀah gĭt ăp tŏng n’hanh ngăch nkô̆ ăp nău kan tă bah Hội bu ur bah lơ njŭr an tâm dâng ƀư, nău tâm ôp nău lư dŭt dơh ngăch.

"Gâp ŭch dơi kơt nti n’hanh tâm nđŭr đah ăp oh yuh tâm nar, gĭt âk lơn mpeh nău  kan wăng sa, tăch rgâl, tâm nkoch mpeh trong tâm lăp nsum đah rnăk wâl n’hanh nău kan bah dih".

        Mô  dơn oh yuh hội viên ma rmôt cán bộ hội dŭt dơh rnôk dŏng mạng xã hội gay an ƀư nău kan đŏng. Yuh Nguyễn Thị Thanh Nga, Chi hội trưởng Chi hội bu ur thôn Đoàn Kết, xã Ea Mdroh, nkuâl Cư Mgar an gĭt. Rgâl bah hôm hăn mbơh na nê̆ tât tĭng nuĭh ri aƀaơ,  djăt ma lât  ta điện thoại lah ăp oh yuh tâm chi hội gĭt lĕ nău lư n’hanh ngăch plơng ơh nău, an ƀư.

"Aƀaơ geh nău lư Zalo ri gưl bah lơ jao nău kan mpeh ăp siƀŭt, njuăl mbơh mô lah  hăn pah kan ri lah he mbra dơi chŭp n’hanh pơk luh ta trang he nơm gay njuăl ngăch tât ăp oh yuh dĭl, oh yuh tâm nchră. N’hanh tât rnôk hao rơh  hop ri ân hao ngăch, rhuăt glêh mông nar, bah ir roh mông nar bah oh yuh”.

          Dŏng công nghệ thông tin hôm mpơl  ta nău ăp gưl hội bu ur n’gor Dak  Lak hŏ n’glăp dŏng phần mềm mât bôk kan cán bộ, hội viên tă bah Trung ương Hội an ƀư ntơm bah năm 2021. Yuh Ngô Thị Kim Long, Groi kruanh Hội Liên hiệp bu ur xã Cư Dliê Mnông, nkuâl Cư Mgar an gĭt, phần mềm dja kơl yuh dơh tĭng groi nđôi, mât kan bah rlău 1.700 hội viên tâm dâng ma mô kâp roh âk mông nar mât prăp, tâm rđĭl ma siƀŭt nchih ma săk.

          "Gâp hŏ dơi Hội Liên hiệp bu ur nkuâl ntĭm nti dŏng trong lăp ntŭk mât prăp nău lư hội viên, rnoh nchih ăp ntŭk ntĭt leo, trong kan, ăp  bôk nău kan ntop kơl hội viên. Gâp saơ dŭt dơh yor phần mềm dja rgum dơi âk nkô̆ tâm trong tĭng ƀư nău dơn kan nsum pah kan hội n’hanh trong leo bu ur, dŭt kloh rvah, na nê̆”.

          Nghị quyết đại hội tâl 18, năm kan 2021 - 2026 bah Hội Liên hiệp bu ur n’gor Dak Lak ntrŏng: Dŏng công nghệ thông tin tâm nău kan Hội lah 1  tâm 2 rêng kan đăt ndal tâm pah kan hội n’hanh trong leo kan bu ur. Tĭng nê, ăp năm Hội ƀư  ăp rơh tâm nchră, pơk jrô kơi năp nti an cán bộ hội, năp nău gĭt blău dŏng công nghệ mbrô ntơm njêng nău kan, ƀư njêng, tăch rgâl an hội viên bu ur. Wa Tô Thị Tâm, Kruanh Hội Liên hiệp bu ur n’gor Dak Lak, an gĭt: năm aơ đah nkô̆ N’hao âk dŏng công nghệ thông tin tâm nău kan Hội, ăp gưl Hội mbra rgŏ jă hội viên nsrôih râng tâm ăp rơh tâm rlong dŏng công nghệ thông tin. Nkre nsŏng kơl, dăn đă rvăt năp ăp tŏng máy tính pah kan an Hội bu ur tâm dâng n’hanh ƀư n’hao nău dơi kan mbrô an hội viên.

"Mpôl hên hŏ rgŏ jă  geh rlău 30 máy tính hôm. Tâm let năp tay mpôl hên rgŏ jă tay gay lĕ rngôch ăp ntŭk kan hội geh máy tính gay kan da dê. Lĕ rngôch cán bộ Hội n’hanh hội viên bu ur gĭt dŏng công nghệ thông tin, gĭt tât công nghệ thông tin tâm trong rƀŏng rơh 4.0 aƀaơ".

        Dŏng công nghệ thông tin hŏ rgop njêng luh nău rgâl  dăng  tâm  ăp nău kan bah ăp gưl Hội bu ur ta Dak  Lak. Ntơm bah nê n’hao nău dơi tam kan, ntrŭt ntrôl ăp oh yuh bu ur ngăch gĭt tât đah công nghệ mbrô, nsrôih râng tâm bôk nău kan rgâl mbrô gưl neh dak./.