Ăp tŏ rnôk nchrăp ân nau ƀư rgum rƀŭn dăch, ngai, rmôt tur chĭng ƀon Njrang Lu, xã Dak Ndung, nkuăl Dak Song, n’gor Dak Nông rgum tâm ngih rƀŭn nsum gay ma ntĭm nti, tĭng nau rđau bah wa Thị Nhum.

Rlau 10 năm aơ, wa Thị Nhum tâm rgop nsum ma ngih săm ƀŭt Trung học Phổ thông dân tộc nội trú Dak Song gay ma ntĭm nau tur chĭng ân kon se nti rnoi Bunong. Ăp rnôk ntĭm, mô knŭng ntĭm blau tur chĭng, mprơ ndrel njroh, wa Thị Nhum hôm bonh đă, ntĭm leo nau uch rong ma nau ueh ơm bah rnoi nơm.

Đah lah du hê đảng viên, Groi Bí thư Chi bộ, Kruanh rmôt bu ur, ndrel ƀư nau kan Rnoh nŭih-dak si ndrel lah Groi Rnâng kan nau kan mặt trận ƀon Njrang Lu, wa Thị Nhum mro ntoh nau leo trong lor tâm âk nau kan, tâm nê, yuh kơl an nau kan mât ndrel ƀư ueh nau vay ơm bah nơm:

‘Tâm ăp rnôk rƀŭn Chi bộ, hên kŏ geh jao nau kan mât nau ơm bah rnoi nơm. Gâp rƀŭn rmôt kan bu ur ri kŏ tâm nkoch tâm jă ndrel mât chĭng gong bah rnoi nơm, mô ân roh rui, ndrel mro rƀŏng tât ntĭm tay ân ăp rơh mom tâm ƀon lŏ ƀư ân ueh tay. Ntơm năm 2001 gâp ndâk du rmôt tur chĭng bah ƀon, rmôt aơ geh n’gâng kan ba lơ kơl an ueh ngăn, kơl an ân rmôt hên kŏ âk đŏng. Đảng, ngih dak hŏ pơk trong nơih rvăt ân rmôt hên du bor chĭng. Nau aơ njêng nau rhơn tâm oh nur, oh nur mô rvê nau jêr gay ma hăn tur, ân tâm n’ur chĭng gong ăp ntŭk, gay oh nur mât ueh nau vay ơm bah nơm”.

 Êp nê, rnăk wa Thị Nhum lah rnăk ntoh lư mpeh nau kan pah kan jan sa blau. Đah 3 ha cà phê, geh nsum ma tiêu ndrel ăp ntil tơm sa play, ăp nŭih tâm rnăk vâl gơih pah kan jan sa, blau dŏng nau kan mhe tâm nau kan tuch tăm ri ma rnăk vâl Thị Nhum mro hun hao. Năm e, rnăk wa mhe nkra ngih ueh, nâp, rnoh rlau du rmen prăk nchrăp lôch năm aơ mra rvăt ndeh ôtô đŏng. Nau văng sa bah rnăk vâl đăp mpăn,  yuh kơl an ueh ngăn tât nau rêh bah kônh wa tâm ƀon Njrang Lu. Tâm rƀŭn rgum chi bộ Đảng ndrel Chi hội bu ur, Thị Nhum hŏ nkah tât nau kan “5 đảng viên kơl du rnăk rklaih ach o” tĭng nau nchrăp bah nkuăl uỷ Dak Song:

 ‘Tâm ƀon hôm geh du đê̆ rnăk mâp nau jêr, ri ma tâm Chi bộ ƀon hŏ tâm nchră, tâm ban nau rgop du đê̆ prăk gay ma kơl an, pơk trong ân rnăk nê hao jêng pah kan jan sa, bôk năp kŏ geh nau ueh đŏng. Ăp nŭih mro tâm rnăk ƀư tĭng ăp nau ma gâp ntĭm tay, gâp rhơn ngăn. Tâm chi bộ tâm rgop du hê du rkeh prăk, prăm nŭih đảng viên mra kơl an du rnăk jêr jŏt rvăt máy muih pih, rvăt phân poh ntuh kơl ân pah kan jan sa gay ma dơi rklaih ach o”.

‘Tâm rnôk rƀŭn chi bộ ri săk gâp lah ƀư Bí thư gâp saơ Chi bộ hên geh ân đảng viên ntoh lư ngăn, ngăn lah đồng chí Thị Nhum-Groi Bí thư Chi bộ, chi hội bu ur, mât uănh Rnoh nŭih, dak si ndrel Groi Rnâng kan pah kan mặt trận. Săk đồng chí lah cán bộ ri ma leo trong lor. Tal bôk năp lah leo trong tâm ăp nau kan, tal 2 lah leo trong hun hao văng sa rnăk vâl. Ăp năm nau geh dơi bah cà phê, tiêu. Nau mĭn bah Thị Nhum ueh ngăn tâm nau kan geh nau ueh đŏng tât ăp đồng chí ndrel ƀon lan êng êng ri ma leo trong lor bah săk nơm, rnăk vâl bah đồng chí”.   

 Năm 2017, Rnâng kan nkuăl uỷ Dak  Song, n’gor Dak Nông hŏ ntrŭnh nau n’hao nau rđau kan bah Đảng mpeh nau mât ndrel ƀư ueh ntŭk ơm yau chĭng gong, ndrel ma nau đă ƀư ntrŭnh ueh tât ăp cán bộ, đảng viên ndrel ăp kơn ƀon lan. Wa Điểu Minh-Đảng uỷ viên, Groi Kruanh UBND xã Dak Ndrung, mbơh, UBND nkuăl Dak Song kŏ geh nau nchrăp ntrŭnh nau aơ tât ăp ƀon lan:

‘Phung hên ŭch Trung ương, n’gor, nkuăl kơl an ân kônh wa ƀon lan, ngăn lah trong hăn, jêh ri ngih rƀŭn rgum gay ma kônh wa dơi geh ntŭk rgum mât ueh nau ơm yau bah nơm kơt lah mprơ, tanh njuh, chĭng gong ăp ntil gay ma mât nau vay. Tâm nau rêh rnôk aơ dôl ma geh âk nau tât mhe, lah nơm mô mât nau ơm ân ueh ri nau roh rui ma geh khuch ngăn, âk rnăk vâl mô hôm mât nau vay ơm bah nơm tay ôh”./.