Ntơm khay 7 năm aơ, thôn Tân Hạ, xã Tà Năng, n’gor Lâm Đồng hvi lơn, âk lơn, jêh rnôk tâm rnglăp ma thôn Chơ Ré. Đah rnoh hvi neh 476 ha, rlau 309 rnăk, âk ngăn lah rnoi mpôl đê̆, nau kan bah Groi Bí thư chi bộ, nkre Kruanh thôn Cil K’Hạnh jêng jâk lơn, mhâm ƀư gay ƀon lan 2 nkuăl mô hôm geh nau mĭn “nŭih ơm, nŭih mhe” wa ndrel ma Ban nau kan Mặt trận tât ăp rnăk gay ma tâm nkoch bri. Tâm rnôk tâm mâp mô lah pah kan nsum, wa dăp rgum gay ƀon lan 2 thôn ndrel râng, ndrel du nau kan.

Nau nkah ngăn lah nar hăn rep ƀon lan bôk năp, rnôk nê trong ƀon geh rep kloh jêh rnôk tâm rnglăp Thôn Chơ Ré ndrel thôn Tân Hạ. Nŭih pâk neh, nŭih tăm kao, nŭih rep ndŏk, ăp nŭih nkre kan nkre tâm nkoch bri, tâm gơm ngơi ndrel ngêt dak. Uănh trong thôn Tân Hạ mhe kloh ueh lơn, wa K’Hạnh saơ kloh ngăn nau rgâl:

"Jêh rnôk tâm rnglăp, gâp mĭn lah nau khlay ngăn lah mô ân kônh wa geh nau mĭn “Nŭih ơm, nŭih mhe”, ma uănh dĭng lĕ nê̆ kŏ lah nŭih ƀon lan ndrel du thôn Tân Hạ. Ndri ma, gâp nsôih tâm dăch dơh, tâm djăt nau kônh wa lĕ bah 2 nkuăl, nau kan nsum ndrel nơm ndrel tâm nchră, ndrel râng ndrel nkoch pă mbơh nau kan, nơm mô dơi đă kônh wa ân geh tâm rnglăp nkre, ma nơm ân geh pơk trong nơih gay ma kônh wa geh tâm mâp, geh tâm gĭt rbăng ndrel pah kan nsum. Rnôk hŏ ƀư ndrel du nau kan, yor nau geh dơi nsum ri nau tâm rnglăp ma geh ueh dơm”.

Nau rnơm tât ma ƀon lan mô di lah đah ăp nau ngơi dơm ma mbung, ma ân geh nau dơi bah nau tam. Wa K’Hạnh râng tâm nchră nau ma n’gâng kan xã Tà Năng pơk jrâu ntĭm nti mpeh nau kan mât rong, tuch tăm ân kônh wa, ƀư ân kônh wa hăn nti nau kan ngăn...wa K’Hạnh hôm bonh đă kônh wa ntrơn rgâl rnoh neh tăm tơm mô lăng geh jêng ri gay ma rgâl tăm ân geh dơi lơn. Đah ăp rnăk hôm jêr, yuh ntĭm kônh wa manh prăk gay ma ƀư kan. Tât rnôk aơ, thôn geh 78 rnăk manh prăk Ngân hàng chính sách xã hội, rnoh geh rlau 6,2 rmen; rnoh neh tăm bum byăp geh bơi tât 8 ha, hao 3 ha  rđil đah bôk năm. Thôn kŏ ndơn mât rlau 780 ha bri. Êng wa K’Hạnh ndơn mât bôk mom Ka Să Ha Cường (kon se nti jrâu 3) yor nau rêh jêr jŏt. Yuh Cil Yŭ K’Im tâm thôn Tân Hạ nkoch tât wa Cil K’Hạnh:

"Yuh Cil K’Hạnh lah du hê Kruanh thôn leo trong lor, mro têk leo nau ueh tâm ƀon lan. Nê lah nŭih ma âk ngăn bu ŭch kơt tĭng nti ƀư. Rnơm yuh ma hên blau  lơn tâm nau mbơh ngơi, n’hao nau gĭt rbăng tâm nau rêh jêng. Bah năp nơh rnôk yuh K’Hạnh hôm pah kan tâm nau kan y tế thôn ƀon, rnôk moh nau geh tât, yuh kŏ nsôih tâm nau kan kơl săm an bôk năp, kơl âk ngăn nŭih, kŏ kơt lah kơl rklaih ân săm ƀŭt ân ăp nŭih bu mô geh nau gĭt blau đŏng”.

Wa Bùi Ngọc Nghiễm, Kruanh rmôt Bu ranh âk năm thôn Tân Hạ, ndơn lah, wa K’Hạnh lah Kruanh Thôn gơih gĭt ndrel tâm dăch dơh ma ƀon lan. Ngăn lah, jêh rnôk tâm rnglăp thôn, wa ntoh dơi nau blau ndrel nau bu nsing rnơm bah nơm:

 ‘Ê tâm rnglăp ri yuh Hạnh tâm thôn Tân Hạ ơm kŏ gơih ngăn tâm nau kan. Ueh đŏng. Ntơm jêh rnôk tâm rnglăp ri yuh K’Hạnh hôm lah nŭih nor lă kan tâm ơm, blau nâm ơm. Moh nau kan kŏ tâm rnglăp ma kônh wa. Tâm ăp nar rƀŭn nchră, K’Hạnh geh nuih n’hâm ndâk kơl, kônh wa kơl an ngăn. Rnôk aơ lah rđau kan thôn Tân Hạ ndrel Chơ Ré ơm jêng Tân Hạ mhe, kŏ pah kan lôch nau dơi nơm đŏng, kônh wa mhe nơh săch păng, đă păng kan kan âk ngăn, geh tât 97,98% rnoh phiếu ân ma păng ngăn”.

 Bơi tât 17 năm ƀư nau kan tâm dâng, wa Cil K’Hạnh, Groi Bí thư Chi bộ ndrel Kruanh thôn Tân Hạ, xã Tà Năng, n’gor Lâm Đồng ndơn saơ ueh ngăn nuih n’hâm tâm rnglăp tâm ƀon lan lah n’hâm dăng ƀư geh dơi ăp nau kan. Ntơm bah ăp nau kan jê̆ yơn gơih ueh, tâm di ma nau rêh, yuh dôl ăp nhoat jut jăng nau tâm ƀah đah 2 thôn ơm, gay thôn Tân Hạ jêh rnôk tâm rnglăp jêng nsum mpôl tâm rnglăp, ndâk njêng nau rêh mhe./.