Nkual ƀon têh Buôn Ma Thuột nsrôih ƀư lôch jêh n’hanh n’glăp dŏng ăp ntŭk  kan tơm khlay tâm khay 11 năm aơ, di tâm rnôk nkah ndray 120 năm njêng n’gor Dak Lak.

 Aơ lah ngoăy tâm ăp rnoh tât kan ndơ̆ luh ta rơh rgŏ jă tâm rlong  mha êng mbah rhơn nkah ndray 120 năm njêng n’gor n’hanh 120 năm têh jêng n’hanh hun hao nkual ƀon têh Buôn Ma Thuột dơi ƀư ôi (20/3). Ntrôl dăng nău kan nkrơ̆ uĕh tay nkual ƀon têh, tĭng ƀư geh nău tam bôk nău kan gưl neh dak rdâk njêng ƀon lan mhe ntop n’hao tay.  Tâm nê, rdâk njêng dŭt đêt 1 ntŭk ntĭt leo n’hanh 1 ndơ ƀư ntoh lư, tăm mhe  dŭt đêt 5.000 tơm si, nsrôih 8/8 xã di rnoh tât rdâk njêng ƀon lan mhe kơi ntop  n’hao tay n’hanh geh dŭt đêt 1 xã ƀon lan mhe ntĭt leo. Hun hao ăp ndơ geh ƀư OCOP geh săk ntơ  lư, ntĭt êng. Ntrôl ngăch wăch rgum ntuh kơl, rƀŏng tât ndơ̆ nkual ƀon têh Buôn Ma Thuột jêng nkual ƀon têh rgum tơm, ntŭk chruh hun hao bah nkual  Tây Nguyên mpeh pâl nđaih, dak si, ntĭm nti, khoa học n’hanh công nghệ tâm năm 2045.