Ngai đah nkuăl ƀon têh Buôn Ma Thuột nklăp 12 km mpeh ba lơ, nglau Ea Kao, tâm xã Ea Kao, nkuăl ƀon têh Buôn Ma Thuột lah ntŭk tât pâl n’aih ntoh lư, rgum âk mpưm năch tâm ndrel bah dih n’gor, đah ntŭk ndrih ueh, n’ik sial. Đê̆ ngăn nŭih gĭt lah, ta ntŭk aơ geh trong hoch dak geh njêng bah nau nchăng dak têh, jê̆ tâm nkuăl gay ma kơl tŏ tơm tăm ân lŏ bah xã Hoà Xuân. Ntŭk aơ geh nkra rnôk nkuăl têh Buôn Ma Thuột (nkuăl ƀon têh Buôn Ma Thuột rnôk aơ) geh rklaih. Kỹ sư Nguyễn Quyền, ta Phường Tân Lợi, nkuăl ƀon têh Buôn Ma Thuột rnôk nê geh Bộ Thut lợi leo đă kan tâm n’gor Dak Lak. Wa Nguyễn Quyêng nkah: Gâp lah nŭih tât ntơm ê nkra ndrel rđau đă ntŭk aơ:

“Gâp geh jao nau kan mĭn njêng ndrel nkra njêng du nglau dak têh ma mhâm ƀư ân geh dak leo tŏ tâm ăp nkuăl êp nê. Ntŭk nkra aơ knŭng geh 2 năm dơm ri hŏ jêh hôm păng jêng nglau ndrel leo lăp dak tŏ tâm ăp lŏ bah kônh wa gay ma geh ndơ sa. Rnôk nê mhe giải phóng ri ma ndơ sa lah ndơ khlay ngăn”.

Ntơm bah ăp ntŭk nkra bôk năp geh ndâk ma n’hâm nŭih, tât nrôk aơ Buôn Ma Thuột hŏ geh nhoat hun hao ngăch ndrel dăng, jêng Đô thị loại 1 ndrel tâm n’gor đah âk nau kan têh geh dơi kơp bah nkuăl ndrel neh dak. Đại lộ Võ Nguyên Giáp ma nŭih ƀon lan mơng kuăl lah Đại lộ Đông-Tây, jêh nkra tâm dŭt năm 2023 lah ntŭk trong geh têh ngăn tâm nkuăl ƀon têh yôk prêh tât rnôk aơ, đah rnoh ntuh kơl rlau 1.200 rmen. Nau dơi geh hăn bah trong aơ jêng nau ueh mpeh Đông-Nam nkual ƀon têh, pơk luh nau ueh mhe tâm nau hun hao ntŭk ntu gung trong kŏ kơt lah trong hăn đô thị Buôn Ma Thuột.

  Lôch 8 năm uănh, saơ bu nkra, rnôk aơ, wa Đặng Công viên, tâm Phường tự An, nkuăl ƀon têh Buôn Ma Thuột rhơn ngăn rnôk geh hăn ro tâm trong têh, ueh kơt aơ:

‘Rnôk geh trong hăn aơ ri ƀon lan rhơn ngăn. Nau aơ leo tât du nau mhe mham ngăn, trong têh hvi ndrel jêh nê đŏng lah ntrŭt dơi nau văng sa bah nkuăl hao du trong mhe”.

Trong 49 năm hun hao, Buôn Ma Thuột hŏ geh tay ân ntŭk mhe, ntơm bah trong hăn, trong hoch dak, trong viên thông, tât công viên, quảng trường ndrel âk nau kan văn hoá êng tâm nkuăl ƀon têh. Nau têh bah đô thị mô rlu pơk hvi, ăp ntrong ntĭm nti, dak si geh kơl an, ntuh kơl. Trong hăn nkuăl ƀon têh Buôn ma Thuột hun hao ăp nar geh nsum ma nau ntrơn rgâl mpeh văng sa, nau rêh ƀon lan. Nkuăl ƀon têh Buôn Ma Thuột geh rnoh hvi 37.700 ha, rlau 380 rbăn nŭih, nau geh dơi bôk nŭih rlau 100 rkeh/năm, âk rlau rđil nau geh bah n’gor.

 Saơ nau rgâl bah ƀon lan, wa Đỗ Thành Tài, nŭih Việt Nam gŭ ta Mỹ ndrel ƀon lan tâm nkuăl ƀon têh Buôn Ma Thuột ndrel nsum nau rhơn tât ƀon tơm Dak Lak:

 ‘Rnôk gâp hăn ri kônh wa ăp thôn, ƀon kŏ dôl ma jêr jŏt, ngai ngĭn, ê geh ăp trong hăn ôh, ƀa hin gâp saơ geh ăp nau kan ueh ngăn, nau rêh ƀon lan, nau hun hao văng sa bah n’gor nơm ri rhơn ngăn. Gâp saơ ueh m’al rnôk geh sĭt ƀon nơm, hun hao văng sa ndrel rgop âk ân n’gor ndrel nau rêh jêng”.

Rhơn mpeh nau vay ơm cách mạng janh dăng bah rnoi nơm, yuh H’Hương Bkrông, Bí thư Thành Đoàn Buôn Ma Thuột mbơh, mom ndăm n’gor Dak Lak dôl tĭng jâng Mbŏ, nô, đah n’hâm mom ƀư ueh nau dơi bah nŭih tơm tâm nau ndâk ƀon lan:

‘Gĭt nkah ăp rơh nô, mbŏ hăn lor hŏ ndâk dơi nau geh đăp mpăn, nâp nâl. Nar aơ, đah ăp rơh mom ri mra nsôih kơl an lôch n’hâm nơm, nsôih kơl n’hâm mom gay râng tâm nau kan ndâk njêng, ƀư ueh nau kan mât neh dak tâm rnôk mhe”.

 Tâm nau ntrŭnh mrô 67, năm 2019 mpeh “Ndâk njêng ndrel hun hao nau nkuăl ƀon têh Buôn Ma Thuột tât năm 2030, rƀŏng tât năm 2045”, Bộ chính trị hŏ ndŏ luh nkô̆ nau ndâk ndrel hun hao nkuăl ƀon têh Buôn Ma Thuột jêng Đô thị khlay nkuăl Tây Nguyên. Ntơm bah nê tât rnôk aơ, nkual ƀon têh ngăch dŏng ƀư ndrel ntrŭnh ăp nau kan, nau geh tât mât tơm prăk, ngân sách Ngih dak, pă nau mât ngih dak tâm nau rgum, rgum ntuh kơl, săch ndrel rgum nŭih blau nau kan. Wa Vũ Văn Hưng, Kruanh UBND nkuăl ƀon têh Buôn Ma Thuột mbơh, rƀŏng hun hao nkuăl ƀon têh tâm rơh tât mra rgum dŏng tu tơm kan gay rklaih nau nkol tâm rnôk hun hao, ƀư ueh nau dơi, nau dăng ndrel rgum nau ntuh kơl ân nkuăl ƀon têh, nkre nsôih ƀư jêh nau ndâk njêng ƀon lan mhe n’hao prêh:

‘Kơl an ntuh kơl ăp ntŭk ntu gung trong hăn, tâm nê, rgum ƀư jêh nau mbơh ăp N’gâng kan, ntŭk kan gay nchră ăp nau nkra ntŭk ntu tâm nkuăl. Êng nê, đă ăp n’gâng kan, ntŭk kan mra kơl ntuh kơl nkra trong teng mpeh ba lơ bah Buôn Ma Thuột gay njêng trong hăn lam nkual ƀon têh, huch oi nau kol trong tâm nkuăl têh. Lŏ ntuh kơl nkra ngih vâl đô thị, tâm nê geh tăm âk tơm si, trong hăn, công viên, hoa viên ndrel ƀư jêh ăp nau dơi bah 3 xã hôm e tam nau ndâk njêng ƀon lan mhe n’hao prêh ndrel ƀon lan mhe kơt mhe tâm năm 2024”.

 Buôn Ma Thuột rnôk aơ hŏ geh ăp nhoat rgâl mhe rjăp, jêng du nkuăl ƀon têh Ndrih-kloh-ueh. Ndrel ma nau kơl an bah Đảng, Ngih dak, nau tâm ban nuih n’hâm, tâm rnglăp bah 40 rnoi mpôl ndrel rêh tâm nkuăl, nkuăl ƀon têh Buôn Ma Thuột nar aơ dôl nsôih jêg Đô thị ndrih-sinh thái-blau mhe-ăp ntil nau ơm, nsrôih lah Đô thị nkuăl tơm bah nkuăl Tây Nguyên./.