Ăp năm aơ, ăp rơh kơn cán bộ, tahen cảnh sát cơ động Công an n’gor Dak Lak hŏ ndrel đah ăp mpôl kan rlăch ndăng geh nău tam đah ăp ntil nuĭh tih klach rvê, ntru lơh  mpôl Fulro, mât rnă njrăng neh dak, mât đăp mpăn rnă njrăng lam rêh jêng kon nuĭh. Đơn vị hŏ rhơn n’hao dơi Đảng, Ngih dak ntăm an săk ntơ Đơn vị Anh hùng lực lượng vũ trang ndrel âk huân chương n’hanh ndơ nkhôm rnê têh khlay.

Khay 4 khay wai Tây Nguyên duh tâm ban ma ŭnh rlŭt. Ta ndrĭch tiăr nti, âk cán bộ tahen Jrô kan Cảnh sát cơ động Công an n’gor Dak Lak jăp gơih tiăr nti. Jut ndăn dak rhal, Trung úy Hứa Văn Hòa an gĭt:  

“Săk gâp nơm ndrel lĕ rngôch cán bộ, tahen rhŏ dŏng tâm mpôl Cảnh sát cơ động way mô rlu tiăr nti, kơt nti, rđăp dêh mpeh han săk chính trị. Mpôl hên way tiăr nti tập võ thuật, kỹ chiến thuật, tâm ban kơt dŏng hăr ăp ntil ndrak nsiu nchrăp lor, dơn n’hanh ƀư lôch jêh uĕh ăp nău kan dơi jao.”   

Nchrăp rdâng lơh tâm nô  nău mhe, nău dơi dŭt mhe  lah khay 6/2023, mpôl cảnh sát cơ động Dak Lak hŏ ngăch ndrel ăp đơn vị nghiệp vụ nhŭp lĕ rngôch mpôl lơh ndjơh geh phao bleo ta Cư Kuin. Tĭng Thượng tá Vũ Thành (77 năm deh) – Kruanh Jô kan Cảnh sát cơ động ơm công an n’gor Dak  Lak, Dak Lak lah êng, Tây Nguyên lah nsum lah ntŭk dŭt khlay mpeh rnă njrăng njrăng n’gang neh dak, way geh ăp bu rkeh joi trong lơh chrai. Rlău 30 năm pah kan tâm mpôl Cảnh sát cơ động, đah âk klach rvê, nkah jru đah wa Vũ Thành lah rơh ntru lơh năm 1977 nhŭp kân Hoàng Huân, du hê kruanh mpôl Fulro ta nkuâl Dak Mil:  

          “Hoàng Huân bah xã Đức Minh, Đức Mạnh ndrel rlău bar pe jât nuĭh Fulro nchuăt lăp tâm bri tâm klônh đah Trung đoàn 64 Fulro bah Y K’lơng. Nău ŭch bah khân păng lah joi trong kâp lơh ndŭ rlơt tŭp n’gâng kan nkuâl Dak Mil. Mpôl hên pơk bar rơh ntru lơh, 5h ôi nar 6/4/1977, mpôl hên tâm pă ƀư 2 trong chruh bah ôi tât nŭng nar ri saơ têl jâng. Gâp saơ radio tă bah phŭng rlăng pơk, n’hanh geh nău mpơl bah phŭng rlăng ri mpôl hên tât dăch n’hanh gâp saơ Huân ri pănh rep 3 tong ƀư Huân chôt ta ntŭk ri geh nhŭp. Ôp lek Hoàng Huân ri hŏ lơh chrai lĕ mpôl păng n’hanh bar pe jât nuĭh bah mpôl dja hŏ chŭh chŭn, mbơh luh êng lĕ rngôch”.

Thượng tá Cao Tiến Phu – Kruanh Jrô kan Cảnh sát cơ động Công an n’gor Dak Lak, an gĭt, 50 năm aơ, ndrel đah tĭng ƀư  jăp nău dơn kan mât njrăng đăp mpăn an ntŭk kan chính trị, wăng sa, rêh jêng kon nuĭh khlay bah trung ương n’hanh n’gor, mpôl Cảnh sát cơ động Dak Lak hŏ rlăch ndăng geh nău tam đah ăp ntil nuĭh tih klach rvê kơt pih ntŭng ndơ, nkhĭt nuĭh, ma túy…, mât rnă njrăng đăp mpăn ta ntŭk. Ăp năm lôch rklaih luh,  đơn vị hŏ tĭng ƀư hang rbăn tơ̆ ntru lơh Fulro, nkhĭt n’hanh nhŭp rêh hang rhiăng nuĭh tih, nhŭp  kân ân ndrak nsiu, ndơ dŏng n’hanh ăp siƀŭt khlay. Êng rơh lơh ndjơh nar 11/6/2023 ta Cư Kuin, ăp cán bộ, tahen hŏ rgot nhŭp geh 11 nuĭh lơh ndjơh, nhŭp kân âk ndrak nsiu, ndơ dŏng kan an tahen.

Thượng tá Cao Tiến Phu an gĭt, cán bộ tahen đơn vị tiăr nti tay n’hao nău dơi han săk chính trị n’hanh nău gĭt blău kan, mbra rlăch ndăng đah ăp ntil nău tih tâm moh rnôk nău tât.

“Mpôl hên ntik n’hao tay nău way ơm dăng janh n’hanh ăp nău tă ơm gĭt kan khlay bah ăp rơh kơn kruanh rđău kan Jrô Cảnh sát mât njrăng ntơm nơh, Cảnh sát Cơ động aƀaơ n’hanh way nđơn trêng tay nău nđơr an cán bộ, tahen tâm đơn vị. Mpôl hên ƀư tiăr nti an cán bộ, tahen nar lơn ma hăr nău kan, hôm tiăr rdâk njêng ăp bôk nău kan, trong nkra ăp nău tât na nê̆ đăp mpăn nô nău rnă njrăng ta ntŭk”.

Ăp năm aơ,  đah âk nău dơi hŏ geh, Jrô kan Cảnh sát cơ động - Công an n’gor Dak Lak hŏ rhơn n’hao dơi Đảng, Ngih dak ntăm an săk ntơ Đơn vị Anh hùng lực lượng vũ trang Nhân dân, Huân chương chiến công hạng Nhất, Huân chương quân công hạng Ba n’hanh âk nklâm ndơ nkhôm rnê têh khlay êng ƀa ƀă đŏng. Cán bộ tahen Cảnh sát cơ động Công an n’gor Dak Lak nar aơ dôl nđơn tay nău way ơm dăng janh, di lah “păng khêl loih” đăp mpăn rnă njrăng ta ntŭk n’hanh đăp mpăn an ƀon  lan ăp rnoi nuĭh ta Dak Lak./.