Ôi 29/3, wa Nguyễn Hòa Bình, Ủy viên Bộ Chính trị, Bí thư Trung ương Đảng, Chánh án Nhih phat dôih ƀon lan gưl têh hŏ tât khâl n’hanh pah kan ta n’gor Điện Biên. Mpôl pah kan ndrel đah kruanh rđău kan n’gor Điện Biên hŏ an kao si, mpoh nhang ta Đền thờ tahen ơm khĭt tâm lơh ta Điện Biên Phủ n’hanh Nghĩa trang Liệt sĩ A1.

Bah năp huêng bah ăp tahen ơm khĭt, wa Nguyễn Hòa Bình n’hanh ăp nuĭh tâm mpôl hăn pah kan hŏ mpơl nău nkah gĭt jru đah n’hâm suan têh kuâng bah ăp  tahen ơm dăng janh – ăp nuĭh kon ntoh lư bah rnoi nuĭh hŏ han săk tâm lơh, n’groh an nting mham yor ma n’gâng kan rklaih luh rnoi nuĭh, mât njrăng neh dak. Nkre ntik n’hao tay nău way ơm Điện Biên Phủ dăng janh, tâm rnglăp, nsrôih ndrel lam Đảng, lam tahen n’hanh lam ƀon lan tĭng ƀư geh nău rơh rdâk njêng neh dak nar lơn ma hun hao dăng. Ôi ndrel nar, wa Nguyễn Hòa Bình n’hanh mpôl  pah kan hŏ râng sa nkra nhih pah kan bah Nhih phat dôih ƀon lan n’gor Điện Biên – Nhih pah kan geh lĕ rngôch rnoh prăk ntuh kơl 113 rmen prăk./.