Tâm nar rƀŭn, ăp ntoh măt Quốc hội n’gor Dak Lak hŏ mbơh nau tât cử tri âk nau tă geh dơi khlay bah rơh rƀŭn, tâm nê lah rjăp rnoh âk bah nau ntrŭnh luật ndrel nau ntrŭh geh mbơh nchră; ăp nau kan têh tât nau hun hao văng sa, rêh jêng, tơm prăk Ngih dakl ndrel nau kan rnoh nŭih ƀư kan ndrel âk nkô̆ nau geh tât nau rêh ƀon lan. Cử tri n’gor Dak Lak ntoh nau tâm ban đah nau tă geh dơi ma Quốc hội tă ƀư, nkre ntoh âk nau đă gay lŏ ƀư jêh ăp nau ntrŭnh kan ndrel rklaih ăp nau kan ngăn bah n’gor.

Tâm rnoh ăp nkô̆ nau geh cử tri Dak Lak kơl an âk ngăn nê lah nau nkoch mbơh tât nau kan phân poh, kon ntil tăm, mpa rong mô nâp ueh geh nkoch mbơh nơih ir ndrel geh âk tâm ăp ntŭk kan trực tuyến. Cử tri ŭch ăp n’gâng kan ƀư rjăp nau mât njrăng ndơ tuch tăm, ƀư nkra rklaih nâp ăp nau nkoch mbơh tih ndrel mhal ăp nŭih tih. Cử tri Hoàng Diễm Phúc, Phường Buôn Ma Thuột, n’gor Dak Lak mbơh nau:

‘Phân poh, kon ntil tăm, mpa rong geh mbơh đah ăp rup yor ntŭk ƀư blau njêng nau kan êng AI ƀư ueh măt uănh, nŭih ƀon lan dŏng yơn lŏ mâp nau khuch. Gâp đă ân geh n’hao lơn nau nâp, mbơh nkoch nau tăch ndoh ndơ gay đăp mpăn nau kan ngăn, kơl an ƀon lan săch ndơ ân tâm di”.

Ndrel ma nê, ăp nau kan nŭih ƀon lan rêh jêng êng kŏ geh cử tri n’gor Dak Lak mbơh đă, ngăn lah ăp ntŭk trong hoch dak geh djơh khuch jêh rnôk mih n’hach jŏ jong mhe rlau. Cử tri đă n’gor ơm kơp uănh, rgum rnop rnoh khuch khat ndrelpă tơm ƀư nau kan ê nkra, ndâk tay ăp ntŭk geh nau khuch./.