Tâm ôi 19/1, ta Ntŭk rgum tâm nchră gưl neh dak (Hà Nội), Đại hội đại biểu lam dak tâl XIV bah Đảng Cộng sản Việt Nam hop nchrăp lor. Bah năp rơh hop nchrăp lor, ăp đại biểu râng Đại hội hŏ lăp Lăng weh chop Kruanh Hồ Chí Minh, an kao si n’hanh mpoh nhang ta Ndah rup nkah gĭt ăp tahen ơm dăng janh khĭt. Lam lĕ Đại hội rong an du mnĭt nhêp măt nkah gĭt drô Tổng Bí thư Nguyễn Phú Trọng n’hanh ăp Ủy viên Ban Chấp hành Trung ương Đảng khóa XIII hŏ khĭt.

Wa Trần Thanh Mẫn, Ủy viên Bộ Chính trị, Kruanh Quốc hội ntơh măt ăp kruanh rđău kan n’gâng tơm bah Đảng, Ngih dak mât bôk rơh hop nchrăp lor. Đại hội hŏ n’hơr ti, tâm ban ŭch âk ma bôk nău kan hop nchrăp lor, nău way pah kan bah Đại hội, Bôk nău kan bah Đại hội n’hanh Nău way bầu cử ta Đại hội đại biểu lam dak tâl XIV bah Đảng. Đại hội hŏ sơch Mpôl kruanh lah 16 nuĭh Ủy viên Bộ Chính trị; sơch Mpôl Thư ký lah 5 nuĭh n’hanh Ban uănh năl di tay nău dơi ƀư đại biểu râng Đại hội lah 13 nuĭh. Đại hội hŏ n’hơr ti ŭch an ƀư ăp đại biểu, đah lĕ rngôch 1.586 nuĭh dơi rgum râng Đại hội.