Nthoi tay nar Đại hội đại biểu lam dak tâl XIV bah Đảng, ôi 21/01, ăp đại biểu tâm nchră ta Hội trường mpeh ăp siƀŭt nchrăp lor dăn đă Đại hội XIV bah Đảng.

Ntơm bôk an rơh tâm nchră, Đại hội hŏ djăt Đại tướng Phan Văn Giang, Ủy viên Bộ Chính trị, Bộ trưởng Quốc phòng, rŏ siƀŭt nsŏng kơl đah nkô̆ “Rdâk njêng Mpôl tahen ƀon lan dâk chŏl lor, n’gâng tơm, đăng hăr, têh dăng mhe, ƀư glo tơm rdâk njêng jâng nsing njrăng n’gang neh dak nâp dăng, têh dăng mhe, nkre đah jâng nsing rnă njrăng ƀon lan n’hanh nsing ndăl tâm nuih n’hâm ƀon lan nâp dăng", n’hanh Đại tướng Lương Tam Quang, Ủy viên Bộ Chính trị, Bộ trưởng Công an, rŏ siƀŭt nsŏng kơl đah nkô̆ "Pah kan công an tĭng ƀư 3 rnoh tât kan têh jong bah Đảng: Bah tâm lơh tâm su, đăp mpăn – hun hao săk blău âk – rhơn răm bah nuĭh ƀon lan". Lôch nê, tâm nău nsŏng kơl ta Hội trường, Groi Thủ tướng Phạm Thị Thanh Trà, Đảng bộ Chính phủ lah rjăp nuih n’hâm Chính phủ nta trong dơh, hun hao, kloh rsang n’hanh dâk kan lĕ n’hâm suan rhŏ dŏng ƀon lan.

 Âk nău rgop lah rjăp nău rdâk njêng đăt ndal tay, wat jêh trong tĭng, n’gluh ăp tơm ndơ an hun hao; hun hao ntŭk ntô ndơ dŏng têh jong ăp kôp têh uĕh mhe, nta trong dơh ntŭk hun hao mhe; ntrôl dăng tâm pă gưl, tâm pă nău kan nkre đah tâm pă tơm ndơ n’hanh n’hao dăng hăn ôp uănh, groi nđôi đah trong rƀŏng “n’gâng kan tâm dâng n’glêh an, n’gâng kan tâm dâng ƀư, n’gâng kan tâm dâng dơn kan êng” du trong ngăn ngăn n’hanh dŭt geh nău tam.