Ôi aơ (22/5), ta Rơh rƀŭn tal 7, Quốc hội khóa 15 lĕ jêh trong ƀư săch Kruanh dak CHXHCN Việt Nam, năm 2021-2026. Lôch jêh, wa Tô Lâm-Ủy viên Bộ Chính trị, Kruanh N’gâng kan Công an, Đại biểu Quốc hội khóa 15 mpeh tâm Mpôl đại biểu Quốc hội n’gor Hưng Yên lĕ dơi Quốc hội săch ƀư Kruanh dak CHXHCN Việt Nam, năm kan 2021-2026. Nghị quyết mpeh nău săch wa Tô Lâm mât ƀư kruanh dơi ăp đại biểu Quốc hội nsơr ty mbơh an đah 472/473 đại biểu râng nsơr ty tâm ban ŭch (geh 96,92% dĭng lĕ rnoh đại biểu Quốc hội). Kruanh dak mhe mbơh dơn đah Neh dak, ƀon lan n’hanh Hiến pháp ta năp Quốc hội rnôk dơn nău kan.

Đại tướng Tô Lâm deh năm 1957, ƀon tơm ta Nghĩa Trụ, nkuăl Văn Giang, n’gor Hưng Yên; lah giáo sư Khoa học An Ninh, Tiến sĩ Luật học. Wa lah Ủy viên Trung ương Đảng khóa 11, 12, 13; Ủy viên Bộ chính trị khóa 12, 13 n’hanh lah Đại biểu Quốc hội khóa 14, 15. Bah 1988-1993, wa Tô Lâm ƀư groi trưởng phòng jêh nĕ Kruanh jrô kan Cục Bảo vệ chính trị 1, N’gâng kan Công an. Tâm 13 năm bah kơi, wa ƀư Groi cục trưởng Cục Bảo vệ chính trị 1 jêh nĕ Cục trưởng Cục Bảo vệ chính trị 3, N’gâng kan Công an bah năm 2006-2009, wa Tô Lâm ƀư groi Tổng cục trưởng Tổng cục An ninh I, N’gâng kan Công an. Tâm 2 năm jêh nĕ tay, wa mât uănh mât ƀư Tổng cục trưởng Tổng cục An Ninh 1, N’gâng kan Công an. Wa Tô Lâm mât ƀư Groi Kruanh n’gâng kan Công an bah khay 8/2010 tât khay 4/2016. Jêh nĕ, wa ƀư Kruanh N’gâng kan Công an tât aƀaơ.