VOV4.M’nông- Kêng măng nar 20/9, mpôl pah kan bâh rnâng kan ntĭm leo Trung ương mpeh njrăng, rdâng nău sa nkhiăn sa ƀer, nău kan mô ueh yor Đại tướng Tô Lâm, Ủy viên Bộ chính trị, groi kruanh rnâng kan ntĭm leo Trung ương mpeh njrăng, rdâng sa nkhiăn, nău kan mô ueh leo hăn lĕ geh rơh pah kan đah rnâng kan n’gor ủy Dak Nông. Tĭng nău mbơh tơih bâh rnâng kan n’gor Ủy Dak Nông, nău kan njrăng rdâng sa nkhiăn sa ƀer tâm ba năp nơh geh n’gor dŭt mât uănh leo kan, ntĭm đă n’hanh ƀư tĭng geh săk rnglăy.

Aƀaơ rnâng kan ntĭm leo njrăng, rdâng nău sa nkhiăn sa ƀer, nău kan mô ueh bâh n’gor dôl geh n’gor tât uănh nđôi, ntĭm đă 16 nău kan, nău tih jêr njrăng ntoh lư ta ntŭk; geh saơ ndơ̆ an ntŭk kan công an uănh nđôi năl 3 nău kan geh nău nde ma nău kan têh, nău dơi tâm rnôk pah kan. N’gor lĕ geh 31 rơh mhe đah 52 nuĭh tih geh phong, uănh năl mpeh ăp nău tih sa nkhiăn, sa ƀer, nău wăng sa. Ntoh ngơi ta rơh pah kan, Đại tướng Tô Lâm dăn đă tâm let năp tay n’gor an geh n’hao tay nău leo kan, ntĭm đă n’hanh leo ƀư, ngăn lah du đê̆ nkô̆ nău khlăy mpeh n’hao tay lơn nău gĭt vât, dơn kan, ngăn lah du đê̆ nău kan bâh ăp gâl kan, n’gâng kan ta ntŭk, nău wăng sa, ƀư tĭng ueh tay lơn nău kan tâm rgop tâm trong ngăch saơ, rmal ăp nău tih, ăp nău sa nkhiăn, sa ƀer, wăng sa, ntrôl ngăch nău uănh nđôi, rmal ăp nău tih ndrel đah nău kan mbơh tơih an tâm ban ăp trong kan njrăng rdâng sa nkhiăn sa ƀer, nău kan mô ueh. Đại tướng Tô Lâm an lah, nkre đah nău ntrôl dăng ăp trong kan njrăng nău tih, joi nuĭh tih, hun hao wăng sa rêh jêng, n’gor an geh mât uănh âk tay lơn tât nău kan n’huch ach o, mât kơl an nău rêh an ƀon lan.

        Nuĭh rblang: Thị Đoắt