Kêng măng 23/1, Thủ tướng Phạm Minh Chính n’hanh I ur ndrel mpôl đại biểu gưl prêh Chính phủ Việt Nam lĕ sĭt tât Hà Nội, lôch uĕh rơh hăn khâl na nê̆ Ba Lan, Séc n’hanh râng Rƀŭn nchră ăp năm rơh tal 55 Rƀŭn nchră wăng sa lam ntŭr neh Davos ta Thụy Sĩ. Rơh hăn khâl bah Thủ tướng Phạm Minh Chính lĕ geh âk săk rnglăy khlay, ndơ̆ tâm boh dăch dêh way ơm đah Việt Nam n’hanh Ba Lan, Séc n’hanh Thụy Sĩ hăn lvang hun hao mhe, n’hao tâm boh, n’hao nsing nơm chính trị.

Thủ tướng Phạm Minh Chính lĕ geh rlău 30 rơh rƀŭn nchră, rgum ôp, ntoh ngơi nău kơl, râng rƀŭn doanh nghiệp, râng bôk nău kan “Năm mhe ƀon tơm”, khâl du đêt ntŭk văn hóa, khoa học-kỹ thuật ta ăp dak. Tâm rlău 30 mông ta Davos, Thủ tướng Phạm Minh Chính lĕ geh du trong hăn âk đah âk nău ƀư ăp ding. Thủ tướng Chính phủ, kruanh âk N’gâng kan, nău kan n’hanh ƀon lan lĕ ntoh ngơi n’hanh tâm nchră đah âk tập đoàn bôk năp ta 5 rơh Rgum nchră ta âk ntil nău khlay, bah công nghệ mhe, nău mĭn njêng tât dak si, ntung trong mhe, ŭnh nar kloh uĕh n’hanh ntŭk prăk kaih.