VOV4.M’nông: Ăp tơm ntuh kơl manh rlau 2 rbăn rmen prăk ntuh kơl nsum tâm n’gor Dak Lak yơn lah âk nau kan mbrơi geh ntrŭnh ƀư, ƀư âk rnoh geh manh rlau nar trok bơi tât du rbăn rmen. Sŏk tay prăk, Dak Lak mra geh nau dơi gay ma n’hao rnoh dŏng prăk tâm ăp nau kan ueh lơn. Yơn lah, aơ lah nau jêr yor âk ntŭk kan tăch rgâl dôl mâp nau khuch tâm nau kan, prăk manh jêng rnon jêr geh sŏk. Mặt êng UBND n’gor kŏ rvê lah sŏk prăk, ndơn nau kan mra jêng mbrơi ri mra geh Trung ương mô hôm ntuh kơl prăk.

            Bôk nau kan ntuh kơl nkra trong Hồ Chí Minh trong der mpeh ba dâng nkuăl ƀon têh Buôn Ma Thuột n’gor Dak Lak ntrŭnh ƀư lvang năm 2020-2030 geh rnoh ntuh kơl 1.509 rmen, tât nrôk aơ hŏ pă geh 1.044 rmen. Yơn lah, nau ƀư kan ri mbrơi rđil đah nau geh đă nkra nklăp 8%, tâm ban đah rnoh nkra nklăp 80 rmen prăk. Tâm rnôk nê, rnoh prăk dŏng ƀư bah ăp tơm ntuh kơl hao tât rlau 220 rmen. Wa Phan Xuân Bách, Groi Giám đốc ƀư nau kan Rnâng kan mât bôk nau kan ntuh kơl mbơh, du đê̆ nŭih ƀư nau kan ntuh kơl yơn kơt lah mô geh nau ƀư kan, prăk manh jêng “rnon prăk jêr sŏk”.

            Ntoh ngăn kơt lah Công ty TNHH Phương Đông (mrô 47 trong Thái Phiên, nkuăl ƀon têh Buôn Ma Thột- Nŭih tơm ntuh kơl bah rmôt ƀư nau kan mrô 03 tâm Bok nau kan hŏ ân manh rlau 44 rmen prăk ndrel geh ngân hàng ân manh mô kâp nchăm. Yơn lah, công ty aơ hôm geh nau khuch ndrel rgâl nŭih ntoh măt pháp luật. Tơm ntuh kơl hŏ đă âk tŏ, yơn hŏ bơi tât du năm ma aơ, rmôt kan aơ mô geh ƀư nau kan hŏ geh nchrăp lor. Tơm ntuh kơl hŏ rgâl 2 tŏ săm ƀŭt gay ma sŏk nsĭt 44 rmen prăk aơ tă bah ngân hàng dâk nchăm yơn ê dơi rklaih lôch:

            ‘Lah ƀư nau kan rgum ntrŭnh ăp rnoh ân manh rơh 1, rơh 2, rơh 3, yơn lah tâm 3 khay mô geh trok prăk du ntil ndơ, kơt lah mô geh rnoh ndơ gay ma trok ri tĭng nau ntrŭnh mrô 99 năm 2021 ri đă ân geh sŏk lơi. Nau aơ mô geh njoăl ân công ty yor ngân hàng đăp mpăn, mô gĭt mhâm ƀư ma ngân hàng ân mô kâp nchăm, ri rnôk aơ sŏk lơi. Rnôk aơ geh dơi sŏk đŏng lah mô ri ân geh ôp ngân hàng”.

            Prăk manh lor jêng “rnoh jêr sŏk” kŏ lah nau dôl geh nsum tâm âk nau kan tâm n’gor Dak Lak. Tĭng nau mbơh bah Ngân hàng Ngih dak n’gor Dak Lak, kơp tât rnôk aơ, tâm rnoh rlau 2.115 rmen prăk manh lor ri geh tât 1000 rmen hŏ rlau khay trok. Ngân hàng Ngih dak hŏ đă ăp gưl kan bah n’gor geh nau gay ma sŏk lơi rnoh prăk manh aơ. Wa Phạm Ngọc Nghị, Kruanh UBND n’gor Dak Lak mbơh, n’gor kŏ ntrŭnh nau đă sŏk lơi rnoh prăk mhe nkah, yơn kŏ rđau ăp rmôt kan bah n’gor ân geh nkah ngăn gay ma der nau sŏk lơk lôch jêh ri rhuăt lơi tơm prăk kan:

            ‘Kho bạc mbơh ndrel đă sŏk lĕ, ma sŏk lĕ ri tât rnôk mô geh prăk ma trok ân ƀon lan, kơt lah prăk trok rnon neh, ngih bu ntrơn. Lah kơt bôk nau kan Krông Pách thượng, rnôk aơ hôm nklăp 400 rmen gay ma trok prăk ân ƀon lan ma sŏk ndơ aơ, trung ương rhuăt lĕ mpeh đah ri rĭ ma 400 rmen aơ n’gor ntŭk sŏk gay ma trok ân ƀon lan. Ri rnôk aơ sŏk nsĭt moh ndơ, ntŭk tâm rnoh, mhâm nau kan”.

            Nau ntrŭnh mrô 99 năm 2021 bah Chính phủ ntrŭnh mpeh nau mât, trok, dŏng tơm nau kan ntuh kơl dŏng prăk ƀư kan nsum hŏ ntrŭnh n’hêl, ngăn mpeh nau manh prăk ndrel ma sŏk lơi tơm prăk ân manh. Tâm nê, nau ntrŭnh: “tơm prăk ân manh rlau nar ri geh sŏk jêh 3 khay kơp ntơm rnôk ân sŏk lơi tơm prăk tĭng nau ntrŭnh bah nau kan nsum ma ăp tơm ntuh kơl ê dơi geh ƀư mô lah rnôk saơ ăp tơm ntuh kơl dŏng mô tâm di nkô̆, tơm ntuh kơl geh nau dơi mât, tâm rgop đah ntŭk kan nkân uănh, trok tâm gay ma sŏk lơi rnoh prăk tă geh manh lor ân tơm prăk Ngih dak”. Yơn lah, ta Dak Lak hôm geh ăp nau kan manh prăk rlau nar trok rlau ma năm. Nau aơ ndŏ luh nau gay ma ƀư, ndri mhâm ân geh nau tât kơt nê, âk jêt, âk rmen, ma rhiăng rmen prăk ntuh kơl tă bah ngih dak ân ăp tơm ntuh kơl, ăp rmôt ƀư nau kan tăch rgâl jêng dŏng tâm nau kan êng, sŏk gay ma dŏng dơm. Aơ lah nau ma ăp ntŭk kan n’gâng kan bah n’gor Dak Lak ân geh ƀư ân rjăp gay ma leo luh ăp nau kan mât tơm prăk ân geh săk tam lơn./.

Nŭih rblang: H’Thi