Dôl rwăt du đêt ndơ kro an Tết ta siêu thị Coop Mart nkual ƀon têh Buôn Ma Thuột, yuh Võ Thị Mỹ Hương, ta phường Tân Lợi, nkual ƀon têh Buôn Ma Thuột an gĭt, năm aơ yor wăng sa jêr jŏt jêng rnăk wâl yuh knŭng rwăt ăp ndơ khlay.

Rnăk wâl rwăt ăp ntil ndơ khlay gay dŏng Tết, yor Covid hôm e rmeh nuĭh ƀon lan n’hŭch năp rwăt, knŭng ăp ndơ khlay dơm.

Hăn du rwăch ta chợ nklang nkual ƀon têh Buôn Ma Thuột dơi saơ, ăp ntil ndơ rhŏ an Tết lĕ dơi ăp nuĭh tăch mpla tăch đah âk ntil uĕh măt uănh, yơn lah rnoh nuĭh rwăt hôm e đêt.

Yuh Lê Thị Thùy Như, ta nkual C, chợ nklang nkual ƀon têh Buôn Ma Thuột geh 15 năm tăch ăp ntil ndơ dŏng an gĭt nuĭh rwăt năm aơ đêt ngăn.

Mô geh rlău năm e, ntĭt nsa năm e tăch tâm 5-7 rkeh, năm aơ ri knŭng 2 tât 3 rkeh plơ̆ tay dơm. Năm e ndơ aơ bah 20 plơ̆ tay ri tăch na nao, yơn năm aơ mô geh nuĭh âk lơn.

 Âk ntŭk tăch ndơ ƀănh kĕo, mứt, grăp rpŭng kai geh tâm nău roh nuĭh. Tĭng wa Lương Ngọc Hoàng du hê tăch ƀănh kĕo ta chợ nklang nkual ƀon têh Buôn Ma Thuột, năm aơ nuĭh rwăt dŭt mbrơi, knŭng âk đêt tâm ăp nar dŭt pơh, wa knŭng nglăp sĭt ndơ geh 60% nkôp đah năm e, yơn đah soan rwăt kơt aƀaơ mô janh mpŏng mbra lĕ ndơ:

Rnoh rwăt mô âk ngăn, rnoh khlay ri mô geh hao. Kơt năm e aƀaơ âk đong hôm, nkôp đah năm e ri aƀaơ mô hŏ âk.

Nchroh mbơh nău hŭch nuĭh rwăt bah ntŭk tăch tâm rơh tết năm aơ, âk nuĭh tăch ta Dak Lak lĕ nchrăp mĭn joi nău ŭch, nău uănh bah nuĭh dŏng gay ndơ̆ ăp trong nchrăp, tâm pă ndoh ndơ. Du đêt nuĭh tăch lĕ pơk hvi ăp trong tăch ndơ tă bah điện thoại, website, ăp tài khoản mạng xã hội kơt facebook, zalo gay dơh gĭt tât đah nuĭh rwăt ndơ lơn. Ăp bôk nău kan n’hŭch an rnoh khlay, ndrel đah nău rgâl mhe trong ƀư mpla nsơ, nkoch mbơh ndơ dơi ăp nuĭh tăch kơt dŏng gay wăch rgum nău uănh bah năch, ntrŭt ntrôl dŏng. Yuh Nguyễn Hằng Nga, nuĭh tơm ntŭk tăch kho ao nkoch:

Năm aơ lah nsum ri mbrơi lơn, nuĭh rwăt ri hŭch âk lơn. Nuĭh bên ri tât yơn ntĭt nsa bah năp đaơ khân pơng rwăt 10 ri aƀaơ rwăt 5-6 nuĭh mha đêt lơn. Nuĭh tăch nsrôih gay mât, du đêt ndơ hao khlay yơn he mô janh hao yor nuĭh rwăt nuĭh bên rwăt bah ntơm tât aƀaơ, he n’hao tăch mô dơi jêng tăch gay mât an mât nuĭh rwăt, đê̆ đŏng geh ăp ntil mô janh tĭng hao ma he geh prăk đêt tay gay mât rlău nău jêr jŏt.

Mô knŭng ntŭk tăch ndơ dŏng đêt nuĭh ma ntŭk tăch nkao mai đêt đŏng. Wa Quang Thế Phong, du ntŭk mir mai dŭt têh ta xă Hòa Phú, nkual ƀon têh Buôn Ma Thuột nkoch, năm aơ trôk nar uĕh an ăp nuĭh tơm mir tăm mai tôch n’ha n’hanh mkra kao gay nkao dang di rơh năm mhe. Yan nkao tết năm aơ, wa Phong tăm 3.000 tơm nkao mai, đah âk rnoh năm êng êng. Aƀaơ wa dôl ndơ̆ mai tâm chậu, n’hanh ndơ̆ tăch. Yan mai năm aơ rnoh tăch bah âk lơn năm e nklăp 500 tơm, yơn mô geh sa âk.

Rnoh khlay năm aơ mô dơi kơt ăp năm yor mai ăp nkual êng khân pơng ndơ̆ âk. Ntĭt nsa du tơm năm e tăch 4 rkeh ri Tết năm aơ an uănh n’hŭch jŭr 3,5 rkeh mô lah đê̆ đŏng knŭng 3 rkeh. Ăp nuĭh tơm mir mpôl hên an rgâl êng n’hŭch gay tâm rlong đah mai ntŭk êng ndơ̆ tât. Aƀaơ mir jay gâp lĕ dơn tăch du đêt suh an nuĭh tăch, n’hanh rnoh ƀa ƀă mbra djôt quảng trường Buôn Ma Thuột tăch tâm lơ 22/12 âm êp tât.

Nuĭh ƀon lan nkrem dŏng n’hanh rgâl mpeh nău ŭch bên yan Tết bah ăp rnăk wâl ƀư ntŭk tăch tết ta Dak Lak roh nuĭh rwăt. Nuĭh tăch n’hanh ntŭk tăch nglăp ndơ đêt, bôl ndrĭ ăp nuĭh dŭt kâp nău n’gŭr răm bah ntŭk tăch tâm ăp nar êp Tết, rnôk ăp nuĭh pah kan dơi sĭt ƀon tơm n’hanh dơi geh prăk nkhôm./.