Nkual dak lêng Tây Nam bah neh dak lah ntŭk kâng n’har 3 dak Campuchia, Thái Lan, Malaysia. Aơ lah nkual dak lêng dŭt khlay, geh nău khlay mpeh njrăng n’gang neh dak, rnă njrăng n’hanh hun hao wăng sa rêh jêng kon nuĭh… Nkual dak lêng huêng khlay dja lah ntŭk cán bộ tahen Nkual 5 Tahen dak lêng dơn mât njrăng n’hanh mât chăm nău rêh an nuĭh ƀon lan lơh joi ka. Mhe aơ, Nkual 5 Tahen dak lêng n’hanh ntơh măt du đêt n’gor nkual ƀon têh mpeh bah dâng geh trong n’har wăr 5 gôl dak têh ta nkual dak lêng Tây Nam lah: gôl dak Hòn Đốc, gôl dak Thổ Chu, Hòn Chuối, Hòn Khoai n’hanh Nam Du gay rhơn Tết n’hanh ƀư an nuih n’hâm rhơn nđơr ăp cán bộ, tahen, ƀon lan. mông nar năm mhe kơt lah tât ơm lơn rđĭl đah ăp gôl dak mpeh Tây Nam bah neh dak đah nuih n’hâm yô̆ rŏng bah nuĭh ƀon lan neh kơh njuăl cán bộ n’hanh tahen, ƀon  lan ta ăp gôl dak ngai ngât.

Lễ chào cờ ta gôl dak lêng Hòn Khoai, nkuâl Ngọc Hiển, n’gor Cà Mau, ngai đah neh kơh nklăp 14km. Ta aơ lah ntŭk lor bôk năp rnôk hăn ntơm bah dak lêng mpeh luh nar tât nkual dak lêng Tây Nam Bộ, dơi ntĭt  kơt du ntŭk gŭ kâp njrăng tơm trong, nkual dak lêng n’hanh dor neh mpeh Tây Nam bah neh dak. Dơi uănh lha cờ neh dak lhêt lhơt mpăr tâm nklang trôk, mprơ n’gloh quốc ca âk nuĭh mô mpôn dơi nău rngot rhơn rnôk lor bôk năp chào cờ nklang gôl dak lêng ngai ngât:

Rnôk ndrel dâk đah ăp tahen ta gôl dak lêng, râng du rơh chào cờ gâp saơ nê lah du nău rhơn răm dŭt têh đah săk gâp nơm.

Đah rlău 150 gôl dak têh jê̆, mbrach lam nkual dak lêng Tây Nam, ntŭk mô geh nuĭh ƀon lan gŭ rêh, ntŭk dơn geh tahen gŭ dơm. Du đêt ntŭk gôl dak sop ntâng, yôk lŭ rkŭp rkâp, rsong hăn jêr. Yơn rlău dơi lĕ rngôch, ăp tahen bah mpôl tahen rada, tahen n’har bri…ti nhŭp nâp n’gâr phao da dê, 24/7 mât njrăng nkual trôk, nkual dak lêng tĭng groi nđôi ăp duk mpan n’hanh njrăng uănh kalơ trôk gay mbơh năn ngăch tât nuĭh mât bôk kan tahen; lah ntŭk nsing nâp an ƀon lan lơh joi ka rnôk mô lap geh kop ji mô lah tât rmoh rmanh ta kalơ duk rnôk dôl hăn lơh joi ka. Đại úy Nguyễn Tuấn Anh, kruanh trạm ra đa 625 trung đoàn 551 Bộ Tư lệnh nkual 5 tahen dak lêng an gĭt:

Ntŭk gŭ kâp njrăng an tĭng ƀư uĕh nău dơn kan treng nđôi ban saơ mbơh nău tât tâm nkual đăp mpăn mât lhăt ăp nău way gŭ kâp njrăng, lơn lah gŭ kâp njrăng mbơh năn ngăch nô nău ta nkual dak lêng kalơ trôk dêh tât Sở chỉ huy ăp gưl rgop mât njrăng nâp nkual dak lêng dơi tâm pă nuĭh gŭ kan.

 Dơi geh nău mât uănh bah Đảng, Ngih dak, nău nsum suan bah ƀon lan, ăp ntŭk gôl dak Tây Nam aƀaơ dôl rgâl tĭng nar, ntung trong, nhih dak si, n’glău dak, điện, nhih nti mầm non an tât nhih nti gưl 2 rdâk njêng ăp kôp, kơl nuĭh ƀon lan dơh lơn tâm nău rêh n’hanh hun hao wăng sa. Dơi Ngih dak n’hanh ngân hàng an manh dơh thuk tơm prăk, jêng aƀaơ bah meng nău kan lơh joi ka, âk nuĭh ƀon lan lơh joi ka hŏ nănh ntuh kơl mât ka gŭk nkre đah hun hao pâl nđaih jêng nău rêh nar lơn ma geh mbơm oi lơn:

Gâp saơ nău mât tui ka ri păng săk geh âk. Ta aơ geh nău dơh uĕh lah ta kuel dak lêng jêng mô geh phŭt sial, dak rsang jêng ăp ntil tui ka hao têh ngăch, săk lĭt uĕh. Năm 2024 tăch geh 10 tấn tui ka nsĭt geh sa bar pe rhiăng rkeh prăk.

Mông nar năm mhe kơt dôl tât ơm lơn ta ăp gôl dak đah ăp nău njroh mprơ, nklâm ndơ tết ntĭt êng bah ăp nkual ma mpôl hăn pah kan hŏ kơl an ăp tahen n’hanh ƀon lan ta gôl dak; n’hanh lơn lah âk nău kan mô dơi lah mô geh nklâm bánh chưng tết ta gôl dak. Bánh chưng ta aơ geh phe mƀêt, tuh ư̆r, puăch sŭr yơn dơi nklâm ma lha prit, drŭng bánh ri dơi ăp tahen ƀư ma lha đung.

Ma trong hăn rơh dja, ăp nuĭh tâm mpôl wât lơn mpeh nău rêh – wăng sa, ntŭk kơt nti, gŭ rêh, pah kan n’hanh mông nar nchrăp rhơn năm mhe, wơt Tết bah cán bộ, tahen n’hanh ƀon lan ta nkual dak lêng Tây Nam, wât lơn mpeh ăp nău rgop, n’groh an rŭ hôch bah nuĭh tahen dak lêng; mpeh nău kranh dăng bah nuĭh ƀon lan ta gôl dak lêng sial dăng, nkre mât nâp ƀư tơm dak lêng gôl dak, nkre hun hao wăng sa nsum ti ƀư ăp gôl dak jêng ăp ntŭk gôl dak nđĭr uĕh, geh jêng nklang dak lêng têh hvi bah neh dak.