Ôi 13/1 ta Hà Nội, Bộ Chính trị, Ban Bí thư ƀư tâm nchră lam dak mpeh đăt ndal hun hao khoa học công nghệ, rgâl mhe n’hanh ndơ rgâl mbrô gưl neh dak. Lah rđău đă ta rnôk tâm nchră, Tổng Bí thư Tô Lâm lah rjăp, khoa học công nghệ lah suan ntrôl n’gâng tơm tâm rnôk hun hao wăng sa rêh jêng kon nuĭh âk dak lam ntŭr neh kơl n’hao ngăch yach pah kan n’hanh suan dăng tâm rlong bah neh dak. Yor kơt nê̆, đah nău ŭch jêng dak công nghiệp têh mhe tâm năm 2030 n’hanh dak hun hao, nsĭt geh wăng sa âk tâm năm 2045, lam dak ân uănh khoa học, công nghệ, rgâl blău njêng mhe n’hanh rgâl mbrô lah suan ntrôl n’gâng tơm.

Mpeh nău dơn kan bah lam trong kan chính trị tâm let năp tay, Tổng Bí thư dăn đă, gay ndơ̆ Nghị quyết lăp tâm nău rêh du trong geh nău tam n’hanh năn ngăch; ăp gưl, ăp n’gâng kan, ăp n’gor ân klôn ti ao lăp kan, mô dơi mbrơi nkai. Tổng Bí thư đă, ndăn ƀư lôch jêh trong đă tĭng, trong kơl tâm năm 2025, lơn ma ơm lơn ma uĕh ân ƀư wat jêh rgâl nkra, kơi ntop mô lah n’gluh an dŏng mhe ăp quy định pháp luật, trong đă tĭng, trong kơl, droh rklaih lĕ ăp kô̆ yơn kol khan, mpêr n’gar nking kol gay hun hao khoa học, công nghệ, rgâl blău njêng mhe n’hanh rgâl mbrô, n’gluh lĕ suan blău njêng mhe, ntrŭt nsôr nănh mĭn, nănh ƀư, nănh dơn nău kan.