Rnôk aơ, nau rvăt ndơ jêh ri dŏng điện thoại (Smartphone) quét mã QR trok prăk mô lah trok prăk đah chuyển khoản hŏ geh âk ngăn tâm ăp ntŭk tăch ndơ, ngih chợ tâm nkual ƀon têh Buôn Ma Thuột. Wa Đinh Thị Thanh, 60 năm, tâm Phường Tự n nkoch, âk năm bah năp nơh rnôk hăn chợ mô lah hăn rvăt ndơ ri nơm leo prăk măt gay ma rvăt. Yơn lah, bơi tât 2 năm ma aơ, ăp nau kan tăch rvăt ndơ kơt lah wa mô hôm dŏng prăk măt tay ôh, rgâl ma nê lah dŏng điện thoại gay ma quét mã QR mô lah chuyển khoản. Wa ân lah, nau kan trok prăk kơt rnôk aơ lah nau ueh ngăn:

            ‘Gâp ndơn prăk khay ntơm bah kăl e tât nrôk aơ ri kŏ geh bu njoăl trong tài khoản, bah năp nơh lah hăn chợ mô lah siêu thị ri nơm đă kon, sau hăn rhuăt prăk tâm ATM. Yơn rnôk aơ, moh dnơ rvăt tâm chợ mô lah siêu thị kŏ quét mã QR lĕ jôm, mô kâp hăn rhuăt prăk măt tay ôh. Gâp hăn chợ Phan Chu Trinh, Tân An, mô lah chợ tâm nkuăl ƀon têh Buôn Ma Thuột, ăp nŭih bu tăch ntơm bah byăp, puăch, ka, play, kho ao ri bu kŏ mã QR lir ma n’ha rđaih mô lah tâm điện thoại bah khân păng gay ma năch dê trok tĭng. Gâp saơ ueh ngăn, mô klach rmeh, mô tŏng rnôk trok ôh”.

            Wa Nguyễn Thị Liên, jêh bơi tât 20 năm tăch kao, play tâm chợ Tân An, nkual ƀon têh Buôn Ma Thuột mbơh, wa kơt tĭng nti nau dŏng trok, rvăt ma mô kâp ân prăk măt bah ăp nŭih bu êp nê. Nau trok prăk kơt aơ rklaih âk ngăn nau ân nŭih tăch, ndrel ma nŭih rvăt:

‘Lah nsum năch bu rvăt ma trok prăk măt nơm mplŏ nsĭt plŏ hăn kŏ jŏ dŏng. Geh âk rnôk năch rvăt ndơ knŭng 20 rbăn mô lah 30 rbăn, jêh ri bu ndŏ 500 rbăn ma nơm mô geh prăk ri nơm lŏ hăn rgâl, jêr ngăn. Nau quét QR gay ma trok ri nơih lơn. Nơm ŭch nau trok prăk bah QR ri ân geh ntrŭnh ƀư âk lơn, gay kônh wa ƀon lan geh nơih dŏng, ueh rlau bah năp nơh đŏng. Yor bah năp nơh geh rnôk nơm mplŏ prăk mô tâm di, ma quét mã ri mô klach geh tih ôh, ueh lơn rlau ma ân prăk măt”.

            Tĭng ngân hàng ngih dak Việt Nam ntŭk kan tâm Dak Lak, jêh bơi tât 2 năm ƀư “Bôk nau kan hun hao nau trok prăk mô kâp ân prăk măt tâm Việt Nam lvang năm 2021-2025” tât rnôk aơ, ăp ngân hàng tâm Dak Lak pơk rlau 2.600 rbăn tài khoản ân năch. Nau hun hao bô nŭih dŏng prăk bah điện thoại geh 50-80%/năm, rnoh nŭih dŏng, ntŭk kan dŏng trok mô kâp prăk măt bah trong điện tử geh 40%. Ăp nau kan văng sa, ntĭm nti hŏ geh n’gul rnoh nŭih, ntŭk kan trok prăk điện tử, trok prăk ngih dak si, ndơ dŏng ma mô kâp ndŏ prăk măt.

            Wa Phùng Thị Thơm, Groi jrâu kan Công nghệ thông tin, Sở Thông tin-Truyền thông Dak Lak nkoch, lam n’gor ndâk geh 1.426 ntŭk kan công nghệ mrô ƀon lan, đah 9.278 nŭih râng. Ăp ntŭk aơ mra kơl an nau ntrơn rgâl mrô, cài đặt định danh điện tử VneID, ntĭm mbơh rnăk ƀư kan tăch rgâl nŭih ƀon lan nkra tài khoản ndrel nộp hồ sơ dŏng nau kan trực tuyến...wa Thơm, mbơh:

            “UBND n’gor hŏ ndâk ăp rmôt công nghệ mrô nsum mpôl tă bah n’gor tât nkuăl, xã ndrel ăp thôn, ƀon mô lah tổ dân phố. Năm 2024, n’gâng kan mra ntrŭnh rƀŏng ndrel ntĭm mbơh tât ăp xã, phường tâm ăp rmôt công nghệ mrô nsum mpôl aơ ƀư ueh nau kơt nau kan ntĭm nti ân nŭih ƀon lan trok prăk ma mô kâp ndŏ ma prăk măt”./.