N’gor Dak Lak (jêh nglăp nsum đah n’gor Phú Yên) geh rnoh neh rlău 18.000 km2, rnoh nuĭh rlău 3,34 rkeh nuĭh, pơk luh hun hao mhe đah ƀư tơm boăt nthoi Tây Nguyên n’hanh Duyên hải Nam Trung Bộ. Nău nkra rgâl dăp rgum Dak Lak lvang 2021-2030, uănh tât năm 2050 dơi n’gluh an gay uănh lah jâng nsan wăng sa, ntŭk chính trị ta ntŭk; nkre ƀư săk rnglăy ăp trong boăt nthoi nkual, rgum lăp lam ntŭr neh. Ăp nău rƀŏng, trong hun hao dơi kơp uănh tĭng trong rĭng tâm ban, tâm di đah ăp nău kan, n’hanh ƀon lan, tâm di đah nău geh ngăn, rƀŏng tât hao jêng 11-11,5% lvang 2026-2030. Tĭng Groi Giáo sư, Tiến sĩ Lê Xuân Bá, tă ƀư Kruanh ntŭk mĭn njêng mât uănh wăng sa Trung ương, hun hao công nghiệp an dơi uănh lah kơl lor bôk năp tâm rnôk nkra rgâl dăp rgum bah n’gor.

Dăp rgum hun hao công nghiệp bah n’gor Dak Lak mô hŏ dơi uănh tât di rnoh. Năm bah năp n’hanh 2-3 năm tât aơ tay Dak Lak jêr hun hao công nghiệp kơt nău mpŏng, aơ lah n’hêl na nê̆, yơn aơ lah dăp rgum lvang 2021-2030 n’hanh uănh tât năm 2050, ri Dak Lak an geh uănh khlay hun hao công nghiệp. Yor ŭch ndrŏng ri an dăp rgum hun hao công nghiệp ta rnoh tâm di.

Rgop an dăp rgum bah Dak Lak, âk nuĭh way kan, nuĭh mât uănh n’hanh ăp doanh nghiệp an lah, dăp rgum an ƀư kloh lơn tâm rgop ntŭk ntô ntung trong n’hanh nuih n’hâm hao jêng đah Tây Nguyên n’hanh Duyên hải Nam Trung Bộ. Nkre n’hao tâm rgop nkual tă bah ntung trong têh, logistics, ndrâm dak lêng, mpông n’har n’hanh pâl nđaih hăn ndrel đah mât ndrăy văn hóa ta ntŭk. Groi Giáo sư, Tiến sĩ Nguyễn Thị Phương Trâm, Viện trưởng Viện Văn hóa Việt Nam, đă Dak Lak ndâk njêng trong hun hao pâl nđaih tĭng tâm trong mât ndrăy n’hanh mât na nao nău khlay văn hóa ta ntŭk.

Tâm dăp rgum n’hanh nkra rgâl dăp rgum, he an uănh khlay lơn tay ntŭk ntô văn hóa ăp rnoi mpôl đêt. Aơ lah nkô̆ nău khlay, ƀư jêng ntĭt mpơl nău khlay văn hóa bah Dak Lak lah êng n’hanh Tây Nguyên lah nsum. Ăp nău khlay, ăp ntĭt mpơl văn hóa rnoi mpôl đêt an geh ntŭk văn hóa êng gay nsum mpôl gŭ rêh, mât ntŭk ntô văn hóa nĕ gay hun hao n’hanh mât ndrăy.

Djăt nău rgop dŭt n’hâm, geh nău khlay bah ăp nuĭh way kan, nuĭh mât uănh, doanh nghiệp ta rgum nchră, kruanh n’gor Dak Lak an gĭt mbra kơp uănh tay, uănh lah lĕ rngôch ăp nău geh, nău dơh kơt ăp nău hôm e, mô hŏ ƀư jêh nchrŏng trong hun hao tâm di đah lvang mhe jêh nglăp nsum. Dak Lak mĭn lah nău nkra rgâl dăp rgum an dơi ƀư khlay, tâm ban, đăp mpăn mât na nao nău geh hao jêng, n’hao tâm rgop nkual n’hanh dŏng săk rnglăy ăp ndơ hun hao. Tĭng wa Đỗ Hưu Huy, Kruanh UBND n’gor Dak Lak, nău nkra rgâl dăp rgum mbra ơm dơi mbơh an UBND n’gor uănh mĭn tay, uănh an tâm năm tât.

UBND n’gor đă ăp n’gâng kan, nău kan, ƀon lan, ngih pah kan geh tât n’hanh tâm rgop ntŭk kan mbơh ntĭm rgum nuĭh kan, djăt tŏng ăp nău rgop bah đại biểu gay tŏng ăp samƀŭt rhăch nău dăp rgum dơi tŏng nău đă. Nkre, n’gor mpŏng ŭch geh tay ăp nău rgop bah ăp nuĭh way kan, nuĭh khoa học n’hanh kruanh ơm n’gor tă bah ăp rơh tâm năm tât.