Sở Công thương n’gor Dak Lak n’hanh Điện lực Dak Lak mhe ký ton  nău way tâm boh kan nsum tĭng ƀư nău ntrŭnh mbrô 20 năm 2023 bah Thủ tướng Chính phủ mpeh n’hao dăng mpêt nkrem điện lvang năm 2023-2025 n’hanh ăp năm bah kơi nê.

Tĭng nău tâm ton, bar đơn vị mbra kan nsum tâm nău rdâk njêng n’hanh an ƀư ăp trong nchrăp, trong nkra tĭng ƀư gay đăp mpăn pă an điện, mpêt nkrem điện n’hanh hŭch bah roh huach điện năng; nsrôih ăp năm mpêt nkrem geh dŭt đêt 2% lĕ rngôch rnoh âk điện dŏng ta Dak Lak. Bar ding mbra ntrôl dăng ăp nău kan nkoch trêng mpêt nkrem điện; nsŏng kơl, dăn đă UBND n’gor nkhôm rnê ăp nuĭh, ăp mpôl kan tĭng ƀư jăp n’hanh geh trong nkra đah ăp đơn vị tih quy định mpêt nkrem điện. Sở Công Thương n’gor Dak Lak n’hanh Điện lực Dak Lak ƀư ôp uănh, groi nđôi tay nô nău dŏng điện đah ăp ntŭk dŏng ŭnh nar âk. Ta năp măt, bar đơn vị hŏ rgŏ jă, an ƀư  rơh tâm rlong “Rnăk wâl mpêt nkrem điện năm 2024”, đah nău ŭch rdâk njêng rup gui rnăk wâl geh trong gŭ rêh srăch uĕh, rsang rnglăy ma trong dŏng mpêt nkrem điện đăp  mpăn, geh nău tam.