Ntơm bah ôi ơm, âk ngăn ƀon lan xã Hoà Thịnh ndrel xã êp nê hăn tât Ntŭk nkah ndray gay ma tâm ntĭnh đah ăp tahen. Ăp nau tâm nhŭp ty, tâm ut rngot klâng ndrel ma dak măt truh ƀư jêng nau tâm nting geh nau rnôk, lôch bơi tât 2 khay ƀư nau kan kơl rklaih nau khuch bah phŭt dak lip lơh. Hăn tă bah ơm, Nai Nguyễn Thị Hồng Nhị, nai ntĭm kon se ngih săm ƀŭt mầm non Hoà Thịnh, ntŭk gŭ nde bah ăp rmôt tahen, kŏ kơt lah ntŭk geh nau tâmboh đah nai ntĭm, kon se nti ndrel tahen, ngơi:

‘Tâm rnôk cán bộ tahen gŭ tâm ngih săm ƀŭt ri nau tâm boh tâm dăch ngăn ma ăp kon se nti, săk gâp ndrel ăp nai ntĭm kŏ ndri đŏng, ŭch rong ma ăp kônh tahen, aƀaơ hin tâm ntĭnh ăp kônh tahen hăn sĭt ri klâng ngăn. Nar aơ lah nar dŭt mâp ăp kônh tahen hôm, nau khuh n’gor mô hôm, ăp nar tăch ndơ tâm chợ ri kŏ mô hôm saơ ăp kônh, hôm ăp trong hăn bah ƀon lan ri roh hôm rup gui ăp kônh tahen, jêh aơ tă ngăn lah klâng ngăn. Tâm nuih n’hâm mro nkah nau kơl an bah ăp kônh tahen’.

Lah ngoai tâm ăp rmôt kan hăn tâm êp ma ƀon lan ntơm bah ăp nar mih phŭt, Trung uý Phan Ngọc Dân, Trung đoàn 584, N’gâng kan rđau tahen n’gor Dak Lak, mbơh rmôt kan nkre ƀư nau kơl an, nkre kơl rklaih nau khuch ndrel ndâk tay ăp ngih kơl an ƀon lan tâm nkuăl dak băm:

‘Nar aơ tâm mông tâm ntĭnh, kônh wa hŏ dâk tă bah 5h ôi gay ma gâm sa kơl an hên, jêh rnôk sông sa ri kônh wa nhĭm âk ngăn, mô janh luh ta aơ gay ma tâm ntĭnh ôh ri gâp saơ yŭngăn đŏng. Rnôk sĭt tâm ntŭk kan ngăn lah gâp ndrel ăp đồng chí tahen ta aơ mra nklâng ngăn tâm ăp nar khay tâm dăch ma kônh wa ƀon lan ta aơ rlet rnôk phŭt dak lip hô gay ma ndâk tay nau rêh ân kônh wa”.

Ntơm lơ 1/12/2025 tât lơ 10/1/2026, rlau 204 rbăn tŏ cán bộ, tahen Quân khu 5, N’gâng kan rđau tahen n’gor Dak Lak ndrel rmôt dân quân tự vệ đah bơi tât 6000 ndơ dŏng geh rgum, ƀư jêng 331 rmôt, ndâk 331 ngih kơl an ăp rnakư rlâm lĕ ndrel nkra nâp 90 ngih djơh khuch hô tâm 13 xã phường. Ndrel ma nê, ăp rmôt hŏ tâm grop hăn ntrơn geh 11.300 rnăk, đah 36 tbăn nŭih tât ntŭk gŭ đăp mpăn, rep 207 ngih săm ƀŭt, 42 ngih dak si, 182 ngih rƀŭn rgum, 38 ntŭk kan UBND, rklaih ndâk 50 km trong hăn ndrel kơl an 3.500 rnăk rep kloh, đăp mpăn nau rêh. Êng trong hăn, trong hoch dak kơl an tŏ ân yan sial puh, ăp rmôt hŏ ntrŭnh leo 50 rmôt, 98 ntŭk, ƀư jêh 63.220 mét trong.

Groi Kruanh UBND n’gor Dak Lak, Đào Mỹ lah rjăp ăp nau khlay ngăn bah rmôt tahen tâm rnôk rdâng ndrel rklaih đah nau khuch bah phŭt dak lip:

‘Rup gui tahen hăn nsum ma ƀon lan rêh tâm ăp nar bol ma âk nau jêr jŏt ak r’ah, yơn ueh lăng nau tâm bih đah tahen ndrel ƀon lan, nê lah ăp rup, ăp nau kan prêh ueh. Gâp ntoh măt ân rđau kan n’gor lah ueh jru ngăn, nâp ngăn tât ăp cán bộ tahen tâm rmôt tahen lah nsum ndrel tahen lah êng tâm 2 khay rlau aơ ndrel ngăn lah ‘nau kan ndăng Quang Trung” ndrel nar aơ he tât ta aơ gay mbơh nau tâm ntĭnh”.

Lôch nar tâm mâp, Đại tá Cao Văn Mười, Groi Rnâng kan rđau kan Quân khu 5 lah rjăp “Nau ndăng Quang Trung” mô êng leo tât ăp ngih nâp nâl, ma hôm lơi an drăp ndơ mpeh nuih n’hâm jru mpeh nau tâm boh tahen bon lan, mpeh nau dăng bah nau tâm kơl ndrel nau tâm rnglăp:

‘Ăp ntŭk ƀư, ăp chor ngih geh jêh ndâk mô êng lah drăp ndơ ma nê lah nau ntoh bah nau rnơm, bah tahen ƀon lan nâp, lah nau duh răm bah nau tâm boh rnoi mpôl lah nau lah rjăp ntŭk geh ƀon lan mâp jêr ri tâm nê geh tahen. Nau kan ndăng Quang Trung lĕ lôch hŏ nthoi tay nau vay tahen tă bah ƀon lan ma luh, yor ƀon lan ma kơl bah tahen Wa Hồ, nchih nkoch tay nau ueh m’ak tâm nau rêh mhe; mpơl saơ kloh n’hâm dăng bah nau tâm rnglăp, nau lăp kan bah lam ntrong kan chính trị ndrel ƀon lan. Nau kan ndăng Quang Trung lôch jêh, yơn nau nkah mpeh nau tâm boh kon nŭih, ăp ngih nâp ndrel ngăn lah nau tâm boh tahen ƀon lan nâp nâl”./.