Ƀon ƀư miến Chi Lăng ta phường Khánh Xuân, nkuăl ƀon têh Buôn Ma Thuột, n’gor Đăk Lăk ang ŭnh lĕ măng ma nar gay ma ndăn ƀư ndơ Tết. Wa Hà Văn Thích, ngoăy tâm âk rnăk geh rlău 20 năm ƀư miến way ơm an gĭt. Năm aơ, ăp ndơ Tết hao klâp ma 40% đah nar êng n’hanh hao 10% đah năm ba năo. Gay ma tâm di đah nău ŭch nuĭh dŏng ndơ, ntŭk nkra ƀư bâh wa an geh n’hao nuĭh kan, n’hao mông nar măng nar gay ma năn ƀư ndơ ndơ̆ an bu ta năp Tết Nguyên đán. Đah Công ty cổ phần Ban Mê Green Farm, du doanh nghiệp way tăm n’hanh tăch blân srat ta Đăk Lăk lĕ dôl n’hao nău pĕ lêh gay ma kơl an ntŭk tăch rgâl Tết. Ndrel đah pă an blân srat rêh, công ty hôm nha mbơh tơih ăp ntil ndơ nkra ƀư kơt: nkret blân srat tâl ta ngŏ n’hanh blân srat vâr sơh, dak mam blân srat, ƀư dak srat bâh blân srat tâm di gay ma pă ndơ ta rơh Tết.