Ta rơh rƀŭn nchră, ăp đại biêủ n’hanh kon hoc lĕ geh uănh video mbơh tơih, djăt bôk nău mpeh njrăng, rdâng ndok nhưạ, tât râng pla n’hơ ta ăp ntŭk mpeh rup, nău nchih mbơh tơih mpeh njrăng, rdâng ndok nhưạ. Nău kan gay ma mbơh tơih Bôk nău kan “Ntrôl dăng nău kan mbơh tơih mpeh njrăng, rdâng ndok nhưạ lvang năm 2021-2025” bâh Thủ tướng Chính phủ, nkre ƀư na nê̆ nău ntĭm đă bâh UBND n’gor Đăk Lăk tâm nău n’hao gĭt vât, rgâl nău kan mât ntŭk gŭ rêh, ngăn lah tâm ntŭk ngih nti. Di rơh aơ, Rnâng kan leo kan lĕ nglôch lôch n’hanh pă giaỉ rơh tâm rlong mĭn kan mpeh njêng tay ndok nhưạ, đah 17 ndơ nkhôm rnê an lĕ rngôch ăp ntŭk kan, nuĭh kan geh ntil ndơ mĭn kan ueh, geh nău tâm di ngăn. Geh giaỉ nhất đah tác phẩm rup “ Kao si an nai nti” geh ƀư gri , ndơ tong ngêt nhưạ n’hanh dŭng nilông lĕ tă dŏng, oh Nguyễn Ngọc Thảo My, kon hoc ta Ngih nti THCS Nguyễn Hưũ Thọ, phường Bình Kiến, n’gor Đăk Lăk nkoch.

 “Oh saơ rơh tâm rlong aơ dŭt khlay ngăn, mô dơn kơl an hên n’hao nău gĭt vât mĭn rklă kan, ma hôm nha kơl an hên gĭt dơn nău kan bâh hên nơm đah mât ueh ntŭk gŭ rêh. He an geh mât ueh ntŭk ntô, dŏng ndok nhưạ an tâm di trong kan”.