Kêng măng lơ 6/6, ta tiểu khu 1187, ta bri ngih dak mât Chư Yang Sin, ntŭk kan mât rong rveh, mât kơl mpô mpa bri n’hanh mât uănh bri mât ta Đăk Lăk, tâm rgop đah bri ngih dak mât Chư Yang Sin, ntŭk kan kiểm lâm nkuăl Krông Bông ƀư m’ơk 7 ntil mpô mpa bri khlăy sĭt ta bri.

7 ntil mpô mpa bri geh 3 mblâm klăn neh jâk klâp ma 30kg, 1 mblâm klăn rvoanh jâk 14kg, 1 mblâm dôk chiăng sŭr jâk 8kg n’hanh 2 mblâm nkôn jâk 2,6kg. Aơ lah ăp ntil mpô mpa bri khlăy geh ăp ntŭk kan têh ta n’gor Đăk Lăk đă nuĭh ƀon lan ndơ̆ m’ơk sĭt ta bri. Bâh tă geh mât chăm n’hanh mât rong ta ntŭk kan mât rong rveh, ntŭk kan mât kơl mpô mpa bri n’hanh mât uănh bri Đăk Lăk, ăp mpô mpa bri lĕ ngăch dăng, mât đăp mpăn nău dơi rêh gay ma sĭt rêh tâm bri.