Kêng măng ntri (26/1), ta nkual ƀon têh Buôn Ma Thuột, UBND n’gor Dak Lak ƀư sơ kết 5 năm tĭng ƀư “Nar lam ƀon lan njrăng n’gang n’har bri” n’hanh mpư rnê 56 mpôl, ăp nuĭh geh nău dơi dŭt jăp blău tâm rdâk njêng nkual n’har bri nâp dăng, lvang năm 2019 -2024.

Prăm năm aơ, ăp pôih n’har bri, đơn vị tiăr nti n’gor Dak Lak hŏ ntop kơl 40 kon se nti geh nău rêh jêr jŏt tâm ăp bôk nău kan “Ndơl jâng oh tât nhih nti” n’hanh “Kon mât Pôih n’har bri”; leo ƀư kơl ƀon lan 8.360 nar luh kan; rdâk njêng 86 jay tâm rnglăp rnoh khlay 8,6 rmen prăk. Wa Võ Văn Cảnh – Groi kruanh UBND n’gor Dak Lak nchih nkah, mpư rnê mpôl tahen n’har bri, ƀon lan ta nkual n’har bri, ăp nuĭh, ăp mpôl kan, hŏ geh nău dơi ƀư jăp blău nău kan rdâk njêng nkual n’har bri  nâp dăng lvang năm 2019-2024. Ntik hvi nău dơi hŏ geh, wa Võ Văn Cảnh lah rjăp du đêt nău dơn kan rgum tơm tâm pah kan njrăng n’gang n’har bri tâm let năp tay./.