N’gor Dak Lak dôl mbrôn suan ƀư wat jêh rdâk mon jay an nuĭh ƀon lan geh trôk nar lơh, nsrôih ndơ̆ jao bah năp nar 15/1 tĭng nău rđău đă bah Thủ tướng Chính phủ. Tât aƀaơ, n’gor hŏ nkra lôch jêh 892 mblâm jay khuch jru tă bah trôk nar lơh. Tâm lĕ rngôch rnoh 606 mblâm jay ân mon mhe, n’gor hŏ ƀư wat jêh 362 mblâm jay n’hanh jao an 311 mblâm jay. Ăp mblâm jay hôm ƀa ƀă hŏ ƀư lôch 2/3 rnoh âk nău kan.

Êng 16 mblâm jay tâm ntŭk ntrơn du ntŭk gŭ mhe, n’gor nchrăp jao an tâm nar 19/1. Tĭng UBND n’gor Dak Lak, 16 mblâm jay dja tâm ntŭk ntrơn du ntŭk gŭ mhe kuĭh lâng neh, nkre manh ƀư trong gay rdeng ndơ ƀư n’hanh kâp bê tông sơh nâp; tâm rnôk trôk nar  mih âk tâm bah ri aơ nơh khuch tât rnoh ngăch ƀư đŏng. Aƀaơ n’gor Dak Lak dôl rgum lĕ nuĭh kan, tâm pleh âk nuĭh ƀư gay ơm lôch jêh ăp mblâm jay kơl nuĭh ƀon lan đăp mpăn nău rêh.