Kêng măng 15/12, Rnâng kan Tỉnh ủy Dak Lak hŏ ƀư Tâm nchră Ban Thường vụ Tỉnh ủy tâl VII gay uănh năl lam lĕ rngôch nô nău wăng sa – rêh jêng kon nuĭh năm 2025, nkre an nău rgop mpeh trong tor nchrăp hun hao n’hanh trong nchrăp ntuh kơl năm 2026. Tâm nchră uănh năl, năm 2025 lah du năm âk ntul rlong, rnôk rnoh ngăch hun hao Lĕ rngôch ndơ geh ƀư (GRDP) ta n’gor Dak Lak nchroh geh tât 6,68%, mô dơi tât trong nchrăp tor lor 8% hŏ ndơ̆ luh. Nkô̆ lah tă bah rnoh ngăch n’gluh tơm prăk ntuh kơl hôm mbrơi, dơn geh tât 43% trong nchrăp; lĕ rngôch tơm prăk ntuh kơl lam rêh jêng kon nuĭh geh 82,5%. Ntop tâm nê, n’gor geh tât khuch jru hô bah trôk nar lơh, dak bŭk kêng dŭt năm. Bol mô dơi tât rnoh hun hao, yơn năm 2025 ta Dak Lak hŏ năl geh ăp njuat hun hao wăng sa – rêh jêng kon nuĭh uĕh.

Rđĭl đah năm 2024, nsĭt geh prăk ngân sách ngih dak nchroh geh 16.490 rmen prăk, hao 17%, nsĭt geh tăch n’gluh nklăp 2,8 rmen USD, hao 26%. Nsing ta nău rblang năl nô nău, Ban Thường vụ Tỉnh ủy hŏ tâm ban ŭch tor luh trong nchrăp hun hao GRDP năm 2026 tât 10% (rnoh hun hao bar mbrô), mpơl nău nsrôih chính trị âk gay nsan tay jâng hun hao lôch bah trôk nar lơh. Tâm trong tor luh dja, nkual công nghiệp – rdâk njêng dơi ntrŏng năl tay lah suan ntrôl hun hao tơm, đah rnoh hun hao nchrăp rlău 19%; lâm nghiệp n’hanh tui ka hao tay rlău 5%; rhŏ dŏng hao nklăp 9,5%. Wa Lương Nguyễn Minh Triết, Ủy viên dự khuyết Trung ương Đảng, Bí thư Tỉnh ủy Dak Lak, đăp ăp n’gâng kan tâm n’gor ân ntrŏng năl kloh ăp suan ntrôl hun hao mhe tĭng ntil trong kan, nkre dâk hao tay lôch khuch khat trôk nar lơh đah hun hao ntŭk ntô ndơ dŏng, ŭnh nar, công nghiệp nkret njêng, rhŏ dŏng – pâl nđaih gay tât rnoh hun hao bar keh mbrô.

“Ngoăy lah ân rgum n’hao âk tơm geh, ntrôl dăng njrăng bah roh huach tơm ndơ sŏk geh tât n’hao dăng rgâl mbrô, njêng trong dŭt dơh an nuĭh ƀon lan ndơ̆ prăk sŏk soăy; tâl bar lah ân n’hao dăng ăp trong nkra ƀư rgum tơm ndơ ntuh kơl lam rêh jêng kon nuĭh, ta nuih n’hâm nê ân ntrôl ngăch ntuh kơl; Ân droh rklaih ăp trong nchrăp wăk kol; rgum ntrôl ngăch ăp trong nchrăp kan rgum tơm. Gay ƀư dơi nău nê ri ân rgum âk an dăp rgum, lơn lah dăp rgum n’gor.”