Dơn hôm bar pe pơh đŏng lah tât Tết Bính Ngọ 2026, nău ŭch rvăt năp ăp ndơ dŏng sa Tết bah nuĭh ƀon lan ta n’gor Dak Lak ntơm hao âk. Gay mât njrăng nău dơi bah nuĭh dŏng ndơ, n’gâng kan dơi kan ta Dak Lak hŏ n’hanh dôl pơk rơh njrăng, n’gang ndơ rlăm, ndơ mô nâp uĕh, mô săk kah; n’hao dăng mât kân tơm ndơ luh, lơi ir dŏng ndơ, nkre bah ir nău roh huach sŏk soăy tâm rơh rvăt năp âk ndơ kêng dŭt năm.

Ăp nar dja, 5 nuĭh tâm Rmôt pah kan mbrô 1 – Rmôt mât uănh ntŭk tăch rgâl mbrô 4, Chi cục Mât uănh ntŭk tăch rgâl Dak Lak way n’hao âk mông tâm pleh pah kan bah dih mông. Yuh Nguyễn Thị Minh Hạnh, Nuĭh trêng nđôi Rmôt pah kan an gĭt, ăp nuĭh dôl rgum ôp uănh, treng nđôi nău kan ƀư njêng, tăch rgâl bah rlău 1.800 ntŭk tăch rgâl ta Buôn Ma Thuột.   

“Rmôt pah kan hăn tât ăp rnăk tăch rgâl, lah ăp mpôl, ăp nuĭh gay nkoch trêng, nkah nău tĭng jăp di ăp quy định bah pháp luật tâm nău kan ƀư njêng, tăch rgâl. Tâm nê, đă rnăk rnôk n’hao ndơ tăch ân đăp mpăn nâp uĕh, săk kah, tơm luh kloh rvah, lĭr nkrêp n’hanh tăch di rnoh khlay, mô an geh nău n’hao rnoh khlay mô tâm di, nkrâm ndơ tăch kâp hao rnoh khlay; nkre lor nchrăp tơm ndơ tăch, đăp mpăn pă tŏng tơm ndơ tăch tâm rnôk Tết Nguyên đán.”

Wa Võ Thị Bạch Nga, nuĭh tơm tăch ndơ ta phường Tân Lập, n’gor Dak Lak nkoch, djăt ma ăp rnôk bah năp Tết Nguyên đán ăp năm, nhih pah kan dơi kan hăn tât nkoch trêng, rgŏ jă, đă rnăk ký ton tĭng ƀư nău tăch rgâl kloh rvah, mbơh lam, di quy định.

“Bôk khay 1/2026, Chi cục Mât uănh ntŭk tăch rgâl hŏ ntop kơl, mbơh nti, đă rnăk ký ton tĭng ƀư bôk năp lah: Rvăt n’glăp ndơ geh tơm luh kloh rvah ntơm bah bôk năp, đăp mpăn nâp uĕh, săk kah mô hŏ lĕ nar dŏng; Nkhêp geh hao rnoh khlay ri ân tĭng di quy định gâl rhiăng lĭr nkrêp. Way ơm geh ndơ tăch gay rhŏ dŏng an năch…”

Tĭng ƀư nar njrăng n’gang, ndơ rlăm, ndơ mô nâp uĕh, mô săk kah bah năp, tâm n’hanh bah kơi Tết Nguyên đán 2026 tĭng nău rđău đă bah Ban rđău đă 389 n’gor Dak Lak, ntơm bah n’gul khay 12/2025 tât aƀaơ, Chi cục Mât uănh ntŭk tăch rgâl n’gor Dak Lak hŏ du rơh luh hăn kan, ôp uănh ƀư njêng, tăch rgâl lam n’gor, rgum tâm ăp ndơ tăch dŏng sa khlay rhŏ dŏng Tết. Lôch hăn ôp uănh, mpôl kan hŏ ban saơ, nkra rmal 242 ntŭk tih, rmal rlău 2,3 rmen prăk; nkre sŏk mplơ̆, su jăng ăp ntil ndơ tih rnoh khlay rlău 700 rkeh prăk.

Wa Vương Minh Sơn – Chi cục trưởng Chi cục Mât uănh ntŭk tăch rgâl n’gor Dak Lak an gĭt, bol du đêt ntŭk mpeh luh nar geh tât khuch bah dak bŭk, yơn nkual mpeh nhâp nar ndơ tuch tăm jŭr geh, ƀư suan rvăt rnôk Tết nchrăp hao ntơm bah 25–30%. Chi cục mbra rđău đă tay ăp rmôt kan n’hao dăng hăn ôp uănh, mât đăp mpăn ntŭk ƀư njêng, tăch rgâl ta ntŭk tăch rgâl way ơm n’hanh ta trôm mạng.

“Mpôl hên kan nsum đah mpôl Cảnh sát wăng sa Công an n’gor, Sŏk soăy n’gor an ƀư du rơh nău ôp uănh, groi nđôi tâm khlay kan dja; nkre n’hao lĕ rngôch mpôl kan gŭ kâp ndăng măng nar, kơp lĕ ma nar Prao n’hanh nar pơh, gay grêt dăch ntŭk tăch rgâl tâm ban kơt dơn tơm nău mbơh lư đŏng. Nău ŭch lah mô an geh ndơ rlăm, ndơ mô nâp uĕh, mô săk kah, ndơ mô gĭt kloh tu tơm luh tăch rgâl, bah nê đăp mpăn an nuĭh rvăt năp geh ăp ndơ săk kah nâp uĕh tâm rnôk Tết dja.”

Lah mpôl kan n’gâng tơm tâm rơh hăn njrăng, n’gang ndơ rlăm, ndơ mô nâp uĕh, ndơ mô săk kah tâm rnôk dja, rlău du khay aơ, Jrô Cảnh sát wăng sa Công an n’gor Dak Lak hŏ lơh chrai 274 tơ̆ nău tih, rmal 279 nuĭh tih geh tât ndơ mpăng tăch, ndơ rvăt n’glăp hôch, ndơ mô nâp uĕh; tăch rgâl ntil ba mô kloh tu tơm luh; ƀư njêng, tăch rgâl dak si ndrŭng rlăm, mhât, pháo rvăt n’glăp hôch….Mpeh nău ntrôl dăng tay njrăng, n’gang ăp nău tih bah năp, tâm n’hanh bah kơi Tết Bính Ngọ, Trung tá Trịnh Ngọc Hà, Groi jrô kan Cảnh sát wăng sa, Công an n’gor Dak Lak mbơh nkoch, jrô kan hŏ ntrŏng kloh nău dơn kan rgum tơm gay an ƀư.

“Mpôl Cảnh sát wăng sa công an Dak Lak lor nchrăp ƀư jăp tay pah kan gĭt năl bah ơm, bah ngai, bah tâm dâng, lĕ ma ta ntŭk ngăn n’hanh ta trôm mạng. Rgum tơm lah ăp njăr trong quốc lộ, tỉnh lộ, lơn lah trong Quốc lộ 1A hăn rlău ăp n’gor lăp tâm Dak Lak, ndrel ăp ntŭk rgum tơm kơt ntŭk tăch tơm, ntŭk rgum tăch rgâl, ntŭk bun prăp, ndrâm nsrŭng ndeh, ăp ntŭk way dơi dŏng lah ntŭk rgum bun ndơ rlăm, ndơ mô nâp uĕh. Ntơm bah nê, kan nsum lhăt đah mpôl kan dơi kan ƀư ƀoi tĭng, nhŭp kân n’hanh nkra rmal gay nuĭh tih tĭng di quy định bah pháp luật.”

Nău lor nchrăp, lĕ n’hâm suan bah mpôl kan dơi kan n’gor Dak Lak tâm njrăng, n’gang rlăch ndăng đah nău tih ƀư njêng, nchuăn rdeng, tăch ndơ rlăm, ndơ mô nâp uĕh, săk kah tâm rơh rvăt dŏng âk ndơ Tết Bính Ngọ 2026 dôl nsĭt tay ăp nău dơi uĕh. Ntŭk tăch rgâl rnôk Tết mbra dơi mât kân tay lhăt, ndơ tăch đăp mpăn săk kah, rgop kơl an nuĭh ƀon lan đăp mpăn rvăt năp, wơt Tết ăp tŏng n’hanh uĕh lăng./.