VOV4.M'nông: Dak Lak geh rlău 1.000 nhih nti n'hanh âk nhih nti tâm rnoh nê way geh kơl khan trong hăn ta mpông nhih nti rnôk sĭt n'hanh hăn nti, geh ma nău roh đăp mpăn. Năm nti 2022-2023, nơm geh nking nchăng nău tăch ndơ bah năp nhih nti, nkoch trêng, n'hao nău gĭt êng bah me bơ̆ n'hanh kon se nti, rgâl geh drăp ndơ dŏng, nău dja hŏ dơi hŭch bah âk; âk nhih nti hŏ hŭch bah nău kol khan trong.

          Nhih nti Tiểu học Nguyễn Bỉnh Khiêm ta nklang nkual ƀon têh Buôn Ma Thuột, ta njônh n'glah trong Nguyễn Đình Chiểu – Lê Thánh Tông. Nkual dja ntơm nơh geh dŭt âk tăch ndơ sa ôi, cà phê mô lah ăp ndeh ntrôl tăch ndơ lhăt bêng trong. Yơn lah, nău dja năm aơ mô hôm geh đŏng ôh. Wa Nguyễn Thị Phương, jay bah năp mpông nhih nti an gĭt:

          “Ăp năm ntơm nơh me bơ̆ kon se nti hăn wơt ma ndeh honda, ndeh ôtô ri ma saơ ntŭk ma nsrŭng an kon hŭr; hôm năch hăn tât quán sa, ngêt cà phê tâm rvoan ntŭk nsrŭng ndeh meng trong mô lah ta ntŭk kơh trong an nuĭh hăn jâng đŏng; nuĭh ntrôl ndơ tăch nsrŭng nklang trong tăch ndơ đŏng. Mông âk nuĭh hăn kol khan hô, lơn lah ntơm bah 6 – 7h ôi mô lah 4h30 – 5h kêng măng, ăp nar tâm pơh. Yơn lah, năm aơ gâp saơ nău dja mô hôm geh đŏng ôh".

          Tĭng nai Lê Mai Thanh –  nhih nti Tiểu học Nguyễn Bỉnh Khiêm, bah năp khai giảng năm nti 2022-2023, nhih nti hŏ hop lĕ rngôch nai ntĭm, cán bộ nuĭh kan gay ƀư ăp nău kan bah năm nti mhe, tâm nê geh njêng đăp mpăn tay ntung trong hăn bah năp mpông nhih nti. Ban Giám hiệu hŏ njêng rmôt hăn kơl êng kan nsum đah mpôl kan dơi kan tĭng ƀư tâm pă mbor ndeh hăn, ntĭm nti me bơ̆ nsrŭng ndeh di ntŭk way an.

       “Nhih nti hŏ njêng 3 rmôt, ăp rmôt ntơm bah 2 – 4 nuĭh tĭng ƀư nău kan tâm pă mbor, ntĭm nti me bơ̆ kon se nti nsrŭng ndeh njŭn wơt kon di ntŭk way an, der bah kol khan trong ta băp mpông nhih nti. Đah ndeh ô tô ri an nsrŭng jŏ tâm bar pe giây, mô nsrŭng jŏ, lah me bơ̆ mô geh ntŭk nsrŭng ri ntĭm nti khân păng hăn tât ntŭk tâm di; hôm ndeh honda ntĭm nti nsrŭng tât ntŭk an êng ma ndeh honda đŏng. Nhih nti ƀư tâm pleh tĭng mông sĭt nti, ntĭt kơt jrô 1 luh lor bah năp dah âk mông, lôch nê tât jrô 2, 3, 4… djăt ma tâm pleh kơt nê̆. Rnôk lĕ mông nti ri pơk lĕ rngôch ăp mpông nhih nti, bah mpông me bah năp tât 2 mpông jê̆ bah kơi ...”

        Ta nkual ƀon têh Buôn Ma Thuột, nô nău roh đăp mpăn hăn ntung trong nkual bah năp mpông nhih nti kơt: nhih nti Mầm non Hoạ Mi, Tiểu học Nguyễn Đức Cảnh trong Phan Chu Trinh, Trung học cơ sở Tân Lợi trong Ngô Quyền, Tiểu học Võ Thị Sáu trong Bà Triệu, Tiểu học Lê Hồng Gấm trong Lý Thường Kiệt, mô lah nhih nti Tiểu học Nguyễn Bỉnh Khiên trong Nguyễn Đình Chiểu… geh kol khan hô tâm ăp năm rlău aơ.

        Trung tá Thái Văn Thìn - Groi kruanh Công an nkual ƀon têh Buôn Ma Thuột an gĭt, lôch rnôk hăn ôp uănh ăp nhih nti geh kol khan trong hăn, nhih pah kan saơ trong tâm pă mbor mô hŏ tâm di, ƀư nău kol khan ntung trong hăn bah năp mpông nhih nti lơn ma hô tay. Nhih pah kan hŏ nsŏng kơl an UBND nkual ƀon têh Buôn Ma Thuột rơih jăng lĕ rngôch ăp mbor trong n'gân ta n'glah pe 3, n'glah 4 dăch kêng nhih nti rgâl ma trong sơn tor jong, njêng soih aih an trong gay ndeh rklư tâm der. Ndrel đah nê, ƀư phăt lha si ƀŭt nkoch trêng an me bơ̆, kon se nti n'hao nău gĭt êng râng hăn ntung trong; đă ăp rnăk tăch rgâl jê̆ tĭng jăp ăp quy định mpeh đăp mpăn hăn ntung trong; lơn lah tâm pă mpôl gŭ kâp ta ăp n'glah trong dăch kêng nhih nti, rmal lhăt ăp nuĭh tih...Trung tá Thái Văn Thìn an gĭt:

       “Công an nkual ƀon têh Buôn Ma Thuột hŏ phăt 3.400 lha si ƀŭt, nkoch trêng an 9.020 kon se nti n'hanh n'hao ntĭm nti mpeh Luật hăn ntung trong. Tâm pă rlău 400 tơ̆ cán bộ tahen lah: Cảnh sát mât uănh ntung trong, Cảnh sát mât đăp mpăn ntŭk gŭ rêh n'hanh Cảnh sát nkual râng nkoch trêng tât ăp me bơ̆ njŭn wơt kon se hăn tât nhih nti nsrŭng ndeh di ntŭk der bah kol khan ntung trong n'hanh tâm pă trong hăn ta ăp ntŭk dăch kêng mpông nhih nti.”  

          Lam n'gor Dak Lak aƀaơ geh bơi 500.000 kon se tĭng nti ta 1.071 nhih nti. Tĭng wa Đỗ Tường Hiệp – Groi Giám đốc Sở Giáo dục n'hanh Đào tạo n'gor Dak Lak, nô nău roh đăp mpăn hăn ntung trong ta ăp mpông nhih nti mô dơn geh ta nkual ƀon têh Buôn Ma Thuột ma hôm geh ta lĕ rngôch ăp nkuâl tâm  n'gor âk năm rlău aơ đŏng. Bol mô hŏ geh ăp rơh tâm tom dŭt yô̆ nđach, yơn nău kol khan ndeh ta mông âk nuĭh hăn hŏ ƀư roh uĕh măt uănh nkual ƀon têh, ƀư nuih ăl an nuĭh ƀon lan. Bah năp nău ngăn geh dja, lăp tâm năm nti mhe năm aơ, Sở hŏ kan nsum đah mpôl kan dơi kan an ƀư ăp trong rgâl tâm di, ntơm an saơ geh nău tam dŭt tâm di.   

        “Mhe aơ nơh, n'gâng kan ntĭm nti n'gor Dak Lak hŏ geh ăp si ƀŭt njuăl tât ăp nhih nti n'hao nău gĭt êng mpeh kon se nti, đă ăp kon se rƀah gĭt ăp nău way rnôk hăn tât bah năp mpông nhih nti ân đăp mpăn hăn ntung trong. Nkoch trêng, mbơh gĭt lam ăp me bơ̆ kon se nti, ăp Hội me bơ̆ kon se nti rƀah gĭt kloh mpeh nkô̆ nău dja. lơn lah, ăp nhih nti kan nsum đah n'gâng kan ta ntŭk, mpôl kan dơi kan công an, rnă njrăng mô lah Mpôl druh ndăm tât râng kơl êng ta ntŭk ntop kơl dơn mât đăp mpăn hăn ntung trong ta ăp mpông nhih nti.”./.  

Tuấn Long/VOV Tây Nguyên

Nuĭh rblang: Điểu Thân