Mhe aơ nơh, Bộ trưởng Bộ Tài Nguyên n’hanh Môi Trường Đặng Quốc Khánh ndrel mpôl pah kan bah Trung ương hŏ geh rơh pah kan đah kruanh rđău kan n’gâng tơm n’gor Dak  Lak. Ăp nkô̆ rgum tơm khlay dơi nkoch ta rơh pah kan lah pah kan mât ŭanh ngih dak mpeh tài nguyên n’hanh môi trường ta Dak  Lak dôl mâp âk jêr jŏt kŏ  kol, lơn lah geh dŭt âk mô geh tâm di tâm  mât uănh neh ntu tơm luh bah nông lâm trường.

          Ta rơh pah kan, UBND n’gor Dak Lak hŏ nkoch nkô̆ nău geh tât jêr jŏt, kŏ kol tâm pah kan mât uănh ngih dak mpeh tài nguyên n’hanh môi trường. Tâm nê, kŏ kol dŭt âk lah mât uănh neh geh tơm luh bah nông lâm trường. Lam trong mât prăp  nău lư mpeh mât dŏng bri mô hŏ lôch jêh, mô hŏ ăp kôp đah  ndơ mât prăp  nău lư mpeh neh ntu. Lơn âk neh geh tơm luh nông lâm trường mplơ̆ an n’gor aƀaơ nha hôm tă bah UBND gưl xã mât dŏng đŏng, mô hŏ geh nuĭh mât dŏng na nê̆, âk neh bri geh rŭn in neh tuch tăm. Ntơm bah nê,  ƀư jêr  jŏt an n’gor tâm nău ndơ̆ neh ntu lăp dŏng tĭng dăp rgum, trong nchrăp. UBND n’gor Dak Lak hŏ njêng trong nchrăp nkrum lam mpeh nău dŏng neh geh tơm luh bah neh bri mbơh Bộ Tài Nguyên n’hanh Môi Trường n’hanh ăp nhih pah kan trung ương yơn  tât aƀaơ nha hôm dơi mĭn uănh, rđău đă đŏng. Wa Nguyễn Thiên Văn, Groi kruanh UBND n’gor Dak Lak nkoch nău ngăn geh:

“Nô nău tâm pit, lah phong, tâm rkeh mpeh neh ntu ta ăp ntŭk nchrăp kan tuch tăm si gle n’hanh ăp công ty nông lâm nghiệp ta n’gor nha hôm duh hô. Nău mât uănh tâm pit, lah phong neh ntu n’hanh sŏk mplơ̆ neh tăm bri geh rŭn in mâp  jêr jŏt, mô hŏ geh trong nkra tâm di gay nkra dŭt bah ngăn.”

          Ndrel đah jêr jŏt, kŏ kol geh tât mât dŏng neh nông lâm trường, UBND n’gor Dak Lak hŏ nkoch âk nkô̆ nău ân dơi Bộ Tài Nguyên n’hanh Môi Trường ndrel ăp nhih pah kan trung ương mĭn uănh, nkra đŏng. Ntĭt kơt Luật neh ntu 2024 mô hŏ geh nău tam dŏng, nău dŏng ăp quy định Luật neh ntu 2013 n’hanh ăp siƀŭt bah dâng luật hôm du đêt nău tâm rkăl, ân dơi mĭn uănh, ntĭm nti, nkra bah. Rnoh dŏng neh bah Dak Lak tât năm 2025 dơi Thủ tướng Chính phủ tâm pă ta siƀŭt n’glêh an 326 năm 2022 mô hŏ  tŏng đah nău ŭch geh ngăn. Luật Khoáng sản n’hanh ăp siƀŭt ntĭm nti rêng ƀư siƀŭt pă an nău dơi khoáng sản hôm jêr jŏt, ntoch jong mô hŏ tâm di đah âk ntil lŭ loih gay ƀư ndơ rdâk njêng nhih jay ntung trong, lơn lah nău lơh joi neh choih tuh…

        Lah n’glôch jêh rơh pah kan, Bộ trưởng Bộ Tài Nguyên n’hanh Môi Trường Đặng Quốc Khánh an gĭt, mpôl pah kan bah bộ pah kan đah ăp n’gor gay droh rklaih ăp jêr jŏt, wăk kol an n’gor. Nkre, sŏk  nău rgop bah ăp n’gor gay ơm rdâk njêng, ƀư lôch jêh Nghị định ndơ̆ Luật neh ntu 2024 lăp tâm nău rêh. Aơ lah luật geh nkô̆ dŭt têh khlay đah nău rêh  jêng kon nuĭh. Tâm nê, Bộ trưởng njrăng đă n’gor Dak Lak ân lor nchrăp, nsrôih an ƀư ơm rdâk njêng  săk rnoh khlay neh, ntŭk mât prăp nău lư neh ntu gay rnôk Luật geh nău tam ƀư ri dơi dŏng dĭl. Nkre, n’gor ân njrăng uănh khlay tât nău nkra ăp nchiăng khan ma Sở Tài Nguyên n’hanh Môi Trường mbra dơi ƀư dĭl nê lah pă an siƀŭt nău dơi kơp dơn nău dơi dŏng neh an nuĭh ƀon lan gŭ đăp mpăn, mô tâm pit, mô tih pháp luật.   

         Êng đah nkô̆ nău dŭt jêr lah neh nông lâm trường, Bộ trưởng Đặng Quốc Khánh đă n’gor Dak Lak ân  ôp uănh tay ăp tŏng lam lĕ rngôch  n’hanh tâm pă ntil gay rnôk Luật neh ntu 2024 geh nău tam dŏng ri mbra nkra dơi bôk năp an âk rnoh neh. Bộ trưởng êng lah rjăp nău tâm ban geh bah nuĭh ƀon lan n’hanh doanh nghiệp tâm nkô̆ nău neh ntu nông lâm trường:

        “Dăn đă UBND n’gor, Rnâng kan Tỉnh uỷ rđău đă ôp uănh tay lam lĕ rngôch neh ntu nông lâm trường. Ntơm nơh hôm n’glăp neh ƀon lan tâm lâm trường, aƀaơ cổ phần hoá ri ƀon lan đah lâm trường, công ty tâm pit nsum. Yor,  rnôk cổ phần hoá, rnôk ƀư trong rgâl neh mô uănh na nê̆, mô geh weh ntrŏng, mô geh n’har, li lơ lôch nê  ntơm tâm rŭn in. Gâp dăn đă ôp uănh tay ăp tŏng lam lĕ rngôch n’hanh tâm pă ntil. Công nhân ri lah ƀon lan he đŏng, bu gŭ ta nê bar pe jât năm hôm, ndơ lơh dĭng ƀư jêr jŏt. He ân tâm ban nău geh bah ƀon lan, bah doanh nghiệp n’hanh lịch sử. Luật geh nău tam, neh bah nông lâm trường yơn ƀon lan hŏ gŭ đăp mpăn bah năm 2004, lĕ  ma neh tuch tăm, neh gŭ phăt an ƀon lan. Hôm neh dôl  tâm pit ri ân rblang uănh năl tay ntơm bah kăl e nơh lah moh ndơ. Moh ndơ I dơi ƀư tĭng luật ri ăp oh nô ƀư lor”

         Bộ trưởng Bộ Tài Nguyên n’hanh Môi Trường dăn đă n’gor Dak Lak n’hao dăng pah kan mât uănh ngih dak mpeh lŭ choih, tơm dak, lơh lêk ndŏk,  n’hoch dak djơh; nuĭh kan an n’gâng kan tài nguyên môi trường let năp tay mbra tâm pă gưl tât 70% nău kan bah gưl bộ sĭt an n’gor. Bộ trưởng đă n’gor Dak  Lak êng uănh khlay tât pah kan njrăng n’gang ŭnh sa bri tâm khay wai dja đŏng, rnôk geh ăp nău mpơl an saơ trôk nar kro phang năm aơ dŭt djơh êng ntĭng nkual./.