Kêng măng 11/7, ta rơh rƀŭn tal 8, HĐND n’gor Dak Lak, gưl X, Groi kruanh rnâng kan UBND n’gor ndrel rđau kan ăp ntŭk kan hŏ mbơh ndrel ƀư kloh du đê̆ nau kan ma ntoh măt ndrel cử tri đă, mbơh ăp ntrong kan gay geh dơi ăp nkô̆ nau nchrăp luh. Tâm 6 khay bôk năm, nau kan văng sa, rêh jêng bah n’gor Dak Lak lŏ mât geh ndrel hun hao. Ăp nkô̆ nau hun hao âk, rgum âk ngăn tơm prăk lam ntŭk kan, rnoh geh ndơ tăch luh, nau geh bah pâl n’aih hao âk rđil rơh aơ năm e.

Rnoh geh tơm prăk tăch lih, pâl n’aih hao rđil rơh aơ năm e. Rnoh geh tơm prăk Ngih dak geh rlau 60,8% nau nchrăp Trung ương ndrel rlau 50% nau nchrăp HĐND n’gor jao, hao 8,8% rđil rơh aơ năm e. Tĭng ăp ntoh măt, đah nkô̆ nau hun hao văng sa bah n’gor Dak Lak ntơm 6-6,8% tâm năm 2024, nau kan hôm e tâm 6 khay dŭt năm lah jêk ngăn. Gay dơi geh ăp nau dơi hun hao aơ ri 3 n’gâng tơm văng sa lah tuch tăm, tăm bri, tui ka; công nghiệp ndâk nkra, tăch rgâl, pâl n’aih ân geh hun hao tâm di trong ndrel ân geh nau dơi tâm di ma nau dơi ngăn bah n’gor./.