Ntik n’hao tay nău khlay ƀư tơm tâm rdâk njêng tâm rnglăp lam rnoi nuĭh, ta Đại hội đại biểu lor bôk năp, năm kan 2025–2030, ƀư tâm bar nar 16 n’hanh 17/12, Mặt trận Tổ quốc Việt Nam n’gor Dak Lak ntrŏng 6 bôk nău kan rgum tơm, rƀŏng tât n’hao âk nău tâm ban tâm rêh jêng kon nuĭh n’hanh ntik n’hao suan dăng ƀon lan tâm rơh mhe. Tâm bơh ri aơ nơh, Ủy ban MTTQ Việt Nam n’gor Dak Lak hŏ ntik n’hao nău khlay kan rgum tơm, n’gâng tơm tâm rdâk njêng tâm rnglăp lam rnoi nuĭh; n’hao âk tâm ban nău lam rêh jêng kon nuĭh, njêng jâng nsing chính trị khlay gay đăp mpăn n’hanh hun hao tâm rơh geh âk nău rgâl têh mpeh dăp rgum nuĭh kan. Pah kan nkoch trêng, rgŏ jă ƀon lan dơi rgâl tĭng trong grêt dăch tâm dâng; nău kan groi nđôi, rlơn tay nău mô hŏ di tâm nău rêh an ƀư geh rgum tơm, rgop râng rdâk njêng Đảng, rdâk njêng n’gâng kan, n’hao nău dơi tam, nău yach ngăch mât bôk kan ngih dak tâm dâng. Mặt trận ăp gưl n’gor Dak Lak mpơl tay kloh nău khlay kan tâm pă kan, rgum tơm ndơ, mât chăm ăp tŏng geh nău rêh; ntoh lư lah râng bôk nău kan jut jăng nhih jay truh sat, nkưp nde; ngăch rgŏ jă, tâm pă ăp tơm ndơ ntop kơl ƀon lan nkra bah khuch khat trôk nar lơh, đăp mpăn di nuĭh, di rnôk. Đại hội hŏ tâm ban ŭch 6 bôk nău kan rgum tơm n’hanh 13 rnoh tât kan na nê̆ tâm năm kan 2025–2030.

Tâm nê, nsrôih rgŏ jă rdâk mon dŭt đêt 1.000 mblâm jay Tâm rnglăp; ntop kơl dŭt đêt 1.000 rnăk ach o, dăch kêng ach o klaih rlău ach o n’ho ro; ntrôl dŏng âk công nghệ thông tin, rgâl mbrô tâm nău kan Mặt trận. Lah ta Đại hội, wa Lương Nguyễn Minh Triết, Bí thư Tỉnh ủy Dak Lắk rnê âk nău khlay ƀư rgum tơm tâm rnglăp bah Mặt trận Tổ quốc; đă rgâl mhe dăng dăp rgum n’hanh trong rƀŏng kan bah Mặt trận tâm rơh mhe.

“Aƀaơ Mặt trận Tổ quốc Việt Nam n’gor đah trong leo ƀư mhe, đah âk nău rgâl mhe mpeh leo ƀư, nkô̆ n’hanh trong kan. Tâm nê, nău khlay ƀư dâk leo lor, găr ntil bah Mặt trận Tổ quốc tâm nău rgum ntik n’hao suan dăng tâm rnglăp lam ƀon lan lah dŭt têh. Mặt trận ân jêng du rnăk jay nsum, lah ntŭk rgum, ntik n’hao bôk ngok nău gĭt blău, suan blău njêng mhe bah ăp rơh kơn ƀon lan, rgum dơi suan dăng ƀon lan, nuih n’hâm ƀon lan an nău hun hao bah n’gor tâm let năp tay”.

Lôch âk tơ̆ tâm ban ŭch, Uỷ ban MTTQ Việt Nam n’gor Dak Lak khóa I, năm kan 2025–2030 lah 116 nuĭh (rnă 4 nuĭh); đă 17 nuĭh ntơh măt ngăn n’hanh 2 nuĭh ntơh măt rnă lor râng Đại hội đại biểu lam dak Mặt trận Tổ quốc Việt Nam lor bôk năp, năm kan 2026–2031. Wa Y Giang Gry Niê Knơng, Groi Bí thư Tỉnh ủy, dơi đă ƀư Kruanh Ủy ban Mặt trận Tổ quốc Việt Nam n’gor Dak Lak khóa I.