VOV4.M’nông:   Geh âk nău dơi an hun hao yơn tât aƀaơ pâl nđaih Dak Lak mô hŏ ban nău ŭch dŭt ngai. N’gor Dak Lak dôl nsrôih pơk hvi tâm rgop, n’ăp tâm n’gor n’hanh ăp n’gor gay rgâl hao an pâl nđaih ta n’gor hun hao.

Quảng Bình lah ngoăy tâm âk n’gor mhe tâm rgop pâl nđaih đah Dak Lak yor ăp nău tâm ban mpeh ntŭk ntô, neh ntu. Dăch aơ, 2 n’gor lĕ tâm nchră âk nkô̆ nău mpeh mĭn njêng ntŭk tăch rgâl, pơk trong mpăr Đồng Hới-Buôn Ma Thuột n’hanh âk nkô̆ nău kan ndrel êng tâm 5 năm bah năp. Wa Đặng Đông Hà, Groi Giám đốc N’gâng kan pâl nđaih Quảng Bình an lah, Dak Lak n’hanh Quảng Bình ndrel geh nău ŭch hunhao pâl nđaih kloh uĕh, rlu rlău, yơn geh âk nău geh êng gay mât uĕh, ndâk njêng jêng ăp ndơ pâl nđaih khlay:

        “Ndrel đah ndâk njêng ndơ pâl nđaih ri ntrôl dăng trong an mpla nsơ n’hanh boăt nthoi. Aƀaơ nău rgâl mrô ri mpla nsơ, boăt nthoi, marting pơng dŭt khlay. N’hanh nău n’glêh dŭt tay lah ăp doanh nghiệp mĭn nchrăp đŏng n’hanh ăp nău ngih pah kan mât uănh ngih dak n’hao trong kan mât uănh ngih dak bah nơm gay nkre mât uănh uĕh ăp ndơ pâl nđaih, nkre lah nta an ăp doanh nghiệp an hun hao pâl nđaih uĕh lơn”.

Dak Lak ký ton bôk nău kan tâm ton kan ndrel hun hao pâl nđaih đah âk n’gor, nkual ƀon têh.

Bah năp nĕ, tâm khay 3/2022, N’gâng kan văn hóa-Thể thao n’hanh Pâl nđaih n’gor Dak Lak lĕ tâm rgop đah N’gâng kan pâl nđaih n’gor Khánh Hòa ƀư rgum nchră ntrŭt ngăch, mpla nsơ n’hanh boăt nthoi ndơ pâl nđaih. Wa Nguyễn Thị Lê Thanh, Giám đốc N’gâng kan pâl nđaih n’gor Khánh Hòa an gĭt: lĕ 2 n’gor geh nău dơh êng gay hun hao ăp ndơ pâl nđaih, lah kơt Khánh Hòa geh ndơ âk mpeh pâl nđaih dak lêng gôl dak ri Dak Lak ntoh lư đah pâl nđaih geh bri dak, ntŭk ntô, yôk nor têh. Aơ lah nău ntop dŭt uĕh an lĕ 2 n’gor, nta an âk tuor mpeh ndơ pâl nđaih đah ăp nău ƀư ngăn uĕh an năch.

“Mpôl hên mbra ntĭm rđău ăp công ty pâl nđaih kơt tâm rgop đah Hiệp hội pâl nđaih Nha Trang-Khánh Hòa ƀa ƀơ boăt nthoi gay ƀư tâm rgop nkual, tâm rgâl ƀa ƀơ, geh ăp bôk nău kan rƀŭn n’gul gâl, lôch năm gay uănh lah rhoăt nău blău ơm. Tĭng nĕ N’gâng kan pâl nđaih mbra tâm rgop n’hanh dơi geh âk nău ƀư tay an geh săk rnglăy lơn nău kan hun hao boăt nthoi nkual đah Khánh Hòa n’hanh Dak Lak”. .

Ndrel đah nău geh ntŭk ntô bri dak, Dak Lak hôm gŭ ta nklang nkual Tây Nguyên, dơh an boăt nthoi pâl nđaih đah ăp n’gor tâm nkual, ngăn lah đah Lâm Đồng, ntŭk lĕ ndâk njêng geh ndơ moh pâl nđaih dŭt ntoh lư. Wa Nguyễn Thị Bích Ngọc, Groi giám đốc N’gâng kan Văn hóa-Thể thao n’hanh Pâl nđaih an gĭt, 2 n’gor dôl nsrôih mkra ăp nău nking n’gang đah trong hăn, gay pâl nđaih ngăn ngên dơi boăt nthoi:

“Aƀaơ hăn bah Lâm Đồng rlău Dak lak nklăp 200km, trong hăn dŭt jêr. 2 ntŭk dôl dăn đă nău nchrăp ƀư ndâk nkra trong cao tốc bah Lâm Đồng hăn Dak Lak, bah nĕ nthoi đah ăp n’gor Tây Nguyên. N’hanh dŭt ŭch lah ơm nkra n’hanh ƀư, nkre ƀư mhe trong hăn, nta nơih uĕh ngăn an năch pâl nđaih tât đah 5 n’gor Tây Nguyên. Du nău tay lah ndâk ƀư du rnoh ndơ ƀư tâm ban ŭch mpeh pâl nđaih uĕh, nkre ndâk ƀư kôp rnoh ndơ ƀư gay uănh lah mpeh ăp nău ƀư pâl nđaih bah nơm”.

Dak Lak geh âk ntŭk ntô bri dak uĕh

Tĭng wa Đặng Gia Duẩn, Groi N’gâng kan Văn hóa-Thể thao n’hanh pâl nđaih Dak Lak, đah 49 rnoi mpôl đêt gŭ rêh ta n’gor, Dak Lak geh du jâng văn hóa dŭt âk, âk nău uĕh ntơr ang.  Năm bah năp, n’gor lĕ geh âk bôk nău rgop tâm nchră na nê̆ geh tât hun hao pâl nđaih, mât ndrăy ƀư uĕh nău khlay ăp di tích lịch sử kơt Nghị quyết bôk nău kan mpeh mât ndrăy văn hóa chĭng gông. Đại hội Đảng rơh tal 17 bah n’gor lĕ mĭn đŏng hun hao pâl nđaih ngoăy tâm âk nău kan khlay. Aơ lah ăp nău ntrŭnh gay boăt nthoi hunhao văn hóa đah hun hao pâl nđaih ta n’gor. Wa Đặng Gia Duẩn lah:

“Mpôl hên mbra nsrôih ƀư ăp ndơ kan lor, ăp ndơ ƀư, ăp ntŭk ƀư dơi mât uĕh kuăl wăch rgum năch pâl nđaih ri mbra an ntuh kơl lor, wăch rgum nar lơ âk năch pâl nđaih n’hanh âk ăp nuĭh ntuh kơl an n’gor bah ăp nău ƀư nĕ. Hôm Dak Lak êng đah ăp ntŭk êng ta moh ndơ ? Pơng ơm an geh nău uĕh văn hóa bah rnoi mpôl đêt ta n’gor, tâm nĕ geh dŭt âk rnoi mpôl đêt ta ntŭk geh nău uĕh văn hóa n’hanh boăt nthoi đah hun hao pâl nđaih, gay mpôl hên mpŏng ŭch nău geh bah hun hao pâl nđaih, pơng mbra rgop khlay tâm nău GDP bah n’gor tâm năm tât”.

Ntŭk văn hóa âk ntil, âk nău uĕh bah ăp rnoi mpôl đêt ta ntŭk.

Đah âk nău geh gay hun hao âk ntil pâl nđaih, Dak Lak dôl geh âk njoăt hăn joi n’hanh hun hao pâl nđaih du trong tâm rlong. Tâm nĕ, nău ntrôl dăng boăt ntoi, tâm rgop đah ăp n’gor ta lam dak dơi geh nău rgâl hao an pâl nđaih, kơl nău kan công nghiệp mô geh nsuk m’hŭl dơi geh âk nău khlay lơn an hun hao wăng sa, rêh jêng ta ntŭk.

                                                    H'Xíu nchih

                    Nuĭh rblang: Y Sưng Phê Ja