Khay 8 mhe rlău, rmôt rgum 4 ngih măy điện sial Cư Né 1, Cư Né 2, Krông Búk 1 n’hanh Krông Búk 2, dĭng lĕ dăng 200 MW, tâm xă Krông Búk n’hanh Cư Pơng, n'gor Dak Lak, lĕ jêh pơk dŏng điện ăp tua-bin n’glĕ dŭt. Jêh rnôk lăp an dŏng, ăp nău nchrăp ƀư mô knŭng trong điện kloh ueh ma hôm ntop tay nău geh âk an ƀon lan. Wa Trần Quốc Tuấn, Kruanh UBND xă Krông Búk, mbơh ăp nău nchrăp ƀư dơi rgop ân tơm prăk bah nkuăl rlău 115 rmen prăk du năm, nkre nta an nău kan n’hanh pơk luh nău hun hao mhe. "Nău nchrăp ƀư lĕ rgop an ta ntŭk mpeh rnoh prăk dŭt âk nkôp đah ăp nău nchrăp ƀư ta ăp trong kan êng ta ntŭk. Nău dơi hun hao bah ăp nău nchrăp ƀư điện sial ta Krông Buk hôm nha dŭt têh. Mpôl hên hôm nha geh 4-5 nău nchrăp ƀư dôl geh nchrăp an geh rgum ntuh kơl gay ma njêng rnoh prăk rgop an hun hao geh tât 2 rnoh mbrô an xă."

Aơ lah nkah rmeh têh bah Dak Lak tâm nău hun hao ŭnh nar nkra njêng tay. Tĭng dăp rgum lvang 2025-2035, n’gor geh 125 nău nchrăp ƀư ŭnh nar nkra njêng, tâm nĕ 57 nău nchrăp ƀư điện sial, dĭng lĕ dăng bơi 4.00 MW. Yơn lah, tât aƀaơ, Dak Lak mhe tĭng ŭch nău ntrŭnh ntuh kơl n’hanh tĭng ŭch nuĭh ntuh kơl an 19 nău nchrăp ƀư ŭnh nar nkra njêng, dĭng dăng bơi 1.128 MWW; tâm  nĕ geh 11 nău nchrăp điện sial, dăng bơi 590 MW. Tâm ƀah dŭt têh đah nău geh n’hanh rnoh nău nchrăp ƀư dơi mbơh an saơ ăp “Ntŭk kol” an dôh rklaih tay. Tâm nĕ, samƀŭt samtra ntuh kơl, sŏk măt neh, gung trong boăt nthoi n’hanh dơi trơn hôm e lah ăp nău dơi ăp nuĭh ntuh kơl uănh tât. Mpeh nău aơ, Yơ Nguyễn Thị Hoài An, Giám đốc N’gâng kan Công Thương n’gor Dak Lak, an gĭt: "Tĭng ntĭm rđău bah UBND n'gor Dak Lak, mông nar mpôl hên dôl nsrôih rhuăt glêh mông nar mkra ăp sam ƀŭt hành chính ntuh kơl jŭr hôm 50 – 60% mông nar nkôp đah bah năp. Tâm rnôk ntopc kơl "trong mbluh soih" mbra mkra ngăch sam ƀŭt ntuh kơl, tâm ôp tâm nchră gưl ntrŭnh ntuh kơl đah ăp nău nchrăp ƀư trong điện nkra njêng”.

Tĭng wa Đào Mỹ, Groi Kruanh UBND n'gor Dak Lak, ăp nkual geh nău dơh uĕh mbra dơi ntrŭt nsôr, kuăl jă ntuh kơl, đah nău ŭch nta trong dơh gay ăp nău nchrăp ƀư dơi an ƀư ngăch rnôk tŏng ăp nău đă."Ăp ntŭk geh nău dơh nơih, mpôl hên mbra ntrôl dăng kuăl jă, ntrŭt ngăch ntuh kơl gay nuĭh ntuh kơl ƀư. M'hâm ƀư rnôk nuĭh ntuh kơl tât uănh năl, lah đăp mpăn ăp nău dơi ntuh kơl ri mbra ƀư dâl, mô dơi an mâp jêr jŏt tay đŏng ôh."

 Điện sial mbra jêng ngoăy tâm ăp suan ntrôl khlay gay Dak Lak ntrŭt ntrôl rgâl uĕh nđĭr, hun hao ngăch n'hanh hun hao nâp nâl.