Jay tă lah săk rnglăy ntêm nkrem âk năm pah kan jan sa bah ur sai wa Lê Thị Minh Trang, thôn Vĩnh Xuân, xă Tuy An Tây, aƀaơ knŭng hôm lah nja hăch jêh rnôk yôk bah kơi pĭch rlâm ndal. Kêng măng 19/11, jay ntoh ăp trong đang têh, n’gâng kan ƀon lan ngăch đă trơn du. Ndrĭ yơn knŭng jêh du măng mih têh, jay lĕ rlâm ƀhiău.

Rnăk wâl đah kônh wa ta ƀon aơ mpŏng ngih dak ƀư geh jay gŭ an kônh wa gŭ ndê aơ njê ngăn.

Nău rêh bah rnăk wâl wa Trang lah nău nsum bah 35 rnăk wâl đă an trơn ta thôn Vĩnh Xuân. Tĭng wa Lê Minh Ý, Bí thư chi bộ nkre ƀư kruanh thôn Vĩnh Xuân, lor rnôk geh trôk nar lơh, nuĭh ƀon lan dŭt âk rêh đah nău kan lŏ mir, tăm prit, tao. Jêh rơh phŭt mrô 13, tuh mbô mô ngăch nkra ri dak băm têh tay lĕ ƀư pĭch rlâm hô, ntrôl âk rnăk lăp nău roh ngih wâl, roh neh tuch tăm, aƀaơ, mpŏng ŭch hô ngăn bah kônh wa lah ơm geh ntŭk gŭ đăp mpăn.

Mhe rlău Ủy ban lĕ sŏk nău rgop bah kônh wa, kônh wa tâm ban ŭch nău aơ âk, kônh wa mpŏng tât ntŭk gŭ mhe đăp mpăn lơn. Mpŏng ƀư ơm gay kônh wa geh ntŭk gŭ đăp mpăn, ơm geh nău rêh.

 Wa Phan Quang Phi, Kruanh UBND xă Tuy An Tây, an gĭt, n’gâng kan ƀon lan xă lĕ kơp uănh, rgum ăp 49 rnăk tâm nkual pĭch rlâm, kơl lor ta năp măt pă ntŭk gŭ mhe an 35 rnăk geh khuch hô. Nkual ntŭk gŭ mhe dơi săch ta xă Tuy An Nam, tă ntŭk gŭ ơm nklăp 5km:

Ƀon lan ndăn tâm rgop đah xă Tuy An Nam kơt Mpôl mât uănh rnôk jêh samƀŭt ntŭk gŭ mhe ri mbra ntơm ndâk ƀư ăp jay aơ. Đăp mpăn ngăch tĭng ntĭm rđău bah Thủ tướng Chính phủ.

Nău dôl uănh ngăn tâm rnôk mbơh ƀư ntŭk gŭ mhe lah nău tâm ban ŭch dŭt âk bah nuĭh ƀon lan ta nkual wơt dơn. Ta thôn Quảng Đức, xă Tuy An Nam-ntŭk dơi săch ndâk ƀư ntŭk gŭ mhe-lĕ geh 17 rnăk ƀon lan ŭch êng jao neh, jêng neh kloh gay tâm pă ntŭk gŭ an ăp rnăk geh pĭch rlâm. Wa Nguyễn Thị Chín, Kruanh thôn Quảng Đức, xă Tuy An Nam nkoch:

Thôn rgŏ jă đŏng kônh wa ta aơ tâm ban ŭch an neh nta dơi an ăp rnăk geh pĭch rlâm neh trơn sĭt ta aơ gay ndrel gŭ rêh an răm, kônh wa ta aơ tâm ban ŭch ngăn. Kônh wa ta aơ nta an ăp rnăk jêr jŏt lơn, kơt nuĭh geh rgum kơl nuĭh mô geh kơt ndrĭ.

Nuih n’hâm tâm kơl nĕ dơi saơ na nê̆ tă bah nău ntrŭnh bah wa Trương Thị Nhung, thôn Quảng Đức, xă Tuy An Nam, rnôk bơi 2 sào neh bah rnăk wâl geh tâm nuĭh sŏk neh gay ndâk ƀư nkual ntŭk gŭ mhe.

Oh ŭch dơm, uănh kơt he kơl an âk nuĭh pĭch rlâm tâm trôm ri, knŭng an trok tŏng ăp an nuĭh ƀon lan lah dơi.

Gay ntrôl ngăch, kruanh n’gor Dak Lak ndrel ăp n’gâng kan, nău kan geh tât n’hanh kruanh 2 xă Tuy An Tây n’hanh Tuy An Nam lĕ na nê̆ hăn uănh nkual neh dơi săch ƀư ntŭk gŭ mhe an 35 rnăk. Ta nar pah kan, wa Nguyễn Thiên Văn, Groi Kruanh UBND n’gor Dak Lak đă ăp n’gâng kan, nău kan tâm rgop rjăp, ndâk ƀư rmôt ntop kơl gay nkra lĕ rngôch samƀŭt rhăch nău, samƀŭt tĭng trong ƀư ndal, rhoăt đêt ngăn mông nar nchrăp ntuh kơl, đă tŏng ăp nkô̆ nău pháp lý gay ơm mbơh ndâk ƀư jay gŭ an nuĭh ƀon lan.

He kơt dŏng trong ƀư geh nău an êng hôm tâm rnôk mbơh ndâk ƀư ri an ƀư tĭng nău đă tâm nu nău ndal gay ƀư. Yơn ƀư an dŭt n’hâm ntêm nkrem, geh săk rnglăy âk, ngăn ngên ngăn, dêr mpŭng lir, dêr geh sa khâm.

Nău ƀư tay ntŭk gŭ mhe an 35 rnăk nkual pĭch rlâm ta xă Tuy An Tây mô knŭng lah trong mkra ta năp măt gay đăp mpăn nău rêh nuĭh ƀon lan, ma hôm saơ na nê̆ lĕ đah nău kan bah n’gâng kan ăp gưl, ndrel nuih n’hâm tâm rnglăp, tâm kơl ta ntŭk gŭ rêh.