Nău kan lam nghiệp n’gor Dak Lak dôl rgum ntrôl ngăch tăm bri tâm yan mih đah nău ŭch tăm mhe 1.800 ha bri. Tâm năm 2024, n’gor Dak Lak geh trong nchrăp tăm 1.817 ha bri rgum n’hanh 200.000 tơm si chah chrai. Ăp ntil tơm dơi tăm geh: n’gêr ônh, rhăch, tơm tŭng, tơm joar n’hanh tơm keo ƀư n’har rđaih.

Nău tăm bri dơi ƀư tĭng bôk khay 5, rnôk ntơm yan mih. Tĭng Chi cục trưởng Chi cục kiểm lâm n’gor Dak Lak, jêh 2 khay ƀư, ăp ntŭk n’hanh tơm bri lĕ ƀư geh 1/3 rnoh ndơ trong nchrăp, tăm geh nklăp 600 ha bri rgum n’hanh rlău 15.000 tơm si chah chrai. Đah nău ngăch aơ, trong nchrăp tăm bri n’hanh tăm si chah chrai mbra geh n’hanh rlău rnoh n’gluh an.