Nar ntri (18/12), UBND n’gor Dak Lak ƀư bôk nău kan tâm dâl nău đah druh ndăm mpeh nkô̆ “Pah kan ntĭm nti nău kan, nta joi nău kan n’hanh rdâk njêng tơm nuĭh kan săk blău âk tâm druh ndăm n’gor Dak Lak tâm rơh aƀaơ”.

Ta tâm nchră, ntơh măt ăp sở, ăp n’gâng kan geh tât hŏ nkoch gĭt du đêt lôch jêh ntoh lư mpeh nô nău druh ndăm, nkoch luh nău dơh uĕh, jêr jŏt, ntul rlong n’hanh trong rƀŏng du đêt nkô̆ tâm hun hao ntĭm nti nău kan gay đăp mpăn ntĭm nti tơm nuĭh kan rhŏ dŏng an nău kan ƀư njêng, tăch rgâl n’hanh rhŏ dŏng tŏng đah nău ŭch geh, bên di đah ntŭk pah kan tâm rnôk lăp rgum wăng sa dak bah dih n’hanh rgâl mbrô. Lah rjăp n’gor way ntrŭt nsôr, nta trong dơh an druh ndăm ntơm njêng nău kan, rgop tâm nău hun hao bah n’gor, wa H Yim Kđoh, Groi kruanh UBND n’gor Dak Lak đă ăp gưl ủy, n’gâng kan ân n’hao âk tơ̆ tâm dâl nău na nê̆ đah đoàn viên, druh ndăm gay rƀah ngăch ăp nău dăn đă. Ntơm bah nê geh ăp trong n’hao săk blău ntĭm nti, rdâk njêng tơm nuĭh kan mom ndăm săk blău âk gay n’hao geh tơm nuĭh kan an n’gor.