Lôch dăp rgum nhih pah kan n’hanh n’glăp dŏng n’gâng kan bar gưl, n’gor Dak Lak dôl ntrôl ngăch rgâl dơh glêh siƀŭt nkre đah rgâl mbrô, sŏk nuĭh ƀon lan ƀư rgum tơm rhŏ dŏng. Nău an ƀư ăp kôp Đề án 06 bah Chính phủ hŏ n’hanh dôl njêng nău rgâl kloh tâm mât bôk kan ngih dak, n’hao săk tam rhŏ dŏng ƀư siƀŭt ta n’gor.

Wa H’Dit Byă, ta buôn Dhă Prông, phường Buôn Ma Thuột, n’gor Dak Lak rhơn an gĭt, păng dŭt di nuih n’hâm rnôk hăn but săm ji ma djăt ma ndjôt du mblâm điện thoại geh pơk dŏng VNeID:

“Ntơm bah rnôk dŏng VNeID ri rnôk hăn nhih dak si mô hôm kâp dŏng thẻ bảo hiểm y tế lha đaih đŏng ôh ma rgum lăp nsum ta điện thoại, dơh ngăn”.

Tĭng nchih rgum, tâm năm aơ, lam n’gor Dak Lak geh rlău 6,9 rkeh tơ̆ nuĭh but săm ji dŏng căn cước công dân; rlău 2,5 rkeh thẻ căn cước dơi n’glăp rgum nsum đah thẻ bảo hiểm y tế hôm geh nar dŏng. Aơ lah nău dơi lor bôk năp tâm trong an ƀư Đề án hun hao dŏng ndơ mât prăp nău lư mpeh ƀon lan gŭ, moh săk n’hanh năl di điện tử rhŏ dŏng an rgâl mbrô neh dak (way kuăl lah Đề án 06) ta n’gor.

Thượng tá Võ Hùng Tường, Kruanh jrô kan Cảnh sát Mât uănh ƀư siƀŭt mpeh rĭng grep rêh jêng kon nuĭh, Công an n’gor Dak Lak an gĭt, mpôl công an hŏ hăn tât tĭng rnăk ntĭm nuĭh ƀon lan pơk n’hanh dŏng tài khoản định danh điện tử VNeID, lơn lah ta nkual jru, nkual ngai, nkual rnoi mpôl đê̆. Bah nê, gĭt wât n’hanh geh nău tâm bah ŭch bah nuĭh ƀon lan đah rgâl dơh glêh siƀŭt, rgâl mbrô dơi n’hao kloh.

“Ntrŏng rgâl dơh glêh siƀŭt lah rêng an ƀư rgum tơm khlay n’hanh đăt ndal gay n’hao nău dơi tam pah kan, nkre nta trong dơh an nuĭh ƀon lan, doanh nghiệp. Tâm bah ri aơ nơh, mpôl hên nkre ƀư jăp pah kan nsŏng kơl an kruanh Công an n’gor, nkre an ƀư ăp kôp ăp trong mât siƀŭt mpeh rĭng grep rêh jêng kon nuĭh ta ntŭk”.

Tĭng ƀư Đề án 06, tâm 3 năm aơ, n’gor Dak Lak hŏ ƀư wat jêh nău rgum dơn, pă an thẻ căn cước công dân ntrŭp chip an lĕ rngôch nuĭh ƀon lan tŏng geh nău dơi; an ƀư tài khoản định danh điện tử an rlău 10.000 nhih pah kan, mpôl kan. Tât aƀaơ, bơi 10.000 hồ sơ kơl an ƀư phiếu lý lịch tư pháp dơi ƀư ma VNeID; rlău 90% ndơ ƀư siƀŭt khlay dơi ndơ̆ an ƀư pơk sŏng dăng bah ngai, njêng trong rgâl tơm bah “hồ sơ siƀŭt” jêng “mât prăp nău lư mbrô”.

Ndrel đah nău ăp kôp, tâm pă nău lư ntŭk ƀon lan gŭ, Đề án 06 ta Dak Lak dôl tĭng kơn kơl nkra siƀŭt tĭng trong rƀŏng dơh glêh, ngăch n’hanh kloh rvah lơn an nuĭh ƀon lan. Âk trong ntĭt leo mhe kơt mbơh ntŭk manh gŭ ma phần mềm ASM, mbluh rloh gay nkra ƀư siƀŭt tâm trong kan neh ntu, mât uănh nău lư nuĭh dŏng neh ntu ma Ntŭk mât prăp nău lư gưl neh dak mpeh ntŭk ƀon lan gŭ, VNeID mô lah kiosk rhŏ dŏng êng ta ăp ntŭk kan dak si hŏ rgop rhuăt luh mông nar kâp, bah ir mâp tât na nê̆.

Tĭng Đại tá Trần Bình Hưng, Groi Giám đốc Công an n’gor Dak Lak, gay geh ăp nău dơi dja mât jŏ jong, nău khlay bah nuĭh mât bôk ăp nhih pah kan, ăp n’gâng kan ta ntŭk êng dơi uănh khlay.

“Nuĭh mât bôk leo ƀư têk ndrêng, rƀŏng trong n’hanh rđău đă cán bộ, tahen an ƀư nău dơn kan. Gay tĭng ƀư geh nău tam Đề án 06 tâm năm 2025 n’hanh ăp năm bah kơi tay, nău khlay bah nuĭh mât bôk kan ăp nhih pah kan, ăp n’gâng kan ta ntŭk lah dŭt n’hâm khlay”.

Đah nău lăp kan ăp kôp, lĕ n’hâm suan bah lam trong kan chính trị, tât aƀaơ, Dak Lak hŏ jêng tât “KLOH” ta lĕ rngôch 102 xã, phường; wat jêh lĕ rngôch 108 rnoh tât kan Tĭng trong nchrăp mbrô 02 bah Ban rđău đă Trung ương mpeh ntrŭt ntrôl rgâl mbrô mbluh rloh, ăp kôp, ngăch n’hanh geh nău tam. Dak Lak lah ngoăy tâm ăp n’gor leo lor bôk năp bah lam dak ƀư wat jêh nău kan bah năp nar tŏng, tŏng di đah nău ŭch geh dăp rgum nuĭh kan n’hanh n’glăp dŏng n’gâng kan bar gưl. Nău dơi geh dja lah rjăp tay nău rgâl dơh glêh siƀŭt nkre đah Đề án 06 mô dơn lah trong nkra kỹ thuật, ma lah njuat rgâl tơm tâm trong mât bôk kan, rgop n’hao săk tam rhŏ dŏng nuĭh ƀon lan, doanh nghiệp n’hanh dơi Trung ương rnê âk./.