VOV4.M’nông:   Rlău 10 năm ƀư tĭng trong điển tử rgâl vĕ kơp điện năng. Công ty điện lực Dak Lak lĕ ntơm jêh nău rgâl công tơ điện tử, nta an nâp nâl an trong rgâl mrô tâm lvang mhe. Aơ lah nău kan điện ƀư tĭng trong ndâk njêng điện thông minh tâm rgŏ năp.

Bah năm 2011, Công ty điện lực Dak Lak ntơm rgâl công tơ cơ khí đah công tơ điện tử. Công tơ aơ kơl nău kan điện uănh nđôi mrô điện kơp êng, mô kâp nuĭh pah kan hăn nchih mrô điện ăp khay kơt bah năp. Nkre, tă bah internet, nuĭh dŏng dơi uănh êng rnoh điện lĕ dŏng. Nô Nguyễn Xuân Thành, ta mrô jay 225 trong Y Moan, nkual ƀon têh Buôn Ma Thuột, an gĭt, bah rnôk dŏng công tơ điện tử, nô dŭt knơm tâm nău kloh rah wah vĕ kơp điện kơt đăp mpăn đah rnoh dŏng điện. Tă bah phần mềm nglăp ta điện thoại di động, nô dơi uănh rnoh điện dŏng ăp nar bah rnăk wâl:

        “Gâp saơ dŭt dơh: bôk năp lah rnoh di pơng âk; tal 2 lah dơh uănh nđôi rnoh điện dŏng, kơl he nchrăp nkra rgâl ăp ndơ điện tâm jay. Ntĭt nsa kơt yan aơ geh du đêt ndơ he dơi nset lơi, mô lah n’hŭch dŏng, mbra kơl an nău dŏng điện đăp mpăn n’hanh ntêm nkrem lơn.

Nuĭh dŏng dơh lơn kơp uănh nu nău dŏng điện tă bah điện thoại di động

Đah Công ty TNHH Dawa, gŭ ta Nkual công nghiệp Tân An, du khay trok rlău 80 rkeh prăk điện, wa Hồ Thị Lộc-Groi giám đốc công ty, an gĭt:

“Bah nar dŏng phần mềm tă bah điện thoại bah điện lực ri gâp dŭt âk nău uĕh, kơt lah uănh nar dŏng điện ăp khay ăp nar; tal 2 lah geh nău mâp roh điện ri mbơh dâl tă bah nĕ rgâl an kuăl điện an tổng đài điện lực. Phần mềm nĕ dŭt dơh an nău uănh nđôi sam ƀŭt nchih, ri dŭt uĕh an doanh nghiệp. Tă bah nĕ, lah saơ rnoh điện dŏng tâm nar hao ndal ri gâp mbra an mpôl kỹ thuật uănh tay ăp trong rse điện n’hanh măy mŏk, kơl công ty uănh nđôi n’hanh ntêm nkrem điện.

Tât aƀaơ, nău dŏng ăp mât prăp điện gay rhŏ an nău ƀĭt joet nkra njêng, dŏng lĕ jêng bên bah âk nuĭh n’hanh doanh nghiệp ta Dak Lak. Ăp dữliệu aơ dơi công ty điện lực Dak lak nkoch tâm trang Web https://cskh.cpc.vn n’hanh tă bah phần mềm nglăp tâm điện thoại, lah du trong kloh rah wah tâm nău rwăt tăch điện đah nuĭh dŏng. Wa Nguyễn Văn Chương, Groi Giám đốc điện lực Dak Lak, an gĭt, rlău 10 năm kơt dŏng công tơ điện tử n’hanh mbơh ƀư trong sŏk mrô cô tơ bah ngai lĕ rgop n’hao uĕh trong kan mât uănh tăch rgâl n’hanh n’hao uĕh rhŏ an năch dŏng điện ta Dak lak. Aơ lah nău kan điện ƀư tĭng ndâk njêng trong điện thông minh tâm rhŏ năp.

Nchrăp êng mât uănh dŏng điện rgop kơl doanh nghiệp tŏng ăp đăp mpăn, n’hao săk rnglăy nkra njêng.

“Đah nău rƀŏng n’gluh an jêh trong điện thông minh tâm ăp năm tât ta lam n’gor Dak Lak ri công ty dôl dơi rgâl nău rƀŏng nĕ. Bah năm 2016 công ty lĕ ntuh kơl trong nset bah ngai (SCADA) đăp mpăn di âk, đăp mpăn, mông nar tăch proăt pă điện dŭt đêt n’hanh rnoh nsing nơm hao. Năm 2014 ri công ty ntuh kơl ăp ndeh nkra điện ndal, lĕ rngôch ăp nău khuch mô lah nkra ta trong rse ri mô kâp nset điện. Công ty lĕ mbơh ƀư sam ƀŭt nchih prăk điện tử bah 1/7/2022 gay rhŏ an trong kan mât uănh sam ƀŭt nchih prăk điện n’hanh soay hăn jru, tŏng ăp nău ŭch rgâl mrô bah Chính phủ”.

Tât n’gul năm aơ, Dak Lak lĕ nglăp công ty điện an rlău 580.000 năch (geh 96,5%). CP Dak Lak nsrôih jêh rgâl 100% công tơ điện tử n’hanh nchih rgum mrô lôch jêh êng tâm năm 2022 aơ. Đah ăp trong mkra công nghệ mhe, Công ty nsrôih ndơ̆ ăp ndơ dŏng vĕ kơp điện tât đah ăp nuĭh, ta lĕ rngôch ăp ntŭk ta ăp trong ndơ điện tử. Điện lực Dak Lak dôl ndâk njêng tay ăp ứng dụng gay rhŏ uĕh lơn, kơt dơi nchroh mbơh êng, mbơh njrăng êng an năch ăp nău tât ndal tâm rnôk dŏng điện./.

                    Nuĭh rblang: Y Sưng Phê Ja